#GodWillFindAWay

CEBU, Philippines – “Mura’g 2015 to nga padung na unta ko mo-give-up sa pagka-photographer. Ibaligya na unta nako akong tanan gamit kay wala man koy nakita. But nakakita ko’g gi-share sa Facebook nga contest sa Naga. Akoang gi- grab, nisuway ko. Sa wala gyud damha, akong dakong kalipay kay nakadaog ko sa grand prize. After ato, sunod sunod na ang akong daog the same year. Dili gyud to nako makalimtan.”

Mao kini ang nagsilbing inspirasyon sa kinabuhi ni Ray Cañoneo nga taud- taud nang nahimong photographer sa dakbayan sa Sugbo.

Matud pa niya nga sa mga panahong gusto na natung tapuson ang tanan, kalit nga mopatigbabaw ang kaayo sa Labaw’ng Makagagahum.

Kun sa atong tawhanong pagtuo gitapos na sa walay maanindot nga bunga ang atong pagsakripisyo ug pagpaningkamot, dako kining sayup kun ang Diyos na maoy molihuk para kanato.

Sa kanunay, ang iyang pagbuot maoy mopatigbabaw ug kita nga tigsawo sa iyang grasya, way laing pagabuhatun kun dili ang paghuwat lang gyud sa saktong takna nga gigahin alang kanato.

Ang takna sa pagpasundayag ug pagpaila sa atong tinaguang hiyas sa kadaghanan.

Matud niya, miabot ang panahun kaniadto nga gusto na lamang siyang moundang sa pagpangodak sanglit nakita man niya kaniadto nga wala gayud siyay pag- asenso dinhi hangtud nga miabut ang daw sa usa ka milagrong panghitabo nga maoy nagpausab sa iyang panan-aw sa dagan sa iyang karera.

Ug tuod man sa iyang pagdaug iya sa usa ka kompetisyon, nabag- o ang plano niya sa iyang kinabuhi ug hangtud sa kasamtangang panahon nagpabilin ra gihapon siyang photographer.

“ ‘Naga Akong Garbo Landscape Competition’ to ang akong giapilan nga midaog ko. After ato, same year 2015, ni try ko og join sa ni follow nga contest sa Danao, Karansa Festival- Landscape category, then akong entries duha kabuok nisulod. First and 2nd prizes. After ato, December 2015, ni join ko sa contest sa Cebu Republic, Basura Asa Ka, then ako na pud ang nag-grand prize winner. Mao ni hinungdan nga medyo nakakuha ko og clients tungod aning mga contests ug hangtud karon nagpadayon pa ko,” dugang niyang pagpaambit.

Usa ka masscom graduate si Ray sa USJ-R ug nagsugod matud pa ang iyang paghigugma sa photography sa dihang usa ka adlaw niana aduna silay photo journalism class ubos sa iyang kanhi maestro nga si Victor Kintanar.

Hangtud nga natingala na lamang siya nga miabot ang mga adlaw, uban sa iyang pagkuyug-kuyug sab sa iyang mga amigo nga photographer, na inlove siya sa maong passion.

Tuig 2014 sa dihang nanarbaho siya isip usa ka call center agent ug sa dihang nakatigum-tigum na siya, miundang siya sa iyang trabaho dungan sa pagpalit og camera nga mao nay iyang gigamit sa pagfull time niyang photographer.

Sa paglabay sa mga panahon, ubay-ubay na sab ang mga nahimo na niyang mga kliyente.

Pipila sa di niya malimtan mao si Pia Marie Abejo, first batch contestant sa Sinulog Idol ug tua na nanimuyo sa Hong Kong  diin bag- o lamang gikasal dinhi sa Pilipinas.

Nahimo sab niyang kliyente dinhi ang magtiayong Lydia Stern ug Terren Hudson nga sikat nga mga photographers didto sa Colorado, U. S. A.

In-demand si Ray sa wedding photography ug matud niya, patok karon ang light and airy nga color grading sa shoots ug iyang namatikdan nga kasagaran karon sa mga bag-o nga styles sa pagpangodak, moody na ug dramatic ang color grading.

Mapasigarbuhong gipaambit ni Ray nga tungod sa iyang pagka-freelance photographer, nahatag niya ang nag unang mga panginahanglanon sa iyang pamilya labi na gayud sa iyang mga anak.

Giangkon niya nga mao kini ang nagbinugtong niyang source of income.

Apan gawas sa financial aspect nga gitabang niini kaniya, giangkon sab niya nga mapagawas niya ang tanan niyang gibati ug emosyon pinaagi sa pagpangodak.

Ug kun wedding ceremonies na ang hisgutan, dako ang iyang kalipay matag panahon nga magsud- ong siya sa mga katawa ug pahiyom sa managtiayon nga iyang giserbisyohan sa iyang pagpangodak.

“Dako kaayo ang akong pasalamat sa tanan nakong clients nga karon dili lang clients but nahimo na pud nako nga friends and ang uban family na gyud ang treat sa akoa. Kon wala mo, wala pud ko dri karon kon asa ko. Thankful kaayo ko especially sa katong mga couples nga aware nga bag- o pa ko nag-start sa business but nisalig jud sila nako sa walay pagduha-duha. I will never forget those times, and ako jud ni dala-dalaon for the rest of my life. Daghang salamat kaayo kaninyo.”

BNH: Unsa man ang labing dako nga challenge ang imong nasugatan isip usa ka photographer?

RAY: Every shoot is a challenge for me. I meet different kinds of people, personalities and cultures. That for me is a challenge. Para nako, dili lang ni basta- basta magshoot lang ka, dapat kahibalo ka mamati  or mo-feel sa imong clients, dapat kahibawo ka unsa ilang hilig, ilang kalipay, unsay makapaki-at nila, then imo e-apply para makita sa imong pictures.

BNH: Kinsa man ang imong inspirasyon sa imong pagka-photographer?

RAY: Na inspire ko sa mga wedding photographers sa gawas sa nasod. If mo tan-aw ko sa ilang work, makita man jud nako ang passion, and  an art nga ilang gusto e-portray. Wala pa ko diha nga level but ako paningkamutan maabot ko ana nga level sa akong pagka-photographer.