Manulong Gyud og Contest
CEBU, Philippines – Certified Amatuerista gyud si Mommy Tiger. Ug kay natuyok naman niya ang mga kasikbit nga dapit sa Agusan, ug nagpunay na siya og daog, dili na siya paapilon pa og singing contest didto. Hinungdan nga nikuyog siya sa iyang iyaan dinhi sa Sugbo sa dad nga 22 anyos.
Dili malimtan ni Mommy Tiger ang iyang una nga contest nga iyang nasalmutan nga mao ang Battle of Champions sa Tungkop, Minglanilla.
“Gipangutana ko nila kung kamao ba ko moapil og battle of champion, ug niingon ko nga mao man na akong gipangita oy, paapila kaha ko ana”, sigon pa niya
Natuyok na sab niya ang nagkadaiyang istasyunan dinhi sa Sugbo nga adunay singing contest sama sa DyRC, DyLA, DyHP, DyRB ug uban pa.
Sa samang pangidaron, naminyo sab siya sa iyang bana. Nagbunga ang ilang pagminahalay ngadto sa tulo kabuok nga mga anak. Suma pa niya, nahimamat niya ang iyang bana kay mao kini niboluntaryo nga mupasakay niya sa gidrayban nga tricycle paingon sa mga contest nga iyang salmutan.
Giangkon ni Mommy Tiger sa interview nga dihang nagka edad na siya, didto siya giabot og pagmahay nganong wala gyud siya nitiwas og tungha.
“Sa mga nag-edad ko mga 30 kay nagmahay-mahay sad ko nga wa ko nahuman pero karon nga 50 nako niya naapil man ko’s The Clash kay wa nako nagmahay. Sus lipaya jud nako oy”, padayag pa niya.
- Latest
