Tips sa Summer

CEBU, Philippines —  “Pandong mo diha!” Mao kini ang kanunay nga isulod sa inyong alimpatakan sa higayon  nga morampa mo panahon sa ting-inits.

Dili na gyud mabangbang, nagsugod na gyud ang summer busa ang uban kanato, mag-enjoy og maayo sa paglaag.

Sa atong paglaag, ato gyud kanunay huna-hunaon  nga  malikay sa kadaot ang atong lawas.

Pwes, ania ang simple summer tips nga kinutlo nako gikan sa akong mga higala nga expert sa maong butang!

Pasingot

Pipila kanato ang dili feel nga morampa og layong lugar ug mas pilion pa nila ang pag-workout. Gawas nga makatipid.  makabaton pa gyud  og maayong benepisyo ang ilang lawas. Kay panahon man sa ting-init, mas nindot magsugod ka og workout sa bugnaw nga panahon, sama sa sayo sa buntag, o ba kaha inigkaabot sa gabii.

Ayaw gyud kalimot nga sa dili pa ka mag-workout, dala nimo ang tanang gamit nga imong gikinahanglan sama sa extra tshirt, towel, tubig ug uban pa.

Pagbantay sa pagkaon

Magbinantayon gyud ta sa pagkaon ilabi na nga panahon na sa summer. Naay mga bacteria nga paspas kaayo mokatap panahon sa ting-init. Kun mag-picnic man gani, mas maayo nga kamo na lang gyud ang magluto sa pagkaon  aron sigurado nga limpyo ang pag-andam niini. Hinumdomi nga ang food poisoning makamugna og vomiting ug diarrhea.

Kainit sa adlaw

Ayaw palabi sa pagbulad sa adlaw. Kinahanglan nga magdala na lang gyud og payong aron malikayan ang heat stroke, skin cancer, dehydration, ug sun burn. Likayi ang pag-inom og softdrinks, beer, coffee, tea aron malikayan ang dehydration. Inom og daghang tubig matag adlaw.  Alang sa mga magpabuwad sa baybayon, labing maayo nga magbutang gyud og sun block sa inyong panit.