Catriona nakadawat og masipang pakpak

CEBU, Philippines — Ni-standout gyud ang garbo sa Pilipinas nga si Catriona Gray sa Miss Universe 2018 preliminary competition nga nahitabo niadtong Huwebes sa gabii didto sa IMPACT Arena sa  Bangkok, Thailand.

Si Catriona maoy nakadawat og sipa kaayo nga pakpak gikan sa audience. Naglawig usab ang iyang pangalan sa nagkadaiyang social networking sites.

Sa opening segment, gisul-ob sa mga kandidata ang mga gown nga mugna ni  Sherri Hill.

Gisul-ob ni Catriona ang itom nga gown nga duna’y metallic embellishments.

Nag-trending usab  ang iyang “Lava Walk atol sa swimsuit round.

Gipanul-ob sa  94 ka mga kandidata ang mga swimsuit nga gidesinyo sa prinsesa sa Thailand nga si Sirivannavari Nariratana.

Swak kaayo kang Catriona ang hot pink one-piece swimsuit nga dunay cutouts.

Pag-abot sa evening gown competition, nisidlak og samot si Catriona uban sa iyang gown nga mugna sa Filipino fashion designer nga si  Mak Tumang.

Puros mga babaye ang naglangkob sa mga hurado sa maong indigay karong tuiga, kini naglangkob nila ni Filipino-American fashion designer Monique Lhuillier, Miss New Jersey USA 2004 ug Women’s March founder Janaye Ingram, Moroccan-American entrepreneur Iman Oubou, entrepreneur ug CEO sa CulturIntel ug CIEN + TV nga si Lili Gil Valetta, ug ang CEO sa Platinum Skies Aviation ug FinTech Casha ug Vice Chairperson sa  LCS Group of Companies nga si  Richelle Singson-Michael.

Nalakip usab sa listahan sa mga hurado mao sila si Miss Universe 1988 Bui Simon (Thailand)  ug  Miss Universe 1992 Michelle McLean (Namibia). 

Miss USA nag-sorry na!

Nangayo na og pasaylo  si Miss USA Sarah Rose Summers gumikan sa iyang lenggua kalabot kang  Miss Cambodia ug Miss Vietnam.

Kahinumdoman nga gi-bash og maayo si Miss USA  human nikatap ang video  kung diiin nilenggua  siya nga naglisod sa pag-istorya og English  si Miss Cambodia  ug nisulti pud siya nga nagpaaron-ingnon si Miss Vietnam nga hanas kaayo sa English.

“@MissUniverse is an opportunity for women from around the world to learn about each other’s cultures, life experiences, and views. We all come from different backgrounds and can grow alongside one another.  In a moment where I intended to admire the courage of a few of my sisters, I said something that I now realize can be perceived as not respectful, and I apologize,” suma pa sa IG post  ni  Miss USA.

Matud pa niya nga nakig-istorya na pud siya sa personal nila ni Miss Cambodia ug Miss Vietnam.

“My life, friendships, and career revolve around me being a compassionate and empathetic woman. I would never intend to hurt another. I am grateful for opportunities to speak with Nat, Miss Cambodia, and H’Hen, Miss Vietnam, directly about this experience. These are the moments that matter most to me,” dugang pa  niya..

SexBomb members nag-reunion

Human sa taas nga katuigan , nag-reunion ang mga sakop sa grupong SexBomb  pinaagi sa ilang Christmas party niadtong Huwebes sa gabii.

Gi-post sa Instagram sa  kanhi former SexBomb leader nga si Rochelle Pangilinan ang ilang mga hulagway kung diin makita nga nagbitbit sila  sa ilang mga anak.

“Thank you @niceprintphoto for capturing this first reunion/Christmas party of Sex bomb girls!!! Awwww!!!,” suma pa sa IG post ni Rochelle.

Ang maong grupo maoy nagpasikat sa awit nga  Di Ko Na Mapipigilan,  Bakit Papa? , Halukay Ube, Sphaghetti  Song,  ug Pretty Little Baby. 

Bag-ong paukyab ni Heart

Human nag-viral ang iyang “corned beef” OOTD (outfit of the day”) gipaukyab napud ni Heart Evangelista ang iyang fans pinaagi sa bag-o niya nga OOTD sa pagpalit og salted eggs.

Sa  Instagram video ni Heart, makita  nga gipangandaman gyud niya og maayo ang pagpalit og itlog.

 “So this is my outfit for today. I’m on my way to buy itlog na pula,” nagkatawa nga lenggua ni Heart.

Una na nga gikahimot-an sa iyang fans ang laing video sa miaging adlaw kung diin outfit kaayo siya samtang padulong mopalit og corned beef. 

