ETC

CEBU, Philippines — Ang pagkawili sa pagluto ang hinungdan nganong natukod ang kan-anan nga padayon nga gidagsa sa mga tawo sa may dalan Jakosalem sa dakbayan Sugbo nga ginganlan og ETC o Eat & Treats Café nga gipanag-iya sa kanhi executive producer sa ABS-CBN Cebu ug ang Attitude writer sa Banat News Hugyaw nga si Adrian Diongzon.

Gipabuhagay ni Adrian nga paborito na gyud niya ang maghikutar sa kusina ug mao kini ang tinubdan nganong namugna kining maong tindahan nga nagdalit og mga lamian nga mga pagkaon sama sa buffalo wings, chicken fingers, tuyo pasta, silog ug mga lamian nga mga dessert sama sa labing sikat nga mango float ice cream, halo halo, strawberry cheesecake, cookies & cream ug mango martini.

Daan pa nga mahiligon na gyud siya nga moluto og mga putahe nga gusto niya nga kan-on. Kun anaa siya sa iyang panimalay, magluto gyud siya.

“I cook what I love to eat”, suma pa niya.

Gitug-an ni Adrian nga wala siya moskwela sa culinary school aron makat-unan ang mga nagkadaiyang putahe nga iyang gisilbi sa iyang mga customers. Ang iyang alamag kabahin sa pagkaon mao ang iyang nahibal-an gikan sa internet o sa google.

Gawas niini, nahimong inspirasyon ni Adrian ang usa ka ice cream shop sa London atol sa iyang pagbisita sa maong dapit mao nga nakahukom siya nga apilan gyud og ice cream ang iyang menu.

Dako og parte sa kinabuhi ni Adrian ang ice cream gumikan kay mao kini ang iyang madawat nga ganti gikan sa iyang apohan.

“If you do good things, you will have an ice cream. At the age of 7, akong lola mangutana og unsa ako nga ice cream and I feel like pangmayaman ang ice cream”, pulong pa ni Adrian.

Suma pa niya nga ang iyang pamilya mao ang nakapanag-iya sa labing una nga grocery store dinhi sa syudad kaniadto nga mao ang “Thrifty Mart”.

Mao nga bata pa lang siya, dali ra siya makakaon og ice cream sa matag higayon nga matuman niya ang sugo sa iyang pamilya.

Sa ETC, buot sab ipabatyag ni Adrian nga anaa sa kaugalingon nga panimalay ang iyang mga suki o mga walk-in nga mga customers.

Kun unsa ang ganahan niya nga pagkaon, mao usab kini ang iyang idalit.

Sa duha ka bulan nga pagdagan sa maong negosyo, wala niya damha nga hangupon kini sa mga tawo.  Wala sab damha ni Adrian nga moabot siya sa punto sa iyang kinabuhi nga maghimo ug magsilbi og ice cream sa kadaghanan.

Nakita ni Adrian ang matuod nga kalipay sa dihang aduna siya’y masilbihan og ice cream ug makauyon sa kalami niini.

“Malipayon kaayo ko. I am always happy. Little things make me happy. Sa una I am always tapulan. Mupalit ko og repolyo nga mahalon, usa ra kabuok but I realized nga in Carbon Market  kay ang 36 pesos nimo kay upat na ka repolyo. Maka-happy siya. It makes me happy gyud. And happy ko kay walay bad reviews akong restaurant. It makes me happy sa akong makita nga nalipay sila sa among gi-serve diri sa ETC”, padayag pa ni Adrian.

Sa laing bahin, mipabuhagay sab og ginagmay nga tips si Adrian kun unsaon ang pagsugod ug pagmintinar sa maayong dagan sa negosyo.

TIPS NI ADRIAN

• Una, mangita og inspirasyon kun unsa nga klase sa baligya ang angayan nga tindahon.

• Gikinahanglan sab niini ang capital.

• Mangita og pwesto sa tindahan.

• Iparehistro ang tindahan.

• Hinay hinay nga magmugna og kaugalingon nga konsepto sa tindahan.

• Sa mga sagol, kinahanglan nga ma-budget pagtarong ang kwarta. Iguon lang sab ang kwarta sa pagpalit sa mga sagol ug mga gikinahanglan.

• Kinahanglan nga presko kanunay ang isagol sa mga pagkaon ug siguraduhon sab nga maayo kini nga pagkaluto.

• Mangunay sa negosyo aron mabalanse ug makat-unan kun unsa ang angayan nga ipalambo matag adlaw.