Polished by Experience

CEBU, Philippines — Pagtuman sa pagpahimangno ug ang tumang pagpaningkamot ang solusyon aron maangkon ang gitinguha sa kinabuhi. Mao kini ang gipaambit sa 19-anyos sa nahimong fifth runner up sa Sinulog Idol Season 10 nga si James Matthew Alfafara kinsa miingon nga mao kini ang labing gikinahanglan nga lamas aron mas matagamtam ang lamian nga lasa sa kalampusan.

Name: James Mathew V. Alfafara

Nickname: Mat-mat

Birthday: April 15, 1999

Address: Pajo Valladolid, Carcar City Cebu

School & Course: University of Cebu- METC (Nautical Graduate)

Height: 5’6

Genre: Pop jazz, RNB, Ballad

Favorite Color: Royal Blue

Favorite Song: Think I’m in love Again

Winning Piece: Feeling Good

Favorite Singer: Michael Buble

Motto: Success doesn’t just find you. You have to go out and get it.

Titles/Achievements in Life:

-Interpreter of 1st Awiteofilo Song writing festival entitled “Gasa sa Gugma” 2017

-Carcar Idol Season 2 2nd Runner Up 2018

-Singing Bebeboy Season 2 Grand Champion at ABS-CBN Cebu Kapamilya Mas Winner Ka

-Grand Champion of OPM singing contest at UC-METC

-Sinulog Idol Season 10 Grand Finalist

Gipabuhagay pa sa pambato sa Carcar City nga dili lalim ang iyang kapalaran sa iyang pagsalmot sa  inulog Idol nga usa sa gikahinamang kompetisyon sa Sugbo .

Istorya pa niya nga taud-taud na siya nakadungog sa maong kompetisyon. Nagpangidaron pa lang siya og 16- anyos, pursigido na siya nga mosalmot niini.

Tungod sa dili pa gyud iyang panahon, wala siya madawat.

Gidawat niya ang maong kapakyasan ug mao kini ang natuklod kaniya aron nga maningkamot nga mahimong mamaayo sa sunod niya nga pagsalmot.

Sa tulo ka tuig, daghan ang nahitabo sa kinabuhi ni James. Usa niini mao ang pagtapos niya sa iyang pagtungha isip Nautical sa University of Cebu - METC.

Gawas niana, padayon gihapon ang pagsalmot ni James og mga singing contest aron magsilbi nga pagpangandam alang sa dako nga kompetisyon.

Apan dili sa tanang panahon nagmadaugon si James ug tungod niini, miabot na sab siya sa punto nga nawad-an na siya og paglaum.

“Kay naabot sa time nga sigi ko og ka pildi sa mga contest or place man lang”, suma pa ni James sa pagpakighinabi niya sa Banat News Hugyaw (BNH).

Aron nga mobalik ang iyang gana ug aron magmalig-on sa tanang mga pagsuway nga  iyang nasinati, anaa kanunay ang iyang inahan.

Kanunay siya nga gitambagan sa iyang inahan nga ang kapildihan mao ang mopabangon kaniya ug tungod niini gihimo kini niya nga instrumento aron himuon nga leksyon.

“Tungod sa mga  isulti ni mama nako, gihimo nakong challenge akong mga kalisdanan sauna, daghan ko og na learn jud ato mao tong naningkamot jud ko nga makabangon ko sa akong mga kalisdanan sauna”, saysay ni James.

Dako og parte ang inahan ni James sa iyang karera.

“Since bata pa ko hilig najud kaayo nako ang pagkanta, pero pagkadako nako, akong mama na ang nag-train nako para mas madevelop pa ang akong talent”, suma pa niya.

Asoy pa ni James nga daghan og pamaagi ang gitudlo sa  iyang inahan ilabi na unsaon ang pagpalambo sa iyang pagkanta apan mas gipalig-on sa inahan niya ang iyang pagtuo aron masagubang ang tanan niyang maagian sa iyang pagpanikaysikay sa umaabot nga mga kompetisyon nga iyang salmutan.

