Nagbinayloay og wedding vows

CEBU, Philippines – Gikasal na niadtong Martes, Disyembre 11 ang celebrity couple nga sila si Aljur Abrenica ug Kylie Padilla didto sa Villa Milagros sa Rizal. Ang maong selebrasyon giingon nga kalit-kalit apan napangandaman pag-ayo.  Star-studded sab ang maong kasal ug wala sab gyud magpaulahi paghatag og update ang amahan niini nga si Robin Padilla sa iyang fans mahitungod sa pagbinayluay og wedding vow sa iyang anak ug sa kapikas niini nga si Aljur.

Pinoy, midaog sa EPC

Midaog sa Euro Pop Contest ang 17 anyos nga Pinoy nga si Jay Kent. Si Jay ang nahimong over-all champion sa maong kompetisyon nga didto nahitabo sa Berlin, Germany. Ang maong kadaugan ni Jay nagsilbi  nga dakong dungog sa atong nasud.

OOTD ni Heart

Trending karon sa social media ang video ni Heart Evangelista diin matud pa niya nga mao kadto ang iyang OOTD nga motikang sa grocery store aron nga mopalit og corned beef. Maingon nga komedya ra kadto niya apan nipatok kini tungod sa kabongga sa iyang gisul-ob aron lang mopalit og delata.

Kiray, na-scam

Gibutyag ni Kiray Celis nga na-scam siya sa iyang show didto sa Mintal, Davao niadtong miaging semana gumikan kay wala siya bayari sa miimbitar nga producer. Matud pa ni Kiray nga wala gyud kini mituman sa saad nga hikayon ang ilang pag-abot lakip na sa iyang mga kauban nga mga performer. Dugang pamahayag ni Kiray nga wala sab mabayari ang sound system ug bisan refund sa ticket sa ilang show, wala kini nabayluan tungod kay wala na mipatim-aw ang maong producer.

Tourism ambassador sa Japan

Gipaila-ila karon ang aktor ug komedyante nga si Empoy Marquez isip Tourism Ambassador sa Japan. Ang maong posisyon nga naangkon ni Empoy naggumikan kini sa pelikula nga ilang gibidahan ni Alessandra de Rossi nga “Kita Kita niadtong 2017.  Wala damha ni Empoy nga dako kini og mahatag nga impact ngadto sa Japanese community.

Gipakaon og sabon

Gikabuangan gyud ni Nico Bolzico ang iyang asawa nga si Solenn ug brother-in-law nga si Erwan Heussaff gumikan kay gipakaon niya sila og sabon. Ginaningan sab Nico ang iyang food presentation aron nga madani nga modawat sa iyang gihalad niini nga cheese kunuhay.

Gikilig sa pa-bouquet

Gikilig gyud ang mga nanan-aw sa pageant sa Pampanga niadtong miaging gabii gumikan kay personal gyud nga mitunol si Calvin Abueva sa bouquet ngadto kang Vice Ganda didto gyud mismo sa stage. Ang duha mitambong sa maong kalihukan isip guest.

Padayon ang pagpangandam

Nanghinaot si Olivia Lamasan nga unta mapagawas sa sunod tuig ang pelikula nga bidahan ni Liza Soberano nga “Darna”. Matud pa ni Olivia nga gitrabaho na sa bag-ong direktor niini nga si Jerrold Tarog ang script ug andam na sab kini nga sugdan ang pag-shoot niini kun matapos na ang mga gikinahangan nga andamon.

Gihalad ni Kuya Germs

Gihalad ni Ken Chan ang iyang star sa Walk of Fame ngadto sa iyang giila nga tatay sa industriya nga si Kuya Germs. Asoy pa ni Ken Chan nga gikomedyahan niya kaniadto si Kuya Germs og star apan miingon kini kaniya nga moabot ra ang tukmang panahon sa iyang gipangayo. Sa iyang Instagram post, mipadayag si Ken Chan sa iyang mensahe ngadto kang Kuya Germs atol sa iyang pagdawat sa iyang gipangayo nga star kaniadto. “Ngayon dumating na nga ang araw na nagkaroon na ako ng star. Wala ka naman Tatay, pero alam kong nakangiti at proud kang pinagmamasdan ako habang tinatanggap ko ang Star sa Walk of Fame. Sobrang saya ko ngayon,” mensahe pa ni Ken.

Magbase sa performance

Gianunsyo sa usa sa mga organizers sa Miss Universe nga walay online voting ug text votes competition karong tuiga. Ingon nga basehan ang kadaugan sa kandidata base sa performance niini sa dagan sa kompetisyon.