Kastigo

Gisakyan dayon sa mga kaatbang sa politika ni Mayor Tomas Osmeña ang nahitabong pagkastigo kaniya ni Presidente Rodrigo Duterte atol sa pagpakigpulong niini niadtong Huwebes didto sa dakbayan sa Mandaue.

Alang sa mga kaatbang sa mayor maisip nga dako nilang kadaugan ang kalagot sa presidente ngadto ni Osmeña. Tingali nagtuo sila nga ang kasuko ni Duterte ngadto ni Osmeña mahimo ni nga botos alang nila sa eleksiyon sunod tuig.

Tinuod dako nga factor sa eleksiyon ang suporta sa presidente. Apan sayop alang sa kampo nila ni kanhi mayor Michael Rama ug Bise Mayor Edgardo Labella nga mangangkon og kadaugan. Mamahimong ilang kapahimuslan sa moabot nga eleksiyon ang makinarya sa administrasyon apan dili ni garantiya sa kadaugan sa eleksiyon.

Ang lintunganay aron modaog og eleksiyon mao ang suporta sa publiko. Ang pangutana, human sa gihimo ni Duterte naibanan ba ang suporta sa mga molupyo sa dakbayan ngadto ni Osmeña? O ang mas importante nga pangutana duna bay kaugalingon nga mga dumadapig si Duterte dinhi sa Sugbo nga wala magpaluyo og lokal nga kandidato?

Kon atong lingion ang miaging eleksiyon, way klarong kandidato si Duterte dinhi sa dakbayan sa Sugbo niadtong 2016. Nidaog siya tungod sa mga tawo nga nakauyon sa iyang pamaagi sa kampanya ug sa mga nituo sa gipasalig niyang kausaban ug sa pagtabang sa mga dumadapig ni Osmeña.

Nahinumdom mo sa grupo nga Let’s DO it? Mga supporters to ni Osmeña nga wala niya pugngi nga mosuporta ni Duterte bisan didto siya mipaluyo ni Mar Roxas.

Tungod kay mga supporters man sab ni Osmeña ang nakapadaog ni Duterte dinhi sa dakbayan sa Sugbo imposible ni nga mopaluyo ni Labella ug Rama tungod lang kay nasuko na si Duterte sa mayor. Way supporters ni Rama nga nitabang ni Duterte atol sa 2016 elections tungod kay didto sila mopaluyo ni kanhi bise presidente Jejomar Binay.

Sa akong tan-aw di sab makatabang sa politikanhong tinguha nila ni Rama ang ilang gihimong pagbugal-bugal sa kahimtang sa panglawas ni Osmeña. Ang mga post diha sa social media nga nagtawag sa mayor nga “walking arenola” makakuha hinoon sa simpatiya sa publiko. Gani daghan sa mga netizens ang misugod na sa pagpadangat sa ilang simpatiya pinaagi sa paglusad og social media campaign.