Naglisod og adjust

CEBU, Philippines – Gitug-an ni Kathryn Bernardo nga dako gyud ang kausaban sa iyang karera karon nga wala niya nakauban ang iyang kanunay nga leading man nga si Daniel Padilla sa pelikula nga “Three Words To Forever”. “Big, big adjustment for me. Hindi ko naman sasabihin na naging madali siya. Ang tagal, six or seven years kasama ko si DJ (Daniel). alam mo ‘yung kapag pupunta ka sa set ,’yung ‘di mo siya makikita. Weird, weird siya,” suma pa ni Kathryn.

Nanamilit og tarong

Nanamilit man ang direktor nga si Erik Matti sa pagahatag og direksyon sa pelikula nga Darna, nanghinaot sab ang bida niini nga si Liza Soberano nga unta makatrabaho niya ang direktor sa laing proyekto puhon. Gikalipay usab sa aktres nga personal gyud nga nangimbitar ang  direktor kaniya alang sa usa ka panihapon  aron pormal ang pagpanamilit niini sa  Darna. “I was really thankful because I don’t think a lot of people will do that. And I am just really thankful that I had the chance to work with him and I still want to finish a project with him so hopefully in the future if our schedule permits and there is a really good script that he wants to be directing, I really wouldn’t mind doing another film [with him],” suma pa ni Liza.

Nahibilin ang bagahe

Dako ang pasalamat ni Miss Supranational Philippines 2018 Jehza Hueler sa mga tawo nga mitabang kaniya ilabi na sa nagpahuwam kaniya og mga sapot human nga wala miabot sa Poland Airport ang iyang mga bagahe nga nahibilin pa sa London. Sa unom ka bagahe nga gidala sa kandidata gikan sa Pilipinas, lima pa kabuok ang miabot kaniya. Ang mga organizer sa maong indigay mao ang mihikutar aron makompleto ang mga bagahe niini.

Tigsuporta sa karon

Wala pa hibaw-i kun kanus-a magbalik og uban sila si Nadine Lustre ug James Reid sa usa ka proyekto. Tsika pa ni Nadine nga kasamtangang busy pa sab siya sa iyang karera kauban ang mga bag-ong leading man nga gipares ngadto kaniya. Dugang pa ni Nadine nga kalmado ra sab karon ang ilang relasyon ni James ug padayon siya nga gisuportahan niini sa dagan sa iyang karera.

Wala nagmahay

Gitataw ni  Rayver Cruz nga wala gyud siya masayop sa pagbalhin niya og TV network. Gikan sa ABS-CBN , nibalhin ang  aktor sa Kapuso network. Matud pa niya nga wala siya magmahay sa iyang desisyon nga mobalhin gumikan kay daghan ang mihangop kaniya nga mga aktor nga ganado nga makatrabaho siya.

Dugang kaso

Sa usa ka Instagram post ni Kris Aquino niadtong Huwebes, gipakita niya ang statement sa iyang legal council kabahin sa pagpasaka niya og dugang mga  mga kaso nga cyber libel batok kang Atty. Jesus Nicardo Falcis III kinsa mao ang igsuon sa iyang kanhi business partner nga si Nicko Falcis kinsa gipasakaan sab niya og 44 counts of qualified theft bag-uhay lang. Nunot kini sa pag-charge ni Falcis kaniya sa kantidad nga P1,270,980.31 nga personal expenses sa iyang corporate credit card.

The lion king

Trending karon sa social media ang trailer sa Disney movie nga misikat niadtong 1994 nga “The Lion King”. Gikatakda nga mapagawas ang maong salida sa sunod tuig.

Dakong bonus

Gikalipay pag-ayo ni Kris Bernal nga nakatrabaho na gyud niya ang iyang giidolo sa industriya nga si Rayver Cruz. Tug-an pa sa aktres nga crush niya ang aktor kaniadto. Makaingon siya nga dakong bonus  kini sa iyang career.

Nakanselar ang concert

Kanselado na ang The Weeknd Manila concert karong Disyembre 7 tungod kay aduna kini kakulian nga giatubang sa habig sa  produksyon. Daghang fans ang nadismaya tungod kay taud-taud na kini nga nagpaabot sa maong dakong adlaw sa The Weeknd. Magsugod ang pag-refund sa mga ticket karong Disyembre 4.

Gipadayon ang concert

Nagkahiusa kagahapon ang pamilya ug higala sa OPM Icon nga si anhing Rico J. Puno alang sa tribute concert. Gidayon gihapon ang konsyerto nga “Music and Laughter: Sana Tatlo Ang Puso Ko” nga mao unta ang come back concert ni Rico kauban sila si  Giselle ug Marissa Sanchez.