Tigi sa mga lig-on

CEBU, Philippines – Ang garbo sa Carcar City nga si James Alfafara mao ang nagmadaugon sa ikaunom nga eliminasyon sa Sinulog Idol Season 10. Ang tema sa maong gabii mao ang rock night kun diin ang tanang mga contender nipakita gyud sa ilang hugyaw nga abilidad sa maong klase sa awit.

Ang 19- anyos  nga gradwado gikan sa University of Cebu (METC) nikanta sa awit nga gipasikat ni Bamboo nga “Hallelujah”.

Wala damha ni Alfafara nga siya mao ang ituboy nga Star of the Night sa maong hugna  sanglit kahibalo siya kun unsa sab ka banggiitan ang ubang finalists  sa maong krusyal nga round.

Ingon nga si Alfafara mao ang adunay labing nagtakilid  nga kapalaran sa dagan sa kompetisyon gumikan kay nalakip kini sa Bottom 3 sa makatulo na nga higayon.

“Overwhelming kaayo. Kami tanan gusto gyud mi makadaog. And with the fact nga three times ko naapil sa bottom 3, least expected na gyud nako ang ma-Star Of The Night. Ang akong goal nalang gyud unta ato ang makaapil sa Grand Finals. Pero God is so good kay naa pa gyu’y gihatag nga bonus (star of the night)”, padayag pa ni Alfafara.

Bisan pa sa maong panghitabo, wala kini nakahatag og pagkadismaya ni Alfafara nga mosud-ong gihapon aron nga mahimong kabahin sa Top 6.

Gihimug-atan sab ni Alfafara nga mao na kini ang katapusan nga hugna nga pamatud-an niya— dili lang sa mga hurado apan sa tanan nga mga tawo— nga angayan siya sa gihatag nga kahigayunan nga malakip ug masulod sa Sinulog Idol.

Kauban ni Alfafara sa Top 6 sila si Shim Dagatan nga nagikan sa Danao City; Rache May Parco nga gikan sa Minglanilla; ug ang mga pambato sa Talisay City nga sila si Jessa May Abaquita, Queen Suzanne Dugaduga ug Vanessa Kaye Parame.

Ang unom mao ang nakalahutay sa unom ka gabii sa kompetisyon. Samtang ang registered medical technologist gikan sa Brgy. Guadalupe nga si Jake Keanu Batiancela ug ang coordinator sa usa ka consulting firm nga si Del Maica Papas mao ang wala mahatagi og maayo nga kapalaran nga makapadayon pa sa grand finals.

Esplikar pa sa  Pinoy Dream Academy Season 2 scholar nga si Apple Abarquez  kinsa mao ang resident judge sa Sinulog Idol sulod sa napulo na ka tuig,nakita niya paglambo sa mga contenders sukad pa niadtong panahon pa sa audition nga nahitabo niadtong Nobyembre 2018.

 “You all have shown a tremendous amount of growth and we are so proud of what you have got and of what you have become. Layo ra kaayo sa kung unsa ang nakit-an namo. The potentials have come out and there is more to explore even after the competition ends. And again, balik-balikon gyud ni nako nga ‘Once an Idol, always an Idol’,” pulong pa niya una pa niya nga gianunsyo ang Top 6.

Giangkon sab niya nga naglisod sab sila paghukom kun kinsa ang palaran nga makapadayon pa sa kompetisyon alang sa grand finals.

 “Lisod gyud siya kay as you look at the growth of everybody, the growth of individual singers for this season from auditions ‘til tonight, lisud siya in the sense nga lain-lain sila og level of growth”, suma pa ni Abarquez.

Gisaysay sab sa Ultimate Celebrity Coach nga si Jay Unchuan nga gisunod sab gyud sa mga contender ang ilang mga gipanulti  kalabot sa  maong kompetisyon  nga dili kini sama sa contest sa uban nga mahitabo lang sa usa lang ka gabii apan magsilbi kini nila nga training ground aron nga hingpit nga mahimong mamaayo nga performer sa industriya.

Alang sa Banat News entertainment editor Ryan Mark  nga mapasigarbuhon siya nga kun unsa ang naangkon karon sa mga umaabot nga mahimong idolo sa Cebu.