Carcar nanghakot og awards

CEBU, Philippines —  Si Nicole Borromeo miangkon nga mura siya’g naglutaw sa dihang gitawag ang iyang pangalan isip Sinulog Festival Queen karong tuiga gumikan kay dili pud basta-basta ang ubang finalists.

Suma pa niya nga dili sayon ang pagsalmot sa maong indigay tungod kay todo gyud ang ang ubang kandidata sa pagpakita pud og hugyaw nga abilidad sa pagsayaw ug pagrampa aron mahatagan og dungog ang ilahang lugar.

Apan wala siya nagpadala sa kulba gumikan sa todo nga pagdasig nga gihatag sa iyang grupo.

Usa sa iyang preparasyon mao ang hugot nga panalangin sa balaang bata sanglit mao gyud kini ang unang tip nga gihatag sa iyang grupo.

“Sometimes I end up thinking badly what if I am not good enough. I overthink a lot. I kept on praying and my prayers have been answered,” suma pa niya.

Si Borromeo kasamtangang nagtungha isip Senior High School student sa Cebu Doctors University .

Ang maong indigay nga nahitabo niadtong Biyernes sa gabii, January 18, gisugdan og usa ka production number sa mga kandidata nga mirampa sa engrande nga entablado sa Cebu City Sports Center.

Ubay-ubay gyud nga pasidungog ang nadawat ni Nicole, gumikan kay gawas sa titulong Sinulog Festival Queen 2019, naangkon usab niya ang special awards nga

Best in Production Presentation, Best in Group Presentation, Best in Festival Costume, ug Best Solo Performer.

Nalangkat usab niya ang awards nga Miss Sun, Miss Apple One Sinulog Festival Queen 2019, Miss Coca-Cola Taste the Feeling, Miss Skygo 2019, Miss Novellino Sinulog 2019, Miss Shell Advance, Miss Sky 2019, ug Miss Casino Ethyl Alcohol.

Ang korona karon nga gihuptan ni Borromeo sama gihapon sa miaging tuig nga gitawag og “Inang Dolly Crown.”

Sila si Orville Biongcog ug Brianna Alexis Gomez maoy nagmugna sa costume ni Borromeo.

Si Borromeo maoy mahimong pambato sa Sugbo sa Miss Millennial 2018 sa Eat Bulaga.

Si Sinulog Festival Queen 2018 Shaila Mae Rebortera maoy nakalangkat sa maong titulo sa miaging tuig.

Si Ciairha Jenyne M. Monsanto sa Tribu Malipayon sa Consolacion maoy first runner-up. Siya usab ang nakakuha sa special nga Miss Pioneer Adhesives 2019, Miss Flexi Finance Festival Queen Choice Award, Miss Juan Effect, ug Best in Instrumentation.

Nahimo usab nga second runner-up ang kandidata sa Talisay City nga si Phoene Godinez . Siya usab ang napili nga Miss Mega Tuna 2019, Miss PLDT, ug Miss Uratex.

Samtang si Saphire Doble Garton sa Tribu Kandaya / Daanbantayan maoy third runner-up ug nagtangag siya sa special award nga Mcdonald’s Festival Queen 2019.

Mikompleto sa listahan sa mananaog mao si Chloe Boton Boone sa Tribu Higaonon/ San Nicolas Proper ug siya ang fourth runner-up . Siya usab ang nakakuha sa award nga Mang Inasal Festival Queen.

Ang criteria sa paghukom naglangkob sa beauty and face (25 %), opening production (15 % ), group presentation (30%), solo presentation (20 percent), ug costume (10%).

Dili usab basta-basta ang mga hurado niini ug gilangkoban kini nila ni host sa Eat Bulaga nga si Ryan Agoncillo, Manager mananger sa Cebu City Sports Center nga si Ricky Ballesteros, grand winner sa Asia’s Next Top Model Cycle 5 ug EB talent nga si Maureen Wroblewitz, negosyante nga si Angie Louie, president sa Domo Production Theater nga si Woon Ki Hwang, artistic director sa Philippine Normal University Kislap Sining Troupe nga si Larry Gabao, artistic director sa Cultural Center of the Philippines nga si Chris Millado, executive director o sa National Commission for Culture and the Arts nga si Marichu Tellano, chairman sa National Commission for Culture and the Arts nga si Shirley Halili-Ctuz ug artistic director sa Ballet Philippines nga si Nestor Hardin.

Sila si Kris Tiffany Janson ug Jonathan Cimafranca maoy hosts sa maong kalihokan.