Vanessa miarangkada; Mike ug yad nanamilit

CEBU, Philippines – Lig-on gyud ang mga pambato nga nagikan sa Talisay City gumikan kay laing pambato gikan sa maong syudad ang mi-dominar sa Sinulog Idol Season 10 Tribute Night niadtong Martes.

Ang 19 anyos nga Mass Communication student nga si Vanessa Kaye Parame maoy napili nga  Star of the Night .

Gipakpakan sa mga tawo sa Plaza Independencia ang performance ni Parame kun diin giawit niya ang orihinal nga kanta ni Frank Sinatra nga “New York, New York”.

Giangkon ni Parame nga ang iyang hinigugma mao ang misugyot nga mao kini  iyang kantahon tungod kay haom kini sa iyang tingog.

Komento pa gikan sa Pinoy Dream Academy Season 2 scholar nga si Apple Abarquez nga maayo gyud nga story-teller si Parame.

“The beauty that you possess radiates inside and out and I’m sure that the people here in Plaza Independencia feel that your performance is nearly flawless but I cannot discount the fact that you really are a good story-teller”, pulong pa ni Abarquez ngadto kang Parame.

Gibutyag ni Parame nga pag-ampo ug dedikasyon ang iyang sekreto mao nga padayon gihapon siya nagmalig-on sa kompetisyon.

Gawas sa kadaugan ni Parame niadtong gabhiuna, nagmasulub-on sab ang tibuok nga mga finalist gumikan kay nataktak sa maong gabii sila si Mike Allaga ug Yad Jayme.

Giawit ni Jayme ang awit ni Freddie Mercury sa Queens nga “Bohemian Rhapsody” samtang giawit sab ni Allaga ang “Impossible Dream” nga gipasikat ni Luther Vandross.

Gitug-an sa Ultimate Celebrity Vocal Coach nga si Jay Unchuan nga lisod gyud nga  motagak og duha ka mga finalist niadtong gabhiona apan gikinahanglan na gyud tungod sa nagkaduol nga pagtapos niini nga mahitabo na karong gabii.

Matud pa ni Unchuan nga dili gyud malikayan  nga mahimong emosyonal kung dunay matagak.

Gitataw sab ni Unchuan nga sa teknikal ang tinubdan kun nganong nataktak na ang duha sa kompetisyon.

“Their performance was too technical and in every competition and in every song, dili man gyud na nimo matangtang ang fact nga naay ma-flat ug naay ma-sharp so for me diha lang gyud sila because I don’t really mind the notes kaayo pero lahi-lahi man sad gyud ang criteria for judging”, suma pa ni Unchuan.

Gipahibalo sab sa Banat News Hugyaw Editor nga si Ryan Mark Borinaga nga unom ra gyud ang angayan nga magsangka sa katapusang gabii sa kompetisyon  ug angayan atangan ang ilang mga performance.