Abaquita, ang bag-ong Sinulog idol!

CEBU, Philippines — Nagmadaugon gyud ang 20- anyos nga usa sa mga pambato sa Dakbayan sa Talisay nga si Jessa May Abaquita sa ika-10  nga edisyon sa Sinulog Idol.

Si Abaquita ang nadungag   sa listahan sa mga nahimong kampyon sa maong sangka sa mga mang-aawit.  Nahitabo ang grand finals niadtong Huwebes sa gabii  didto sa Plaza Independencia.

“Sobra ko kalipay kay wala gyud ko nag-expect. Sa uban nga night na bottom jud ko pero karon, kay  nibawi jud ko”, padayag ni Abaquita. Sa ika-10 nga tuig sa maong sangka, midominar gyud ang katakos ni Abaquita sa pagkanta sukad pa nagsugod  ang audition.

Gipadayag sa Ultimate Coach nga si Jay Unchuan nga wala nagbase sa katapusang gabii  nga performance ang paghukom nila sa ilang pagpili sa mananaog karon.

“Choosing our Sinulog Idol this year is about how she/he  has grown since she came up from the audition and how she/he has been so consistent from the first night up until the last night of the competition”, suma pa ni Unchuan.

Dugang pa ni Unchuan nga nakita niya ni Abaquita ang mahimong Sinulog Idol human siya nakabatyag sa hugyaw nga  performances niini matag gabii sa Plaza Independencia.

“She is such a strong performer and pero the past six nights is wala kaayo siya mogawas sa iyang shell pero tonight nigawas gyud siya. She is a very good singer”, dugang pagsaysay pa ni Unchuan.

Gihimug-atan sab sa Banat News entertainment editor nga si Ryan Mark nga nakadestino sab gyud ni Abaquita ang maong dakong titulo.

“Tonight is really her night! Destiny gyud niya ba”, suma pa niya.

Gihulagway sab ni Ryan Mark nga limpyo sab gyud ang performance ni Abaquita ilabi na sa katapusang gabii sa kompetisyon.

“From the first round up to the Top 3, siya gyud ang pinakalimpyo og performance mao nga walay lalis”, matud pa niya.

Ang giawit ni Abaquita nga mao ang naghatod kaniya sa iyang kadaugan mao ang gipasikat ni Jeng Aguilar nga “Ikaw Lang Ang Mamahalin”.

Matud pa ni Abaquita sa kadaghan nga mga singing contest nga iyang nasalmutan ,ang maong piyesa ang matawag niya nga  winning piece mao nga gikalipay niya nga nadala niya ang  maong awit atol sa grand finals sa maong show.

Samtang laing duha ka mga naggikan sab sa Talisay City ang nanghawod  sa maong show.

Nakalangkat sa ikaduhang puwesto mao si Queen Suzanne Dugaduga, samtang ang ikatulong  ganti naangkon ni Vanessa Kaye Parame .

Giawit ni Queen Suzanne ang sikat kaayo sa mga singing contest, ang “I Am Changing”.

Mapasalamaton si Suzanne sa tanan nga nag-apong  kanunay sa kompetisyon aron nga suportahan siya ug ang iyang kaubanan nga contestants.

Gikalipay sab niya ang iyang pwesto kay maingon sab niya nga lig-on sab gyud ang iyang kaubanan sa kompetisyon ug ilabi na si Abaquita.

Si Vanessa sa  iyang bahin, dakong garbo na alang kaniya nga masulod sa Top 3 ug dili gyud niya kalimtan ang tanang tawo nga kanunay gyud mo-cheer kaniya sa kompetisyon.

Nahimutang sa ikaupat nga puwesto mao si  Rache May Parco , ikalima si Shim Dagatan , samtang ikaunom si James Alfafara .

Ang executive producer sa maong show nga si Gloria Villarojo nagpasalamat  sa  tanan nga miabag ug misuporta sa maong kalihukan matag gabii.

Padayag pa niya nga dili kabayran og dakong salapi ang iyang pag-amuma ug pagpalambo sa mga Sugbuanon nga adunay dako nga pagmahal sa pagkanta.

“Makita man nato ang produkto sa atong mga Sinulog Idols and they are everywhere right now. Compensation and financial wise kay always alkansi, but if your love in  nurturing talent is more victory nimo, sakto na kaayo na nga makatabang mi (Sinulog Idol) sa pag-develop sa mga talents sa bata”, panapos pa ni  Villarojo.