Dili pa uwahi ang tanan
CEBU, Philippines – Muambak unta siya sa Mananga Bridge kaniadto gumikan sa kalisud sa ilang kinabuhi, apan nalamdagan siya sa Kahitas-an niadtong tungora. Daw gihunghungan siya pagduol sa mga tawo nga maoy mutabang niya sa iyang kalisdanan ilabi na sa aspeto nga pinansyal.
Tataw nga human sa pagsuway nga iyang gisagubang, inanay na nga gipabuhagay sa Labaw’ng Makagagahom ang mga grasya nga giandam alang kaniya. Ug kining tanan, pinaagi sa iyang talent sa pag-awit.
Mao kini ang istorya sa kinabuhi sa 50-anyos nga nahimong Top 12 Finalist sa The Clash nga si Esterlina Olmedo kinsa naila karon isip si Mommy Tiger.
Haom gyud nga tawgon isip Mommy Tiger si Esterlina gumikan kay wala gyud kini giatrasan nga mga kompetisyon ilabi na sa singing. Gani, mao kini ang manghagit sa mga kontra.
Gipabuhagay ni Mommy Tiger ang kaagi sa iyang kinabuhi pinaagi sa gilingkuran nila nga istoryahanay sa Banat News Entertainment Editor nga si Ryan Mark atol sa espesyal nga edition sa Facebook live session sa show nga MARKado sa Banat News Page niadtong Sabado sa hapon.
Istorya pa ni Mommy Tiger nga 6 anyos siya sa dihang nagsugod siya og apil og mga singing contest didto sa ilang dapit sa Nasipit, Agusan Del Norte, diin nalukop na siya og apil bisan asa nga contest.
“Gi-train ko sa akong papa kay ingon pa sa akong papa nga “ikaw murag naa man kay talent nga kamao jud ka nga mokanta, so praktison tika kay ikaw may lahi og nawong”, suma pa niya.
Matud pa ni Mommy Tiger nga suma pa sa iyang amahan nga sa ilang tanan nga unom ka managsuon siya ang dili itsuraan.
Ang katakus sa pagkanta ni Mommy Tiger mao ang rason nganong nilang tanang magsuon siya ra ang wala makatapos sa iyang pagtungha. Third year ra siya kutob sa kurso nga A.B English.
“Maamang man sad ko gamay kay moingon man akong classmate sauna nga naay contest unya P1000 ang premyo. Dako na kaayo na ang P1000 sauna”, storya pa niya.
Busa sa ngadto ngadto, napul-an gyud siya og eskuyla kay mas nagustuhan niya ang muapil og mga singing contest bisan asa.
- Latest
