Beautiful Friday #ToBeTheBest

CEBU, Philippines — Dul-an na sa usa ka dekada nga nagsilbing photographer si Robo Godines Formacion.

Bisag siya wala magtuo nga mao na kini nga matang sa pagpanginabuhi ang maangkon niya sanglit wa man gayud kini sa iyang plano.

Hangtud nga ang iyang mga awards ug achievements sa photography mao nay nagpamatuod ug nagpugos kaniya nga kinahanglan gyud siyang mopili sa  maong propesyon.

“Nipalit ra gyud tawn mi’g camera sa akong uyab, (asawa na karon), para makapicture-picture mi, sa among pamilya ug sa mga lugar nga among laagan. Apan sa wa damha nga panghitabo, nagalgal ko sa iyang uyoan nga moapil og usa ka photo contest niadtong tuig 2010. Ug gikaluy-an sa Ginoo, ako ang nakakuha sa grand prize bisan mao pa to akong unang pag apil sa photo contest. Sukad niadto, sige na ko og apil og photo contest, ug tungod kay wala koy pilde-pilde, didto nailhan akong pangalan ug nagsugod na og duol ang daghang kliyente,” matud pa niya.

Pipila sa mga pasidungog nga iyang mga nadawat nga miila sa iyang katakos mao ang iyang pagka consistent Sinulog Photo Contest winner sukad pa niadtung tuig  2011.

Consistent “Photographer of the Year “ awardee sab siya sa Photoworld Cup nga gi -organize sa Federation of the Philippine Photographers Foundation sukad niadtung tuig 2014.

Nahimo sab siyang PAGCOR National Photo Contest Grand Prize Winner ug daghan pang mga awards ang iyang naangkon nga nakapalipay sab niya’g dako sanglit ang maong sitwasyon maoy usa sa mga rason nganung mas nailhan siya sa natad sa photography.

Ubay ubay na sab nga mga personalidad ang nahimo niyang mga kliyente apan ang dili niya malimtan sa tanan mao si Señorita Amparito Lhuillier tungod sa pagkamahiligon niini sa pagpakodak ug pagka estoryador niini.

Samtang giangkon sab niya nga ang labing dakong hagit nga iyang nasugatan isip photographer mao ang unsaon niya pagtupong sa expectations sa iyang mga kliyente ug ang pag -deliver sa iyang mga deliverables nga perming on-time.

Dugang pa niya, gusto niyang mahinumduman sa kadaghanan isip usa ka “chill” nga photographernga adunay dakong paghigugma sa pagpanguha og labing maanindot nga anggulo sa tanan niyang gihulagwayan.

Sa pag pangodak matud pa ma -express niya ang iyang pagka-creative.

Apan una pa siya nailhan isip in-demand nga photographer, naila siya sa iyang mga kahigalaan isip usa ka registered nurse.

“Ang akong pamilya maoy akong inspirasyon niining tanan tungod kay sila man sab ang pinaka rason nganong nipalit ko og camera.

Tungod sa akong pagpangodak, naka- provide ko sa mga panginahanglanon sa akong pamilya. Daghan gyud kaayung salamat sa tanan nakung mga kliyente.

Salamat sa tanang nisalig namo ilabi na sa kadtong nisalig namo atong mga panahon nga wala pa gyud tawn mi mailhi,” matud pa niya.

Q&A

BNH: Gawas sa imong pagka photographer, unsa pay imong gika busy-han?

ROBO: Nag specialize gyud ko sa wedding, portrait ug corporate photography. Pero kung wala koy shoot, motabang ko sa laing negosyo namo sa akong asawa ang Red Media Studio. Ako ang tig -quality check sa tanang pictures. Nag -cater mi og graduation picture, family picture ug uban pa.

BNH: Unsay dili nimo malimtan nga imong kasinatian isip usa ka photographer?

ROBO: Niadtong nagsugod pa mi, ang akong asawa gyud ang akong katambayayong kay dili pa man mi -maka afford mo hire og assistant. Nakasuway mi nga mag-motor padung sa Balamban kay mo-picture og kasal kay wala pa mi sakyanan sauna, nya mokalit lang og uwan, sus paita na man lang gyud.