Westlife mobalik sa Pilipinas

CEBU, Philippines – Gikatakdang mag-concert og balik sa Pilipinas ang sikat  nga Irish boy band nga  Westlife  karong  July sa Araneta Coliseum.

Tipik kini sa selebrasyon sa   20th anniversary sa maong grupo. Ang Westlife maoy nagpasikat sa   “Swear It Again,” “Flying Without Wings,” “If I Let You Go,” “My Love,” “Uptown Girl,” “A World Of Our Own,” “Unbreakable,” “Mandy,” ug  “You Raised Me Up.”

Kahinumdoman nga nag-concert ang Westlife sa nasud niadtong Pebrero.

3M followers na sa IG

Duna nay tulo ka  milyon nga followers ang  Instagram account sa Kapamilya actress nga si  Maymay Entrata.

Matud pa nga nisaka ang gidaghanon sa iyang followers sukad   gi-release ang awit niya nga  “Kakayanin Kaya.”

Gipagawas usab ang  music video kauban ang  onscreen partner niya nga si  Edward Barber sa awit nga  “No One Else.”

Todo pasalamat si Maymay sa iyang followers nga nihatag og init nga suporta sa iyang career.

Dani gipahimangnoan ni Greta

Wala mahimuot si  Gretchen Barretto sa gisulti sa pag-umangkon niini nga si  Dani Barretto nga bugtong inahan lang niini nga si Marjorie Barretto ang nagpadako kaniya.

Sa  latest Instagram Live  ni  Gretchen,  gipahimangnoan  sa aktres ang iyang pag-umangkon nga dili magpatuyang og pagawas og istorya.

Suma pa ni Greta nga sa panahon nga gisabak si Dani ni Marjorie,  gipapuyo niya kini sa iyang panimalay.

“You know, ang pangit, babalikan ko, babalikan ko ba, like, yung ginastos ko to, ginawa ko ‘yan’?You know, ayokong magbilang.Ang sinasabi ko lang, Marjorie and Dani lived with me in Blue Ridge,” saysay pa niya.

Sa panahon nga nasakit si Dani,  usa siya sa niatiman niini.

Dili matud pa motambong si Gretchen sa umaabot nga kasal sa iyang pag-umangkon.

Kahinumdoman nga nilenggua si Dani kaniadto kalabot sa  pagpadako ni Marjorie kaniya  isip tubag  sa pangutana kun moapil ba ang iyang amahan nga si Kier Legaspi sa paghatod kaniya paingon sa altar sa kaminyoon.

Suma pa ni Dani nga inahan lang niya ang  moapil og paso  gumikan kay mao kini ang bugtong nagpadako kaniya.

Teejay pasok sa It’s Showtime Indonesia?

Mosikad na karong March 25  ang  It’s Showtime Indonesia. Kahinumdoman nga ang Indonesian TV station nga MNCTV maoy  nakakuha sa franchise niini sa ABS-CBN.

Nitumaw ang report nga  matud pa  nga usa sa gikonsiderar nga malakip isip host sa maong show ang Pinoy actor nga si Teejay Marquez.

Nasayran nga sikat kaayo sa Indonesia si Teejay  ilabi na karon nga nalakip siya sa  Siapa Takut Jatuh Cinta (STJC), ang Indonesian remake sa  Taiwanese drama series  nga Meteor Garden.

Nidala siya sa  role  nga usa sa mga sakop sa F4.

Matud pa ni Teejay nga nag-agad ra gyud siya sa iyang management ug ikalipay niya og maayo kun malakip siya sa It’s Showtime Indonesia.

Kris gi-unfollow si Claudine

Nakabantay  ang netizens nga gi-unfollow  na  ni Kris Aquino sa Instagram ang higala niini  nga si  Claudine Barretto.

Nasayran nga usa sa mga kritiko ni Kris mao ang igsuon ni Claudine nga Gretchen Barretto.

Trending kaayo sa miaging adlaw ang report nga nagtingog na ang magsuong Claudine ug Gretchen.