Baby nina Alfred at Yasmine advance ng two weeks lumabas!

Congratulations sa mag-asawang Alfred at Yasmine Vargas dahil proud parents sila ni Alfredo Cristiano IV, ang kanilang bunso at nag-iisang anak na lalake na isinilang noong December 22, 2018 sa isang ospital sa Bonifacio Global City.

Napaaga ng two weeks ang pagluluwal ni Yasmine dahil sa susunod na buwan pa ang due date niya pero okey na rin ang nangyari dahil kasama na nila si Cristiano sa pagdiriwang ngayon ng Pasko.

Hindi lamang sina Alfred at Yasmine ang maligayang-maligaya dahil masaya rin ang kanilang mga anak na sina Alexandra at Aryana.

Pitong taon ang lumipas bago nasundan si Aryana pero sulit na sulit ang paghihintay nina Alfred at Yasmine dahil natupad ang ipinagdarasal nila na magkaroon ng baby boy.

Nagpapasalamat ang mag-asawa sa lahat ng mga nanalangin para sa safe delivery ni Yasmine at sa pagiging malusog ni Cristiano.

Lalong na-inspire si Alfred na magtrabaho dahil may baby boy na sila ni Yasmine.

Maraming fans ng MMFF hindi natakot sa ulan at traffic

Inulan ang Parade of Stars ng Metro Manila Film Festival 2018 sa Pa­rañaque City noong Linggo pero hindi naging dahilan ang masungit na panahon para huwag ituloy ang parade.

Nagpakabasa sa ulan ang fans na nag-abang sa kanilang mga favorite star na may pelikula na kasali sa MMFF.

Hindi lang ang fans ang nagsakripisyo dahil dedma rin sa ulan ang mga artista na touched na touched sa suporta at pagmamahal na natanggap nila.

Nakakaloka lang dahil hindi nasakyan ang mga float na lumubog sa malambot na lupa kaya hindi mapaandar.

‘Yan ang sinasabi ko na kapag ang forces of nature na ang kumilos, walang magagawa ang mga tao dahil nahirapan ang mga tauhan ng MMDA na i-ahon mula sa putikan ang mga lumubog na gulong.

Hindi nagpaapekto ang mga artista dahil nakaisip sila ng paraan, ang kanilang mga sariling sasakyan ang ginamit nila para hindi madismaya ang fans.

Inabot nang gabi ang Parade of Stars dahil sa ulan, trapik at makapal na bilang ng mga tao na hindi natakot na magkasakit, makita lang ang mga artista na hinahangaan nila.