“Ang iingon sa akong mama kay win or lose ra jud tanan ug moingon sab na siya nga ‘okay rana dong, ana man jud na una’. Mao to nga wala ko mo-give up sa akong pagkanta kay kahibalo ko nga bisag mapildi ko, naa ra gihapun akong mama nga mosuporta diri nako”, paambit pa ni James.

Gituman ni James ang tanang pahimangno sa iyang inahan ug tungod niini midaog siya sa Carcar Idol Season 2 isip Second Runner Up, ug nahimo sab siya nga grand champion sa Singing Bebe Boy Season 2 sa Kapamilya Mas Winner Ka sa ABS-CBN CEBU 2018 niadtong 2018.

Ang iyang kadaugan sa duha ka kompetisyon mao ang mipahumot sa iyang ngalan sa masa, apan dili kini pa igo aron ikapanghambog na niya ang iyang kaugalingon tungod kay aduna pa’y usa ka butang ang gipaningkamutan niya nga maangkon, ug mao kini ang makalahutay nga mahimong kabahin sa Sinulog Idol.

Labihan ang pagpasalamat ni James ngadto sa Ginoo tungod kay gidungog ang iyang pag-ampo. Dili masukod ang iyang kalipay nga sa ikaduhang higayon nga iyang pagpaubos sa audition, wala na siya mapakyas.

Sa dagan sa kompetisyon, mabawuron sab gyud ang iyang kasinatian tungod kay pipila ka gabii nga gihagit gyud ang iyang katakus ug ang iyang pagsalig sa kaugalingon.

Alang kang James, dinhi nasukod ang iyang tibuok pagkatawo gumikan sa maong kompetisyon.

“Para nako ang Sinulog Idol ang pinakalisod nga contest nga akong naapilan kay very challenging kaayo. Pila ka nights pud ko nga naa sa bottom 3, mao to nga naningkamot jud ko pag-ayo para makabangon ko ug ma-prove nako sa akong self og sa uban nga KAYA NAKO”, padayag pa ni James.

Bisan og dili man maayo ang iyang pwesto sa pipila ka gabii, apan milahutay gyud si James hangtud sa katapusang gabii sa kompetisyon.

Gikalipay sab ni James nga sa ikaunom na gabii sa kompetisyon, nahimo siya nga Star of the Night sa ‘Rock Night’.

Hilabihan sab ang iyang kalipay nga gibati sa dihang nalakip siya sa Top 6.

Wala man siya nasulod sa Top 3, apan kontento siya sa resulta ug sa hukom sa mga hurado.

“Bisan dili ako ang nakadaog pero happy ug kontento kaayo ko og unsay na kab-ot nako karon, ug nalipay ko kay daghan jud ko og nakat-unan gikan sa mga workshop nga gihatag sa Sinulog Idol. Tungod sab sa Sinulog Idol, mas tuo (na) ko sa akong kaugalingon nga maayo ko”, siya miingon.

Mapasalamaton si James sa mga tawo nga miabiba kaniya sulod sa pipila ka gabii nga miisa sa iyang bandera agi og pagsuporta kaniya. Mapasalamaton sab siya sa iyang kabanay nga mi-unong kaniya kanunay.

“Una sa tanan, nagpasalamat ko og dako sa Ginoo nga every night siya rajud akong kastorya og labi sa akong mama, manghud ug auntie nga every night naa jud permi sa competition. Ug labaw sa tanan ang akong mga supporters nga nihatag jud og time para mosuporta jud nako. DAGHANG SALAMAT JAMES DEFENDERS OG SA TANAN”, pagpaambit pa ni James.

Ang dagan sa karera ni James ang buhi nga kamatuoran diin ang mga adunay katakus, dili gyud kinahanglan nga mawad-an og paglaum sa panahon sa kapakyasan gumikan kay kining tanan nga atong nahiaguman, mao ang mopalig-on kanato aron ihatod kita sa kalampusan.