Dili komportable

CEBU, Philippines – Tataw nga dili gyud komportable si Robi Dominggo nga makauban sa usa ka event ang iyang ex-girlfriend nga si Gretchen Ho. Ang duha bag-uhay lang nga nahimong hosts sa Mr. and Miss Chinatown nga nahitabo sa Mall of Asia Arena niadtong Domingo. Paghulagway pa ni Robi nga “awkward than expected” ang nahimong panag-uban nilang duha ni Gretchen sa entablado.

Mga pagsulay

Gisaysay ni Nikki Valdez nga miagi pa una siya og daghang pagsulay una pa nahitabo ang ilang kasal ni Luis Garcia sa Hongkong sa miaging buwan. Istorya pa sa aktres nga nagkasakit ang iyang anak nga si Olivia sa wala pa sila kalarga paingon sa Hongkong. Nadungagan pa sab kini sa dihang nakanselar ang mga flight sa NAIA. Mao nga nag-book na sab siya og balik apan ni-hang ang iyang cellphone ug gianam-anam na lamang niya og palarga ang iyang kabanay aron mahinayon lang ang ilang kasal. Matud pa ni Nikki nga miabot na sa punto nga misyagit na siya sa banyo tungod sa kapungot sa iyang mga  pagsulay nga naagian.

Kaduha nagbalik

Giangkon ni Angelica Panganiban nga makaduha ka higayon gyud diay sila nga nagkauyab sa aktor nga si Carlo Aquino . Matud pa niya nga bisan og nagbalik na sila apan wala gyud kini magdugay ug nagbuwag ra sab sila pagbalik. “Iyong pangalawang beses, hindi na siya sure. Di ba? Ano ba? Hindi na niya alam kung iyon ‘yung gusto niya, kung ito pa rin ba ang gusto niya”, pagrason ni Angelica mahitungod sa ilang panagbuwag.

Pasalamat sa bonus

Wala gyud kapugong ang Kapuso star nga si Rita Daniela nga mahimong emosyonal sa dihang gikahinabi siya sa 24 Oras mahitungod sa iyang role sa My Special Tatay. Matud pa ni Rita nga giampo gyud niya og maayo nga makaangkon pagbalik   og  serye sa Kapuso network. Dugang pa niya nga bonus gyud ang gihatag sa Ginoo kaniya gumikan kay dugay ra niya nga gihandum ang makaeksena ang aktor nga si Ken Chan.

Gitubag ni alex

Wala gyud palabya ni Alex Gonzaga nga tubagon ang usa ka netizen kinsa miingon nga dili kini motan-aw sa umaabot niya nga pelikula nga “Nakalimutan Ko Nang Kalimutan Ka” tungod kay nanimahong flop kini. Nasuta ni Alex nga ang maong netizen usa ka Kathniel fan. “Hi Kathniel fan, thank you for your comment about our movie, but I must rebuke your words. I’ll let God dictate what #NakalimutanKoNa outcome will be. Kumbaga sa Ex Battalion, Hayaan mo na sila,” tubag pa ni Alex.

Moundang sa pagpaninda

Gianunsyo sa sexy aktres nga si Mystica nga kasamtangang mohunong una siya sa pagtinda og fried chicken gumikan kay gahinan niya og oras ang pagbalik sa showbiz. Maingon nga natuman gyud ang pangandoy niini human nga bag-uhay lang nga nag-trending ang iyang video kun diin nanawagan siya ngadto kang Coco Martin nga unta hatagan siya og role sa  FPJ’s Ang Probinsyano.

Mr. Congeniality

Nakaangkon og Congeniality Award ang ig-agaw ni LJ Reyes nga si Robert Tanchip. Usa si Tanchip sa mga kandidato sa Mr. and Ms. Chinatown 2018. Matud pa niya nga kontento siya sa nakuhang award gumikan kay wala niya gihandum nga malangkat ang titulo nga Mr. Chinatown.

Kapamilya gihapon

Pasok ang Viva artist nga si Marco Gumabao sa umaabot nga drama series nga Precious Hearts Romances: Los Bastardos. Usa ka tuig nga nawala sa maong estasyon si Marco human nanamilit sa Star Magic. Makauban ni Marco sa maong serye sila si Jake Cuenca, Albie Casiño, Josh Colet, Diego Loyzaga, ug Ronaldo Valdez.

Second chance

Nagpasalamat gyud si Beauty Gonzales sa second chance nga makabalik sa showbiz. Matud pa ni Beauty nga nabalaka siya kaniadto nga matapos na ang iyang karera human nga nabuntis siya sa ilang anak sa iyang bana nga si Norman Crisologo. Karon nga nakapirma na siya og exclusive contract sa ABS-CBN, makaingon na gyud ang aktres nga dako gyud og pagsalig ang management sa iyang katakus. “I’m out of words, I don’t know how. Kasi this is my first love (acting). You know, I don’t know what else am I gonna do with life aside (from) this. Sa totoo lang”, suma pa sa aktres.