Pambato sa KF Cebu ipasigarbo ang Talisay

CEBU, Philippines – Ni- courtesy call sa mga opisyales  sa Talisay City ang pambato sa KF Cebu sa prestihiyusong Binibining Pilipinas nga si Gazini Garnados.

Si Gazini maoy mo- representar sa Talisay City, Cebu sa usa sa labing taas nga indigay sa kaanyag sa nasud butang nga gikalipay nilang First District Congressman Samsam Gullas ug Talisay City Mayor Eddie Gullas.

Atol sa maong kompetisyon, ipakita unya ni Gazini ang mga maanindot nga hiyas sa maong dakbayan nga ikapanghambug lukop nasud. Nasayran nga usa ang pangalan sa 20 anyos nga si  Gazini sa mga kandidata nga matud pa  dunay ikabuga sa maong kompetisyon.

Pipila sa obserbasyon sa kadaghanan nagkanayon  susama  ang  iyang beauty sa mga Latin American.

Si Gazini kinsa usa  ka half Palestenian nakaangkon na og ubay ubay nga mga titulo sa natad sa beauty pageant ug pipila niini mao ang pagkahimo niyang Miss Milo Olympics niadtong tuig 2012, Miss CESAFI 2017, Miss Bohol 2017 First Runner Up. Gradwado sab siya sa kursong Tourism sa University of San Jose-Recoletos.

Usa sa di malimtan sa iyang mga fans mao ang pagkalakip niya kaniadto sa Top 15 finalists  sa Miss World niadtong tuig 2014.