Balitang Bisdak, Madaugon!

CEBU, Philippines – Mapasigarbohong gipahibalo sa Vice President and Head sa Regional TV Department sa GMA Network Inc. nga si Oliver Amoroso nga walo ka semana nga madaugon ang  local news program nga Balitang Bisdak sa ratings game.

“For this year, I am happy to announce that GMA Regional TV's Balitang Bisdak has already registered 8 weekly and 47 episodic wins,”nagkanayon si Amoroso.

Ang ratings sa nakalabay nga duha ka semana matud pa nagpakita nga labaw og 1.1% ang Balitang Bisdak sa kaatbang niini.

Sa pakig-atubang ni Amoroso ngadto sa advertisers  ug sa mga sakop sa E-Group niadtong Sabado, gipadayag niya nga ang paghatud  og istorya nga gikanahanglan nga masayran sa publiko maoy nag -unang rason sa ilang kalampusan.

Dugang pa niya nga gipalawman og maayo sa Balitang Bisdak ang pagkutlo sa matag ugat sa nagkadaiyang isyu aron mapasabot kini sa publiko.

“Bisdak viewers clearly appreciated our efforts to deliver news and information that matter to the people of Cebu and key cities and provinces in Central and Eastern Visayas,” dugang pa niya.

Gipaneguro usab ni Amoroso  nga mga lig-ong anchors ug reporters ang molangkob sa ilang mga programa sa regional TV ug mao kini ang usa sa ilang mga asset.

Nakita niya kun unsa ka ka sensiro ang Balitang Bisdak personalities sa pagkugi og kuha og balita.

Kini naglangkob  nila  ni Bobby Nalzaro, Alan Pacional Domingo, Cecille Quibod Castro, Mai-mai Rondina, Reyn Nikko Sereno ug Chona C. Carreon.

Usa sa mga bag-ong pasidungog nga nalangkat sa Balitang Bisdak mao Anak TV Seal  2017.

Sa miaging semana,  nakaangkon usab kini og special citation for Best News Program sa 40th Catholic Mass Media Awards alang sa komprehensibo nga coverage sa burial ni Cebu Archbishop Emeritus Ricardo Cardinal Vidal.

Gipatigbabaw usab nila ang linya nga   ‘we walk the talk” uban sa tagline nga “Bugtong kasaligan, kasandigan ug kadangpan sa mga Bisaya.”

“We became the most trusted, dependable and reliable newscast of our Kapusong Bisaya through segments that spotlight concerns that require utmost attention or immediate action. Media, above all, is a public service” matud pa ni Amoroso.

Gilusad usab nila dili pa lang dugay ang #SpreadKindness campaign nga gihimong segment sa regional programs sa GMA.

Mao kini ang hugna kung diin i-feature nila ang mga ordinaryong tawo nga nakatabang sa ilang isigkatawo.

Isip pagsuporta sa Digitalization Agenda sa GMA , ilaha usab nga gilusad ang www.GMARegionalTV.com aron mapalapdan ang pagpasiatab sa kasikas sa regional areas.

“As we look ahead to another fruitful year in GMA Regional TV, all I can say is we're challenged and excited more than ever to sustain the momentum and to have our advertisers and partners continuously be an important part of our journey,” panapos pa ni Amoroso.

Samtang si Nalzaro sa iyang bahin, nipadayag sa iyang pasalamat ngadto sa suking viewers sa Balitang Bisdak gumikan kay mao kini ang rason nga niabot sila og 19 ka tuig sa kahanginan.

Wala usab niya pakyasa ang pagpasalamat sa advertisers gumikan kay mao kini ang nagbuhi sa programa.

Nipadayag usab si Cecile nga magpadayon usab ang paghatag nila og light news gumikan kay usa kini sa mga giatngan sa masa.

“Malingaw gyud ang  viewers kung dunay balita kabahin sa  trending nga mga pagkaon ug lugar ,” hirit ni Cecile.

Yassi nagbuhi og bitin

Mapasigarbohong gibutyag ni Yassi Pressman nga duna siya’y binuhi nga bitin.

Matud pa niya nga malingaw gyud siya sa pagsige og hagwa niini.

Sa iyang latest IG post, gipakita ni Yassi ang bitin niya nga ginganlan og Fluffy.

Naingganyo si Yassi sa pagbuhi og bitin human niya nasayran nga nagbuhi pud niini ang co-star niya sa Ang Probinsyano nga si Coco Martin.