“Promdi” Idol

CEBU, Philippines — Kitang tanan adunay tinguha nga molambo ang dagan sa kinabuhi. Kitang tanan dili buot nga magpabilin nga naa kita kanunay sa ubos mao nga ang pagpaningkamot ug ang pagtuo sa kaugalingon maoy usa sa hinagiban aron makab-ot ang tagsa-tagsa nato nga tinguha sa kinabuhi.

Sa atong kinaugalingon nga pamaagi aron nga molambo, mao kini ang sinugdanan aron makatilaw ug makatagamtam sa bunga sa kalampusan.

Mao kini ang kinabuhi sa usa sa mga sa nahimong finalist sa Sinulog Idol 2019  nga si Jonas Elarcosa.

Si Jonas, bag-ohay lang nigrdwar  sa kurso nga AB-Broadcasting sa University of The Visayas Main Campus.

Nagikan sa Daanbantayan, Cebu si Jonas ug matud pa niya nga nagdako gyud siya isip usa ka probinsyano diin adunay pagka-iwit gamay sa mga naandan nga mga pagabuhaton sa mga taga syudad.

Miabot sa siyudad si Jonas aron nga padayunon ang iyang pagtungha bisan og kuwang man ang iyang pamilya sa kahimanan aron suportahan siya.

“I am a self supporting student kay dili kaya sa akong parents nga paskwelahon ko sa college since naa pud koy mga manghod nga ginagastuhan. I am the eldest sa among tulo ka managsuon. Lisud para nako nga isakripisyo akong talent sa singing kay kailangan nako mag- focus sa trabaho para naa koy pambayad sa school”, saysay pa ni Jonas.

Gibutyag ni Jonas nga hilig gyud niya ang pagkanta sukad pa niadtong 5 anyos pa lang siya.

“I still remember sa bata pako, kung mutukar na gani nang paboritong kanta sa akong parents sa radyo nga AVIGON, katung de battery pa sauna, tawgon dayon ko ana nila ug ipatung sa lamesa kay ganahan kaayo sila nga mudungan ko’g awit sa radyo ug mag atbang sila nako maminaw”, paghinumdom pa ni Jonas.

Gawas sa pagkanta, daghan gyud og nakamahoan si Jonas. Kamao siya nga mag-host, mopintura, moarte, mosayaw, mosuwat og mga script alang sa mga theater play.

Ingon nga dili gyud maalkansi ang sama ni Jonas kun asa ibutang gumikan sa mga abilidad nga iyang nahibal-an samtang nanikaysikay siya.

Karon ng nahuman na siya og eskwela, padayon siya nga nanginabuhi aron nga makakita og maayo nga trabaho aron nga makatabang sa mga panginahanglan sa iyang pamilya.

Sama sa uban, ang pamilya ang inspirasyon ni Jonas, ug mao kini ang hinungdan sa iyang pagkugi bisan pa man adunay higayon nga kapuyon na siya sa iyang pagtukaw-tukaw.

Matud pa ni Jonas nga nangita siya og mga gikalingawan aron nga magpagdayon pa gihapon nga mosabay sa dagan sa kinabuhi.

Ang pagkanta ang usa sa makahatag og gana ug kusog ni Jonas aron dili gyud moatras sa kinabuhi.

“Samtang ga-eskwela pa ko, wala nako gidalo sa akong kaugalingon ang chance sa Sinulog Idol to bring music back to my life”, suma pa niya.

Mao nga sa pagkahibalo niya sa maong prestihiyoso nga kompetisyon, miapil gyud siya dayon tungod sa iyang dako nga gugma sa musika.

Gawas niana, aduna sab gyu’y gihuptan si Jonas kun nganong ganahan gyud siya nga moapil.

“Gusto nako nga pamatud-an nga kaya sa usa ka probinsyano ang mutungtong ug moawit sa mga dagkong entablado sa siyudad”, suma pa niya.

Alang kang Jonas, dakong garbo kini ang nahimo siya nga kabahin niini.

“Makonsiderar nako as a blessing nga dili ikabaylo sa bisan pila nga kantidad. Daghan ko’g nakat-onan sa mga workshops nga dili lang nako magamit sa ibabaw sa entablado kun dili mamahimo sab nakong magamit sa pang adlaw-adlaw nga pagpakabuhi”, istorya pa ni Jonas.

Duha ka gabii lang ang nahimong pagpasundayag ni Jonas sa maong kompetisyon apan dili kini sukaranan aron nga mawad-an og gana sa pagkanta.

Nahimong pultahan ang Sinulog Idol sa mga oportunidad nga wala niya damha nga moabot kaniya sama sa nahimo siya nga host ug daghan ang mibilib kaniya sa maong forte.

Dugang pa niya nga napun-an ang iyang mga higala nga sama kaniya nga adunay gugma sa musika.

Pagkahuman sa pito ka gabii sa kompetisyon, mitiwas sa pagtuon si Jonas hangtud sa nahuman gyud niya ang iyang kurso.

“Now I am into business. Dako kaayo og natabang ang Sinulog Idol, mas nahimong positibo akong outlook sa life, lisud akong mga experiences sa kinabuhi and I want to use my story para maka inspire sa mga tawo especially sa mga kabatan-onan mopadayon gyud”, padayag pa ni Jonas.

Si Jonas ang buhing saksi nga bisan pa man sa kalisdanan, himuong dalangpanan ang Kahitas-an ug tabangan gyud kita kanunay niini sa unsa ang atong mga gusto pa nga maangkon sa kinabuhi. Ang kinabuhi ni Jonas mao sab ang mopamatuod nga kitang tanan kinahanglan nga maningkamot nga makahuman og eskwela bisan pa man og lisod ang pagpangita og kwarta ug kab-uton sab gyud kun unsa ang mga gitinguha sa atong kasingkasing.

FACTS:

Name: Jonas Elarcosa

Nickname: Jonas

Bday: November 13, 1993

Address: Agujo, Daanbantayan, Cebu

School/Course: University of The Visayas Main, AB-Broadcasting

Height: 5'8

Weight: 60kls

Genre/s: Ballad, Pop

Favorite Color: Color: Blue

Favorite Song: Say That You Love Me

Winning Piece: This Is The Moment

Favorite Singers: Celine Dion, Martin Nievera

Celebrity Crush: Liza Soberano

Motto: If you want to live, believe!