Mga Cebuana, pambato sa international pageants

CEBU, Philippines – Lahi ra gyud ang kaanyag sa mga Cebuana gumikan kay sa umaabot nga mga bulan, tulo ka mga maanyag nga dalagita ang mobandera sa nasud sa international nga mga indigay.

Ang 12-anyos nga si Sarah Nichole Filtness kinsa usa ka honor student sa Saint Augustine Academy nga nahimong First Runner Up sa Little Princess Philippines 2018 mao ang mosangka sa umaabot nga Pre-Teen Miss Universe 2019 nga mahitabo karong Mayo 5 hangtud sa 10 sa Georgia, Europe.

Dili kini niya unang higayon nga mosalmot og indigay si Sarah gumikan kay nahimo na siya nga Miss Basdiot Moalboal Tourism 2018 ug Miss Malhiao Badian Tourism 2018.

Alang kang Sarah ang iyang mga kasinatian mao ang usa sa iyang gihuptan nga kusog aron nga maandam ang iyang kaugalingon sa prestihiyoso nga indigay sa mga kabataan sa nagkadaiyang bahin sa kalibutan.

Samtang sa samang lugar ug takna didto sa Georgia karong Mayo, mahitabo sab ang Teen Miss Universe 2019 nga salmutan sa 12 anyos nga usa ka WCOPA Model of the World 2017, ug nakoronahang Teen Princess Philippines 2018 nga si Kasley Malaika Libres.

 “It is an honor to represent the Philippines at a young age and I will do my best to win in the competition”, suma pa ni Kasley atol sa send-off media interview nga gipahigayon sa usa ka hotel.

Sa laing bahin, ang labing bag-o nga nabunyagan sa kalibutan sa pageantry nga si Jashley Van Hemelen mao pambato sa nasud alang sa  Teen Princess of the World 2019 nga mahitabo karong Hunyo 17 hangtud sa 24.

Saysay pa sa model  nga si Jashley nga ang Teen Princess of the Philippines 2018 mao ang labing unang korona nga iyang nadawat ug gani, andam na siya nga angkunon ang korona ug titulo sa Teen Princess of the World 2019.

Matud pa ni Jashley nga pagkugi, pagtuon ug igong kompyansa sa kaugalingon ang mahimong sekreto aron nga magmadaugon sa kompetisyon. Mao kini ang dili niya angay nga kalimtan og pagdala paingon sa Bulgaria, Europe kun diin ipahigayon ang koronasyon.

Saysay pa sa tulo nga ang ilang pagpaso ug kun unsaon nila pagtubag sa Q and A portion mao ang tumang gipangandaman nila og maayo.

Dako sab ang ilang pasalamat gumikan kay naa si Mrs. International 2017 Jee Candelasa-Eribal nga mao ang naghatag kanila og tips sama sa saktong pagrampa ug pagdala sa kaugalingon sa entablado.

Gani, ang nakoronahang Miss Teen Princess of the World 2018 nga si Keena Shanelle Sularte mao sab ang mihatag sa tulo og mga tambag ug pagdasig aron nga mahimong sama kaniya nga adunay igong kompyansa ug makabaton og dako nga kahigayunan nga maangkon ang gitinguha nga titulo.

Dugang pa, ang ilang pagpaningkamot agi sab kini sa gihatag nga suporta nga gipakita ug gipabubo sa ilang tagsa-tagsa ka mga ginikanan alang kanila.

Ang national director sa “GlaMore” Production nga Maan Aris nipadayag nga dili gyud basta-basta ang mga Sugbuanon gumikan kay duna kini igong katakos sa pagsagubang sa mga dagkong indigay.

 Dugang pa niya nga wala gyud siya naglisod sa tulo ka mga Sugbuanon atol sa training niini gumikan kay nagpakita gyud kini og dedikasyon sa ilang gipangbuhat.