Suzanne,the power belter

CEBU, Philippines — “Just have faith in God ug motuo gyud ko nga ang problema masolusyunan ra gyud na”, pagpabuhagay pa sa 19- anyos nga nahimong first runner up  sa Sinulog Idol Season 10 nga si Queen Suzanne Dugaduga kinsa mas naila na karon isip si Zane.

Si Zane, usa ka molupyo gikan sa Talisay City, Cebu ug matud pa niya nga dili gyud maayo ang kahimtang sa iyang pamilya kun ang pinansyal nga estado lang ang basehan.

Walo ka managsuon sila si Zane. Usa ka barbero ang iyang amahan ug anaa lang manikaysikay sa panimalay ang iyang inahan tungod kay mao kini ang miamuma kanila.

Matud pa ni Zane nga tungod sa kakuwang sa kuwarta, nakahukom na lang sab siya nga moundang sa pagtungha.

Sakit man pamalandungon nga wala siya makapadayon sa iyang pagtungha apan kinahanglan niya nga magsakripisyo tungod kay kinabuhi sa iyang amahan ang bugti niini.

“Si papa ato kay nagsakit-sakit man. Nikalit ra gyud to iyang sakit kay kani si papa abusado kaayo kay basketball player man gud nis papa. Niya karon nga edad-edaran nas papa kay ni-40 na man siya, nagduwa siya og basket udtong tutok. Mao nga naglisod siya og ginhawa,” suma pa niya.

Tungod sa maong panghitabo, nakahunong sab gyud og trabaho ang iyang amahan og wala nay pangita ang ilang pamilya.

Nangita si Zane og  paagi ug misakripisyo nga moundang sa iyang pag-eskwela tungod kay daghan na sab nila ang angay nga gastuhan.

Nahimong panginabuhian ni Zane ang pag-apil og amateur singing contest. Kaniadto, nahimong kalingawan ni Zane ang pag-apil sa maong kalihukan apan tungod sa wala damha nga panghitabo nga nasinati sa iyang pamilya, napugos siya nga dinhi na lamang kuhaon ang ilang mga gastuhan sa ilang inadlaw-adlaw nga pagpakabuhi.

Madasigon si Zane nga kining tanan nga iyang nasinati, aduna ray kaharuhay nga mahitabo.

Didto nga misulod na siya og banda. Mao kini ang “Playback Band”. Regular nga adunay gig si Zane ug dinhi na sab niya naila-ila ang iyang lifetime supporter nga si Bucks Bacalso kinsa kauban sab niya nga sakop sa banda.

Sa maong banda, hanas ang tingog ni Zane tungod kay nagkadaiyang genre ang ilang kantahon ug tukaron.

Matud pa ni Zane nga dinhi sab niya nakat-onan ang nagkaiyang estilo sa pagkanta mao nga pagsalmot niya og Sinulog Idol, mas kampante siya nga makapagawas ug mapakita niya ang iyang mga nakat-onan.

Napanglantawan sab ni Zane nga pinaagi sa Sinulog Idol, malimpyuhan ug mapaayo pa ang iyang mga nakat-unan nga estilo ug dakong kahigayunan na kini alang kaniya ang mahimong kabahin sa maong pamilya.

Dakong kalipay ni Zane nga usa siya napilian nga motigi karong tuiga.

“Dako na kaayo kini nga opportunity kay sa kadaghan nga ni-audition, naapil pa gyud ko. Kulba kaayo katong hapit mi mag team up sa akong manghod ug ang kondisyon kay kung mataktak akong manghod, mataktak sab ko”, saysay pa ni Zane.

Apil sab sa mi-audition ang iyang manghod nga si Stephanie apan si Zane ang nahatagan og kahigayunan nga masulod sa listahan.

Nagikan gyud si  Zane sa pamilya nga mahiligon kaayo sa pagkanta. Dili gyud makalimot si Zane kun diin siya nakat-on sa pagkanta.

Ang iyang apohan nga si Reber ug ang iyang amahan nga si Abring mao gyud ang nagtuklod kaniya nga mokanta  .

Gani, sa paghinumdom ni Zane, ang paagi sa iyang pagpraktis kaniadto mao ang pagamit og guba nga headset ug silhig lanot ug mag-imagine nga naa sila sa  music studio nagpraktis.

Dako gyud ang pagtuo sa amahan ni Zane nga layo ang maabtan sa iyang anak mao nga gibunyagan gyud si Zane sa mga singing contest.

“Dapit sa amo katong nag-singing contest unya gipaapil ko ni papa. Kani laging first timer ta kay wala rajud tay alamag ug wala ta kahibawo nga naa diay madawat nga premyo, wala ra sab gyud ko”, suma pa ni Zane.

Sa maong contest, wala nakadaog si Zane ug gipangutana niya ang iyang amahan kinsa ang nakadaog apan gibakanan lang siya niini nga siya ang midaog aron dili siya masakitan.

Gitataw ni Zane nga kun kahibalo pa lang siya nga wala siya makadaog, dawaton ra kini niya tungod kay matud pa niya, dili kanunay nga tam-is o madaugon ang masinati sa usa ka tawo apan aduna sab kini kasakit ug kapakyasan nga kinahanglan lang nga dawaton.

Nagmalipayon si Zane sa iyang naangkon nga kadaugan sa Sinulog Idol isip first runner- up  ug usa kini sa nahimong taytayan aron maabot pa ang mas daghan nga mga opurtunidad..

Sa tuig 2018, ang maingon ni Zane nga labing mabungahon nga tuig tungod kay nalakip siya sa usa ka national TV competition nga Tawag Ng Tanghalan.

Wala man siya midaog sa maong kompetisyon apan mapasalamaton siya nga usa siya sa nakatungtong ug nakapasundayag sa maong entablado nga makita sa tibuok kalibutan.

Gikalipay sab ni Zane nga daghan ang midayeg ug mipakpak sa iyang performance.

Tungod sa maong pagsalmot niya, inanay na nga mibangon si Zane ug nagsugod na sab siya og tigom alang sa iyang pagbalik og pagtungha ug padayon  sa pagsuporta sa iyang pamilya.

Malaumon si Zane nga kining tanan nga iyang ginabuhat karon, matugbangan kini og maayo nga mga bunga .