#AlwaysGrateful

CEBU, Philippines – “Proud gyud kaayo kung mo -share sa tanan nga everyday thankful ko nga naka -meet ko sa tawong misalig nako ug mi -push nako arun mahimo ko’ng sinaligang make up artist diri sa Cebu. Niabut ang time nga bisag ako wala nay salig sa akong kaugalingun pero sila  sige’g remind nako nga may talent gyud ko sa pag make-up.”

Mao kini ang pagpaambit ni Pines Borden, usa sa giisip sa kadaghanan isip haligi sa industriya sa Sugbo kung pagpaanyag na maoy hisgutan.  Kapin na siya sa 25 ka tuig nga nahimong make up artist.

Pagbalik -lantaw niya, naglakaw lakaw lamang siya sa kadalanan sa dihang nasigpatan siya ni Roy Erwin Tizon ug Malayka Yamas, mga nabantog nga make- up artists ug designers sa Sugbo.

Pagkakita nila kaniya, diha-diha gihagad siya sa duha nga dalhun sa ilang panimalay aron magsilbi nila’ng assistant. Wala siya magdahum nga ang maong ordinaryong adlaw maoy mousab sa dagan sa iyang kinabuhi.

Sa kanunay niyang kuyug nilang Malayka ug Tizon, hinay -hinay na siyang nakat- on ug nakakuha sa technique sa pagpaanyag hangtud nga siya na mismo ang mi -handle sa pag -make up sa mga nagkadaiya nilang kliyente.

Nahimo sab siyang make up artist sa usa sa  mga longest running local variety show sa ABS-CBN Cebu nga  Sabado Na Gyud.

Sa paglabay sa panahon, dili na sab maihap nga celebrities ang miagi sa iyang pangamot sa pagpaanyag . Kini naglangkob nila ni Jericho Rosales, Piolo Pascual, Heart Evangelista ug uban pang mga lig ong artista sa kauluhan.

Ubay -ubay na sab nga mga award giving body ang miila sa iyang katakos isip dekalidad nga make up artist.  Apan ang dili niya malimtan mao ang iyang pagkamananaog sa Ricky Reyes Hair and Make- up Trends Competition niadtong tuig 1993 diin siya maoy migawas nga over- all champion sa commercial and bridal make up.

Sukad sa pag -angkon niya sa maong  kadaugan, left and right na nga bookings ang iyang naangkon hangtud sa kasamtangan. Ang maong higayun usab ang nakapasaka sa iyang moral arun mobilib sad sa iyang kaugalingun nga aduna gyud siyay linahi nga talento sa pagpaanyag.

Inspirasyon ni Pines mao ang iyang inahan nga masakiton  karon ug panghinaut niya, malugwayan pa ang kinabuhi niini arun makauban pa kini niya sa taas nga panahon.

Sa pagkakaron, kasagaran sa iyang kita ,ihapak niya sa mga tambal sa iyang inahan nga dunay cancer.

Gawas sa iyang pagka- funny person nga natural nga hiyas sa mga bayot, gusto sab niyang mahinumduman siya sa kadaghanan isip mapaubsanong make-up artist nga adunay dakong respito sa iyang mga kliyente.

Sa iyang pagpakabuhi niining kalibutana, di gyud siya makaingun nga usa na siya ka successful nga tawo sanglit aduna may higayun nga mabitad siya sa mga kakulian ug makahig sa dili matag-an nga mga sitwasyon.

Apan usa ra ang iyang nakat -onan niining tanan, kini mao ang mamapha kun matumba dungan sa pagbarog.

“Gihigugma gyud nako ang pag make-up tungod kay mao naman gyud ni ang akong kinabuhi para nako. Mao ni ang reason nganung nabuhi ko run. Salamat kaayo sa tanan nako nga mga customers ug sa tanang  mga tao nga andam permi nga mutabang nako,” panapos pa niya

BNH: Unsa man ang labing dako nga challenge ang imong nasugatan isip usa ka make-up artist?

PINES: Kanang lain ang panahon unya kinahanglan gyud ka mutabok maskin bagyo or unsa pa arun lang gyud maka -fullfill ka sa imu obligation nga mo-pagwapa sa bride or kandidata.

BNH: Gawas sa imong pagka make-up artist, unsa pay imong gikabisihan?

PINES: Mag assist ko sa mga mommies, (renowned designers sa Cebu), ug mag -execute usahay sa costumes ni Malayka Yamas.

BNH: Unsay dili nimo malimtan nga imong kasinatian isip usa ka make up artist?

PINES: Kanang humana ka’g make up sa bride ug entourage unya wala niabot ang groom.