#TalagsaongKamot

CEBU, Philippines — “Ingun akong tita who’s also my mentor nga dapat mag- create daw ko og something bold and out of this world makeup creations para mabantayan ug malahi ko sa uban. So ni come up ko og mga avant garde make-ups and from there, naka build naku og name sa industry dinhi sa Cebu.”

Mao kini ang labing gikutluan og inspirasyon ni Jomer Arances sa padayun niyang pagsaba saba sa make-up industry dinhi sa Sugbo.

Niabot na siya og 12 ka tuig sa iyang pagka- make-up artist ug kanunay’ng mupatigbabaw ang iyang pangalan kun fantasy ug out of this world make up na maoy hisgutan.

Dili sama sa ordinaryong mga make-up artist, mas mapuga pa ang pagka -creative ni Jomer sa panahong duwaan niya ang lain- laing color sa palette make up sa dagway sa iyang mga gipaanyag.

Ang mao niyang talento maoy nakadakop sa attention sa world-class designer nga si Cary Santiago.

Sanglit matud niya, aduna‘y higayun nga nagkauban silang Cary sa usa ka event ug sa pagkakita ni Cary sa iyang obra, giingnan matud siya nga nakuha gyud niya ang pagkulit sa nawong nga gusto niyang ipakulit sa iyang mga modelo.

Kini nahitabo human siya maoy nakapaanyag ni Danica Magpantay kansang nalakip sa Fords Top Model nga mirampa atol sa fashion show sa mga koleksyon sa mga biste ni Cary.

“Para nako, nakuha na gyud nako akong dakong break katong ginakuha nako sa mga ilado nga mga tawo sa Cebu to do their makeup ug katung magpa- makeup nako nga  pinaka prominent nga mga tawo sa society nga ganahan mu- try sa akong skills. Walay kabutangan sa kakulba gyud,” saysay pa niya.

Doble sab ang kalipay nga iyang gibati sa dihang nahimo siyang official make- up artist sa mga local show sa ABS-CBN Cebu nga mao ang Kapamilya Mas Winner Ka ug MagTV Na.

Ang maong kahigayunan maoy nakapa -ratsada sa iyang career sa pagpaanyag.

Gusto ni Jomer nga mahinumduman siya sa kadaghanan isip usa ka professional nga make- up artist kinsa moabut gyud sa tanang appointments on-time.

Nailhan sab siya sa kadaghanan nga mopahigayun og fresh look nga make up sa iyang mga nahimong bride.

Nahimo niyang inspirasyon niining tanan mao ang iyang inahan nga wala mu-uyon  kaniadto sa iyang pagka-make upa artist.

Apan ang pagsupak sa iyang inahan maoy gihuptan niyang armas ug hinagiban sa pagpaningkamot hangtud nga nahimo siyang usa ka malampusong make- up artist karon.

Dako sab ang iyang kalipay nga sa kasamtangang panahon, nakuha na niya ang 100 porsyento nga suporta sa iyang inahan gumikan kay nakasabot na kini kaniya sanglit mao man kini ang butang nga makapalipay kaniya.

Pagbalik lantaw ni Jomer, nagsugud ang iyang pangandoy nga mamahimong make-up artist sa dihang istudyante pa siya sa  Abellana Nationa School.  Sa usa ka cosmetology class sa iyang close friend, kanunay siyang molili niini hangtud nga nabantayan siya sa usa ka maestra nga aduna siyay dakong interest.

Hangtud nga miabot ang higayun nga kinahanglan sa ilang tunghaan nga adunay mo representar kanila alang sa usa ka skills competition, siya maoy gipadala ug nakigtigi sa lain pang mga tunghaan alang sa make- up category.

Gihashasan gyud siya og maayo sa training sa pagmake up sulod sa duha ka bulan hangtud nga hingpit na siyang naandam sa maong kompetisyon.

“Luckily ako ang nakadaog sa interschool competition. Maong ako na sad ang gipadala sa division then daug gihapon ko , also sa regional kay  rayna gihapon until sa national kay na- 6th ko among 36 competitors. Mao to ang sinugdanan sa akong journey as a makeup- artist,” suma pa niya.

Dili  sab siya kalimot sa higayun nga niadtung nigradwar siya sa high school, nakadawat siya og Plaque of Excellence award gikan sa kagamhanan  tungod sa dungog nga iyang gihatag sa iyang tunghaan pinaagi sa pag make-up.

Sa pagtungtung niya sa second year sa koliheyo, niundang siya sa pagtungha sanglit naay offer kaniya sa Manila nga siya maoy himoong in-house make-up artist sa usa ka sikat nga make up line brand.

Gidawat niya ang maong oportunidad sanglit dako man ang kita niya dinhi ug gikalipay sab kini niya og dako tungod kay nalibot sab niya ang halos tanang lugar sa Pilipinas tungod sa maong trabaho.

Hangtud miabot ang panahon nga nakahukom  siya nga mamahimo na lamang nga freelance make- up artist ug mobarug sa kaugalingon niyang paningkamot.

Sa maong higayon, nailhan siya sa mga tawo nga nagsilbing dagkong haligi sa industriya sa mga modelo ug designers dinhi sa Sugbo.

Sunod sunod na nga mga offer ang gidalit kaniya aron mohimo sila og mga kolaborasyon.

“Gusto nakong i-share sa tanan nga wala gyuy impossible kung maningkamot ka nga kab-uton ang imung mga pangandoy.

Hangtud karun dli ko makatuo nga naa na ko aning tanan nga naa naku karun. Gusto nakung i-highlight nga dli rason ang ka wad-on sa  pagkab-ot sa imong mga damgo,” panapos pa niya.