Romnick ug Harlene

CEBU, Philippines – Human sa 19 ka tuig nga kaminyuon, nagbuwag sa maayong kabubut-on sila si Romnick Sarmenta ug Harlene Bautista niadtong nilabay nga Huwebes.

Wala gidetalye sa nahisgutan ang rason nganong gituldokan na nila ang ilang kaminyuon, ug nihangyo nga respitohon sa publiko ang ilang kagustuhan nga ipabiling pribado ang panghitabo.

Adunay lima ka mga anak sila si Harlene ug Romnick.

Sa ilang official statement, gipahimug-atan sa duruha nga pabilin ang ilang respeto sa usa'g-usa ug wala silay laing panghinaot kundili mao nga magmalipayon ang masig ka habig sa ila nang pagsubay og managlahi nga mga dalan.

Giklaro sab nila, nga walay bisan kinsa nilang duha ang muluwat og detalye kabahin sa ilang panagbuwag ug ilang gibaoran ang ilang masig ka pamilya, mga suod nga higala ug ang mga tawo nga nagpalibot nila sa dili pagbuhat sa ingon.

Dili pa uyab!

Dili pa uyab sila si Kahlil Ramos ug Gabbi Garcia.

Kini suma pa mismo ni Gabbi sa exclusive interview sa pep.ph.

"Ay, wala pa naman po dun. Steady pa lang. We just go out.

"I’m taking my time din po kasi I have a lot on my plate right now.

"Basta I’m very happy. I’m very, very happy.

"I’m living a balanced life po when it comes to personal life, my family, my career, so everything is really on its place."

Suma pa niya, utokan si Khalil ug maayo og gawi, hinungdan nga ganahan siya niini.

“He’s a very intelligent man... very driven, and he’s a well-balanced person. He’s a very positive person.”

Si Gabbi, usa sa mga bida sa ‘Pamilya Roces” nga magsugod na karong Lunes sa GMA7 primetime.

Bahala’g second choice

Dili si Sophie Albert ang unang gipili aron mudala sa papel nga Amber sa teleserye sa GMA7 nga “Pamilya Roces” nga magsugod na karong Lunes puhon sa primetime.

Nasayran nga si Wynwyn Marquez gyud ang original choice alang sa maong role apan gibalibaran kini sa nahisgutan gumikan sa iyang mga responsibilidad isip Hispana Americana winner.

Apan, alang kang Sophie, dili isyu alang niya nga second choice lamang siya. Matud pa niya, walay mawagtang niya bisan ikapila pa siya nga choice.

Gani, alang niya, swerte pa gani siya kay siya gyud maoy nakakuha sa maong role nga giisip nga labing dako nga break sa iyang career.

Si Sophie maoy female winner sa Artista Academy, ang talent search sa TV5 kaniadto. Pagkawagtang sa mga entertainment show sa TV5, nisuway siya sa ABS-CBN, ug nakalugwa sa usa ka episode sa “Ipaglaban Mo”.

Niadtong tungora matud pa, wala pa siyay plano nga mupirma og network contract. Apan dihang gidala siya sa iyang manager sa nataran sa GMA-7 nabatyagan niya nga giganahan siya didto busa nipirma siya og kontrata.

Sa exclusive interview sa pep.ph, gibutyag ni Sophie nga nagsugod gyud siya sa ABS-CBN, isip membro sa Star Magic Batch 15. Kadungan niya sila si Bela Padilla, Jessy Mendiola ug Martin del Rosario. Nipirma siya og kontrata nga wala mahibawo ang iyang inahan.

Pagkahibawo sa iyang mommy, gipaundang siya kay buot niini nga mo-focus siya sa iyang pag-eskuyla.