KF Cebu Girls, Andam Na!

CEBU, Philippines – Pipila ka bulan nga sagunson nga pageant walk training, inadlaw adlaw nga pagbalik balik sa gym, kada gabii nga pagpahait sa kaalam alang sa “question and answer”, ug pagpakondisyun ug pagkab- ot sa tiunay nga beauty queen body. Pipila lamang kini  sa mga pagpangandam nga gihimo sa tulo ka mga representante sa Sugbo alang sa Binibining Pilipinas screening nga mahitabo na karong March 15 sa kauluhan.

Ang KF Cebu camp nga gidumala sa mga nabantog nga beauty queenmakers sa Sugbo nga mao silang Jonas Borces inubanan nilang Malayka Yamas, Roy Erwin Tizon ug sa mga assistant trainor niini nga sila si Carla Reign, Maria Paula Espina ug Inday Josa mipadayag nga naandan na gyud nila ang maong mga pagpangandam sanglit tinuig man silang mopadala og mga representante sa maong prestihiyosong kompetisyun.

Dugang nila, ang nakalahi karong tuiga mao nga doble ang pressure nga ilang gisangun sa ilang mga kandidata sanglit ang kadaghanan naghandom man karon og back- to- back win sa Pilipinas human sa kalampusan ni  Miss Universe Catriona Gray.

Ubay ubay na sab ang mga nahimong title holder nga nagikan sa ilang camp sama nilang Karla Henry- Miss Earth 2008,Rizzini Alexis Gomez- Miss Tourism International 2012, Angeile Dione Gomez- Miss Tourism International 2013, Kris Tiffany Janson- Binibining Pilipinas Intercontinental 2014, Rogelie Catacutan- Bb. Pilipinas Supranational 2015, Jaime Herrel- Miss Earth 2015, Natsuko Tsutsui- Miss International Japan 2017, Eva Patalinghug- Bb Pilipinas Grand International 2018, Cynthia Tomalla- Miss Eco International 2018, Shaila Rebortera- Miss Millennial Philippines 2018, Angel Pua- Miss Belgium 2018, Steffie Abarasturi- Binibining Cebu 2018, Sian Elizabeth— Miss Cebu, Samantha Dodson- Queen Philippines-Universe 2017, Gabriela Carballo- Miss Mandaue 2018, Jesselle Saniel- Miss Talisay 2018, Reclaire Stephan Tago- Miss Bohol 2018 ug uban pa.

Karong tuiga, hinug na matud pa sa ilang pagpangandam ang tulo sa ilang representante nga mao silang Gazini Ganados, Ilene De Vera ug Donna Ceniza. Parehu silang tanan nga nagpangedaron og 23 anyos.

Si Gazini nga usa ka half -Palestenian nakaangkon na og ubay ubay nga mga titulo sa natad sa beauty pageant.

Nahimo siyang Miss Milo Olympics niadtong tuig 2012, Miss CESAFI 2017, ug Miss Bohol 2017 First Runner Up.

Gradwado sab siya sa kursong Tourism sa University of San Jose-Recoletos.

Apan matud niya, usa sa di niya malimtan nga kasinatian mao ang pagkalakip niya sa Top 15 finalist atol sa Miss World niadtong tuig 2014.

Ang pagpalambo pa sa mga pasilidad ug serbisyo sa Home for the Aged maoy napilian niyang adbokasiya, sanglit nagdako siya kauban ang iyang apohang babaye ug sa pagtaliwan niini karong bag-o lang, dako nga kamingaw ang iyang gibati.

Alang kaniya, kanunay niyang makita ang presensiya sa iyang lola sa mga nagkadaiyang Home for the Aged.

Gusto sab niyang ipadangat sa katawhan nga gawas sa pagpaatiman, nanginahanglan usab ang mga  katiguwangan sa pagpangga diin ang uban gihikawan na niini.

Samtang usa ka lumad sa Mandaue si Ilene ug gradwado sa kursong AB Mass Communication sa U. P. Cebu.

Giatangan gayud sa pageant enthusiasts ang iyang comeback dili  lang sa Sugbo kundi sa tibuok nasud sanglit nagmarka man ang iyang maanindot nga performance atol sa pagsalmot niya kaniadto  sa Mutya ng Pilipinas niadtong 2017  diin siya ang migawas nga mananaog niini.

Gani siya ang nirepresentar sa Pilipinas sa prestihiyosong Miss Asia Pacific International ug nalangkat niya ang ikaupat nga pwesto niini.

Gipaambit ni Ilene nga dugay na gayud niyang pangandoy ang mosalmot  og Binibining Pilipinas ug karong tuiga matud pa ang labing haom nga panahon alang kaniya.

Malaumon sab siya nga unta, usa ka Cebuana ang morepresentar sa nasud ngadto  sa Miss Universe pageant.

Si Donna sa laing bahin nagdako sa dakbayan sa Ormoc.

Gradwado siya sa kursong Bachelor of Science in Business Administration sa Western Leyte College.

Gipaambit niya nga pangandoy gyud niya nga makatungtung sa entablado sa mga nagkadaiyang national pageant labi na gayud ang Binibining Pilipinas pageant mintras dalaga pa siya.

Usa siya ka ramp supermodel sanglit ubay ubay na sab nga mga national ug international fashion show ang iyang nasalmutan.

Gani, fitting mannequin siya sa nabantog nga world class Filipino designer nga si Carry Santiago ug halos tanang mga fashion show ni Carry, nirampa siya sul-ob ang mga nagkadaiyang biste nga gimugna niini.

Nahimo sab siyang Miss Ormoc niadtong 2013 ug usa sa daling mabantayan kaniya mao ang iyang height nga 5’9 and 1/2".

Sa kinatibuk an, malaumon ang KF Cebu nga mahatagan na sab og kahigayunan ang mga Sugbuanon ug Bisaya nga mapamatud-an sa kalibutan sa indigay sa kaanyag nga aduna sab gyud ta’y sarang ikasangka.  Dako sab ang ilang pagpasalamat sa mga nahimo nilang ka-partner sa pagpaanyag ilang mga kandidata nga mao silang Dr. Fremont Base , Dr. Malinda Vasquez , Dr. Franko Vicoy ug Leah Velasco sa Skin911.