Pagsagobang sa dagkong balud

CEBU, Philippines — Dul-an sa usa ka libo nga  pasahero ang namatay sa dihang nalunod  ang barkong “Aurora”.  Nagkatag ang mga patay sa baybayon sa  isla nga doul sa nahitaboan ug duna pa’y mga lawas ang wala pa gyud makaplagi. Ang mga pamilya sa mga nawala nga pasahero nanginahanglan og kaistaran samtang nagpadayon ang “search and rescue operation “ sa coast guard. Mao kini ang sitwasyong giatubang ni Anne Curtis sa pelikulang “Aurora”, ang official entry sa Metro Manila Film Festival 2018 sa  VIVA Films ug  ALIUD Entertainment.

Si Anne maoy nidala sa role nga Leana, tag-iya sa  seaside inn sa isla ug nag-atiman sa otso anyos niya nga igsoun nga si  Rita (Phoebe Villamor). Gihangyo siya sa pamilya sa mga  biktima nga pangitaon ang patay nga lawas sa ilang minahal sa kinabuhi ug makadawat siya og bayad.  Bisan paman sa gibating kahadlok, nisugot na lang si Leana gumikan kay nalouy siya sa pamilya sa  mga biktima sa nalunod nga barko.  

Gitabangan si Leana   sa kanhi niya boyfriend nga si Ricky (Marco Gumabao) ug sa  bangkero nga si Eddie (Alan Paule). 

Gisagobang nila  ang dako nga balud  sa  kadagatan. Maprotektahan kaha ni Leana ang iyang igsoun  kung molutaw na ang mga patay nga lawas?

Ang maong pelikula ubos sa direksyon ni Yam Laranas, ang respetadong direktor sa Sigaw (2004) nga nahimong Hollywood film nga The Echo (2008), The Road, ug  Abomination. Kauban usab si Gin de Mesa (All Souls’ Night), si Laranas usab ang nagsuwat sa “Aurora” ug usa sa mga producer niini.

Mao kini ang ikatulong  pelikula ni Anne karong tuiga human nagmalampuson ang  blockbuster hit nga Sid & Aya  (Not a Love Story) niadtong Mayo, ug sa  action thriller nga BuyBust niadtong  Agosto. 

Subling gidayeg ang aktres gumikan sa iyang determinasyon ug dedikasyon sa iyang  trabaho. Suma pa ni Direk Yam nga nibalibad gyud si  Anne nga hatagan siya og ka-double alang sa mga  underwater scenes kung diin kinahanglan siya magdugay og  30 segundos  hangtud sa  1 minuto niini. 

Alang usab kang Marco, usa ka dakong garbo alang kaniya nga makatrabaho si Anne nga gihulagway niya isip “sobrang bait, sobrang humble, easy to talk to and approachable.” 

Molugwa ang “Aurora” sa mga sinehan karong  Pasko, Disyembre 25.