Fantastica naka-P300M

CEBU, Philippines — Nagmaya og maayo si Vice Ganda gumikan sa kalampusan sa pelikula sa  2018 Metro Manila Film Festival nga  Fantastica.

Sa  Twitter post sa komedyanteng TV host, giingong nikita na ang among pelikula og kapin sa P300 million

“300Million THANK YOUS Madlang People kong mahal!!!! Panalo ang masaya!!! #Fantastica,” tweet pa niya.

Kauban ni Vice sa maong  Star Cinema movie mao sila si  Richard Gutierrez ug  Kapuso star  Dingdong Dantes.

Giatngan sa iyang fans nga kung makaapas ba ang Fantastica sa kita sa  pelikula niya sa miaging tuig nga  Gandarappido: The Revenger Squad nga nikita og P571million  sa kinatibuk-ang period sa MMFF.

Gipaabot nga mosaka pa og maayo ang kita sa Fantastica gumikan padayon kini nga gilinyahan sa mga sinehan karong panahona.

Mobalhin sa GMA?

Human kang Derek Ramsay , laing duha ka mga aktor ang gikatahong mobalhin sa GMA-7.

Gidungog nga mobalhin sa maong network ang Kapamilya stars nga sila si Richard Yap ug Xian Lim.

Wala pa nihatag og komento ang maong mga aktor kalabot sa niulbo nga report.

Matud pa nga dunay giandam nga big projects ang GMA -7 alang nila ni Xian ug Richard.

Dili pa lang dugay, nibalhin usab sa GMA ang kanhi Kapamilya actress nga si Kiray Celis.

Paukyab ni Angelica

Gipakilig og maayo ni Angelica Panganiban ang iyang fans gumikan sa iyang tweet  kalabot sa kasal.

Matud pa ni Angelica nga ganaan na siya nga magminyo karong tuiga.

“Gusto ko mag asawa this year. Parang ice cream lang hiningi ko eh noh?”, tweet pa niya.

Nakabaton kini og liboan ka “likes” ug mga  komento nga nipadayag og suporta sa makab-ot nga hukom sa aktres.

Una na nga gidungog nga nagkasinabtanay na sila si Angelica ug ang iyang ex-boyfriend nga si Carlo Aquino.

Nagsagunson ang ilang sweet photos sa Instagram

Cristine ug Xian suwayan

Magpares  sa umaabot nga pelikula  sa Viva  sila si  Xian Lim ug Cristine Reyes. Suma pa sa report nga ang kanhi mag-uyab nga  sila si Claudine Barretto ug Mark Anthony Fernandez unta ang mga bida niini apan duna kalit nga kausaban.

Wala pa’y  final title ang maong proyekto busa gitawag lang una kini og  The Georgia Film Project.

Ang direktor kaniadto sa  pelikulang  Kita Kita nga si  Sigrid Andrea Bernardo maoy direktor usab sa maong proyekto.

Gidungog usab kaniadto  nga si Derek Ramsay maoy ipares ni  Cristine sa The Georgia Film Project apan dunay kakulian.