Carla nagbangotan

Nagbangotan og maayo si Carla Abellana gumikan sa kamatayon sa iyang iro nga si Sunny. Nasayran nga hilig  kaayo ang aktres sa mga mananap hinungdan sakit kaayo sa iyang dughan ang pagkapanaw sa iyang iro. Tibouk adlaw nga naghilak ang aktres. “My heart is broken. My Sunny is gone,” suma pa sa iyang IG post.

Aubrey nanganak na

Gihimugso na ni  Aubrey Miles  kagahapon sa kadlawon ang ikaduhang anak nila ni Troy Montero.  Nanganak si  Aubrey sa St. Luke’s Medical Center – Global City.  Babaye ang gihimugso sa aktres.”Both are doing fine and now resting,” suma pa IG story ni Troy.

Hangyo ni Barbie

Nanawagan si  Barbie Imperial sa iyang fans nga dili  na lang i-bash ang aktor nga si JM de Guzman. Gusto ni Barbie nga dili na mokisaw og samot ang tsika nga matud pa nag-away silang duha.  Kahinumdoman nga naliki ang fans ni Barbie sa iyang Twitter post nga, “Young but not stupid”.

Mao diay

Busy ang TV host nga si Patricia Tumulak sa upcoming musical-drama series sa GMA-7 nga Inagaw Na Bituin hinungdan nga wala na siya kalugwa sa show ni Willie Revillame nga Wowowin. “I’m super forever grateful sa GMA kasi both sides na from hosting and acting, pinapa-try sa akin,” suma pa niya.

Julia bida sa Hilom

Dakong garbo alang kang Julia Montes nga nalakip siya sa advocacy  film nga  Hilom (Doctors to the Barrio). “Nung shinu-shoot ko ito, pinagdasal ko talaga na sana sa Pilipinas matutukan din ang marami pang bagay gaya ng health,” suma pa ni Julia.

Gihangop sa mga Pinoy

Niabot og P30 million ang  kita sa unang adlaw sa pagpasalida dinhi sa Pilipinas  ang Hollywood film nga Aquaman  niadtong Miyerkules. Nagpunsisok matud pa ang moviegoers busa gipaabot nga moburot og samot ang kita niini sa umaabot nga mga adlaw.

Nauyonan sa maguwang

Dakong uyon si  Angelika dela Cruz  ngadto sa Kapamilya actor nga si  Nash Aguas.  Ang maong aktor maoy  uyab sa manghod ni Angelika nga si Mika. Giingong nagkalig-on ang relasyon nila ni Nash ug Mika  bisan paman sa ka-busy sa tagsa-tagsa nila nga mga career..

Obserbasyon ni Direk

Base sa obserbasyon ni Direk Brillante Mendoza nga ang kita sa  pelikula maoy tumong sa Metro Manila Film Festival (MMFF). Kahinumdoman nga duna’y isyu si Direk Brillante kaniadto sa MMFF. “Ano ba ang objective nila? Magkaalaman na tayo. Hindi naman para magpakita ng magandang pelikula kundi para kumita,” mensahe pa niya nga namantala sa pep.ph.

Mobalik sa  pag-arte

Sa dili pa matapos ang 2018, gikatahong mopirma og kontrata si  Derek Ramsay sa  GMA-7. Matud pa nga andam na si Derek sa pag-arte og balik inigkatungtong sa 2019.  Kahinumdoman nga  taod-taod nga nahilom ang career ni Direk  sukad siya nanamilit sa  TV5.

Cristine ug Xian magpares

Malipayong gipahibalo ni Cristine Reyes nga magpares sila ni  Xian Lim sa usa ka pelkula. Si Sigrid Andrea Bernardo ang direktor niini kinsa maoy naghupot kaniadto sa pelikula nila ni Empoy Marquez ug Alessandra de Rossi nga Kita Kita. Katapusang pelikula ni Cristine mao ang Abay Babes. Samtang katapusang nilugwa si Xian sa pelikulang  Miss Granny.

Sikat gihapon

Kun motikang gani si Ryan Bang sa iyang yutang natawhan didto sa South Korea, himoon gyud siya nga guest sa pipila ka mga show sa telebisyon sa maong dapit. Malipayon kaayo si Ryan sa init nga mga paghangop nga iyang nadawat  gikan sa mga tawo nga nagpangga kaniya.

Malingaw  sa komento

Malingaw ra si Valeen Montenegro kun makadawat siya og mga komento kalabot sa pamorma sa iyang lawas.  Kun dunay  manaway,  duna pu’y modayeg nkaniya. Dili ra manumbaling si Valeen sa isulti sa mga tawo kalabot sa iyang lawas.