Best in limpyo

CEBU, Philippines – Tsika pa ni Janine Gutierrez nga siya mismo ang manglimpyo sa iyang balay. Mao kini ang naandan sa aktres ilabi na kun wala siya’y taping sa iyang proyekto sa GMA.

Unya ra

DIli pa gyud masingit nila ni sina Iza Calzado ug Ben Wintle ang pag-honeymoon gumikan sa ilang ka-busy.   Kahinumdoman nga gikasal ang duha niadto pang Disyembre.  Gitataw hinuon ni Iza nga walay angay nga dalian.

Dakong garbo

Gihulagway ni Bea Alonzo   nga “dream come true” ang makabaton og pelikula nga makauban si  Charo Santos.  Nagkauban ang duha sa  horror film nga  ‘Eerie’: ‘  Nasayran nga dili basta-basta nga aktres si Charo nga usa ka dakong opisyal sa ABS-CBN.

Original choices

Gibutyag ni Direk Joel Ferrer nga sila si Carlo Aquino ug Jessy Mendiola maoy una niya nga gitarget kaniadto  nga mahimong bida sa pelikulang ‘Elise’. Giingong dugay na niya nga giplano ang maong proyekto ug nahatag kini ngadto nila ni Enchong Dee ug Janine Guttierez. Gipasalida kini niadtong Enero. 

Nakasuway na gyud

Gisuwayan na gyud sa Alone/Together director nga si Antoinette Jadaone ang taod-taod na niya nga pangandoy nga maka-skydive sa Dubai. Suma pa sa direktor nga nakulbaan na gyud siya og maayo ug  ganahan na gyud unta siya mo-back out apan wala gyud siya nagpadala sa iyang huna-huna.

Dugong Pinoy

Naglawig sa Singapore ang popularidad sa pop rock duo nga Islandeer. Gilangkoban kini nila ni Christian Jansen ug Michael Garcia. Sila maoy nagpasikat sa kanta nga “Momento.” Nasayran nga dunay mga dugong Pinoy ang nahisgotan nga performers.

Sikat sa Paris

Nilutaw og samot ang kaanyag ni Sandara Park sa pagrampa niya sa Paris Fashion Week 2019. Nasayran nga makadaghan na nga higayon nga giimbitar si Sandara sa maong dakong kalihokan.

Naanad na si Toni

Naanad na si Toni Gonzaga sa  mga isulti sa iyang kritiko.  Matud pa sa aktres nga kun hinagiban ang mga  pulong,  hagbay ra siya nasamad niini.  Suma pa ni Toni nga kever nalang siya sa mga ipanulti sa ubang tawo aron dili maapektohan ang iyang trabaho.

Gerald negosyante na

Gibuksan na ang negosyo ni Gerald Anderson sa miaging adlaw nga usa ka gym.  Kun dili busy ang aktor, siya mismo ang mangulo sa mga session. Nalipay si Gerald gumikan kay duna gyud siya’y makita sa hinagoan niya sa showbiz. 

Nadine nakahilak

Emosyonal si Nadine Lustre sa dihang gisaysay niya kun unsa ka espesyal sa iyang kinabuhi ang iyang boyfriend nga si Jame Reid.  Suma pa sa aktres ang iyang uyab maoy tigpakalma kaniya ug dako gyud ang nausab sa iyang kaugalingon sukad sila nga nagkauyab.

Pinoy nataypan sa

"The Voice US"

Nahugyaw  sa  Filipino singer ang upat ka  coaches sa  "The Voice US" atol sa nagpadayon nga audtion sa maong show.

Gikanta sa Pinoy nga si Jej Vinson ang  "Passionfruit” nga gipasikat ni Drake.

  Tungod sa iyang  powerful rendition sa maong kanta,  nipatuyok sa ilang mga lingkuranan ang coaches nga sila si Adam Levine, John Legend, Blake Shelton, ug  Kelly Clarkson .

"You're a better singer than all of us,"  suma pa  ni Levine .

Samtang si Clarkson nilenggua, og,"I can win this show with you. You are incredible, man. I turned around and I was like, 'What?' And it was so effortless." 

Dawn mobalik sa GMA

Motrabaho og balik sa  GMA ang  aktres nga si  Dawn Zulueta pinaagi sa  usa ka proyekto nga gamaon  sa GMA Films (GMA Pictures).

Ang maong pelikula nag-ulohan og  Family History  nga co-production sa  GMA Pictures ug Mic Test Entertainment.

Si  Michael V  ang direktor sa maong pelikula nga pagabitoonan usab nila ni Bianca Umali, Miguel Tanfelix, Paolo Contis, Ina Feleo, Kakai Bautista, Nikki Co, Mikoy Morales, ug Nonie Buencamino.

Katapusang nilugwa si Dawn  sa usa ka  GMA   production nahitabo niadtong  2006 ,kun diin nalakip siya sa  afternoon series nga  Now and Forever presents Duyan.

Nahimo usab siya nga kabahin kaniadto sa  Encantadia (2005) ug  Forever In My Heart (2004).

Usa siya sa mga   host sa GMA Supershow (1988- 1997.

Sa wala pa siya nibalik sa GMA,   niistar si  Dawn sa  ABS-CBN sulod sa 10 ka tuig.