#FashionPhotographer

Name: Matt Pingkian

Address: Minglanilla, Cebu

Birthdate: June 23, 1988

Facebook Account: Matt Pingkian

Email Add: [email protected]

CEBU, Philippines — Usa sa mga dili  malimtang dakong kalampusan sa usa sa mga lumad sa  Minglanilla nga si Matt Pingkian mao ang higayun nga nalakip ang iyang pangalan sa  Vogue Italy Art Commerce Photo Feature, diin usa kini sa  nakapasidlak sa iyang abilidad isip usa ka photographer niadtong tuig 2014.

Ang Vogue Italia maoy mopili og dekalidad ug limitadong mga obra maestra sa mga artist ug photographers lukop kalibutan.

Sa pagkalakip niya niini, way kabutangan matud pa ang iyang kalipay sanglit ang maong higayun maoy usa sa mga rason nga nagpamatuod sa iyang igong katakos ug kahanas sa pagpangodak.

Dul-an na siya sa napulo ka tuig nga nahimong photographer sa Sugbo.

Matud ni Matt, nagsugod ang iyang hilig niini niadtong nitungtong siya sa kolehiyo diin ang mga kaubanan niya sa pagtungha maoy nakapa interes niya nga hulagwayan kaniadto.

Ang maong hilig nahimo niyang passion hangtud nga nahimo siyang graphic artist, ug sa paglabay sa mga panahon hingpit na gyud niyang gisud ang kalibutan sa photography.

Sa kasamtangan, naila siya sa kadaghanan isip fashion photographer.

Dili  na sab mga basta basta ang iyang mga kliyente tungod kay naka rubbing-elbows na sab niya ang pipila sa mga nag-unang personalidad sa nasud lakip na ang mga celebrities nga silang Kuh Ledesma, Divine Lee, Tanner Mata, Tessa Valdes ug uban pa.

Inspirasyon matud pa ni Matt sa iyang pagka-photographer  mao ang pagkuha di lang sa mga memorable moments sa usa ka panghitabo kundi lakip sab sa gitaguang hiyas nga kaanyag sa iyang gihulagwayan.

Gipaambit sab niya ang iyang pag idolo sa mga international photographers nga sila si Richard Avedon, Ben Hassett, Mert Marcus, Peter Lindberg ug mao sab ang iyang dakong pag saludo sa local photographers nga mao sila si Mark Nicdao ug BJ Pascual.

Laing dili niya malimtan nga kasinatian mao ang higayun nga siya maoy mi- shoot sa editorial sa usa ka international magazine nga mao ang BLNC magazine kung diin siya sab ang nahimong creative director niini.

Matud pa, lahi gyud ang kalipay nga iyang gibati kaniadto sa dihang giila ang iyang obra sa laing nasud ug nga nalakip siya sa Paper Cut magazine.

Adunay higayun sab nga siya ang mi shoot sa usa ka campaign ad dinhi sa Sugbo ug gipatik sa billboard ang iyang obra. 

Gawas sa iyang pagka- photographer, nagpadayun gihapon siya sa iyang pagka graphic artist ug creative director, samtang usa sab siya ka magtutudlo sa  digital fashion sa usa ka fashion school dinhi sa Sugbo.

“Daghan gyud kaayu’g natabang nako ang akong pagka photographer kay mao sad gyud ni ang dako naku’ng source of income. Daghan gyud kaayong salamat sa tanan nakong clients nga ni trust nako ug ni believe nako as a photographer,” panapos pa niya.

Q & A

BNH: Unsa man ang labing dako nga challenge ang imong nasugatan isip usa  ka photographer?

MATT:  Katong mi -shoot ko og two days in a row para sa usa ka look-book. Mo break ra ko  para mo kaon.

BNH: Unsa nay in na in karon nga klase sa photography?

MATT: In karun ang portraits ug color grading ma pa wedding photography, fashion o landscape.

BNH: Sa pagka karon, unsang panahona in demand ka?

MATT: Sa beauty campaign para sa mga beauty clinics.