Komportable sa usa’g-usa

CEBU, Philippines – Nahimuot pag-ayo si Rhian Ramos ngadto kang JM de Guzman gumikan kay dili lisod katrabaho bisan pa man nga una pa nilang higayon nga nag-uban sa usa ka proyekto. Nagpares ang duha sa pelikulang Kung Paano Siya Nawala ubos sa  TBA Studios. Sa unang adlaw sa shooting, komportable ra sila  si Rhian ug JM sa usa’g-usa.

Depende lang

Tsika pa ni  Gretchen Ho nga dili siya gusto mausik ang iyang oras busa dili na siya mo-entertain sa mga dili niya type nga tawo nga modiskarte kaniya.    Una na   nga gibutyag niya nga andam na siya mosulod og balik sa usa ka relasyon apan nagdepende ra gyud kini sa  iyang mauyonan. Si Robi Domingo maoy katapusang nauyab ni Gretchen.

Gitun-an gyud

Nitambong gyud og seminar  ug  nipaubos og mga workshop  si Xian Lim sa wala pa siya mosulod pagka-direktor.   Matud pa niya nga nalingaw ra siya sa maong trabaho.   Gitataw hinuon ni Xian nga dili niya biyaan ang pag-arte.

Naglikay malason

Dili ganahan si Myrtle Sarrosa nga malason ang iyang lovelife  hinungdan dili gyud siya mohatag og lapad nga detalye kalabot niini kung duna’y mo-interview kaniya. Nasayran nga dili taga showbiz ang inspirasyon karon sa aktres.

Nagpatabang kang Coco

Emosyonal ang kanhi sexy performer nga si Mystica nga nangayo og tabang kang Coco Martin aron mahatagan siya og trabaho. Gusto ni Mystica nga malakip sa serye nga Ang Probinsyano. Kahinumdoman nga hagbay ra nga nahupas ang career ni Mystica.

Todo invest

Gusto ni Kakai Bautista nga makita niya ang  iyang hinagoan sa showbiz hinungdan nga nipalit gyud siya og kaugalingon niya nga balay. Nag-invest usab siya og mga negosyo. Gipahimuslan sa komedyanteng aktres ang panahon samtang naa pa siya’y showbiz projects.

Nasuko sa spoilers

Wala mahimuot  si Karla Estrada  sa spoilers sa pelikula nila ni Daniel Padilla nga The Hows of Us.  Matud pa niya nga dili angayan hatagan og pagtagad ang spoilers aron dili mausik ang hinagoan sa mga tawong  nalakip sa maong pelikula.

Nagpasalamat ang writer

Todo pasalamat  ang writer nga si  Kevin Kwan ngadto sa mga Pinoy nga nihatag og suporta sa pelikulang’Crazy Rich Asians’.  Matud  pa ni Kevin nga grabe ang iyang pagmaya sa dihang nasayran niya nga gihangop sa mga Pinoy ang maong pelikula.

Birthday surprise

Natandog ang singer-songwriter nga si Ogie Alcasid sa sweet birthday surprise ni Vice Ganda alang kaniya. Lakip sa nipadangat og surprisa sa singer ang mga kaubanan niya sa  “It’s Showtime” ug “Your Face Sounds Familiar Kids.” Todo adlib ang asawa niya si Regine Velasquez aron dili gyud kini makabantay sa maong mugna.

Moabot ra

Tsika pa ni  Robi Domingo nga wala gyud niya damha nga moabot lang og kalit sa iyang kinabuhi ang non-showbiz girl nga maoy nagpapitik karon sa iyang kasing-kasing. Matud pa sa TV host nga dili gyud diay angayan huwaton ang espesyal nga tawo sanglit moabot ra kini og kalit  sa kinabuhi sa usa ka tawo.

Paresan og komedyante

Ang komedyante nga si Pepe Herrera ang leading man ni Ritz Azul sa pelikulang “The Hopeful Romantic” sa Regal Entertainment. Si  Tope Lee ang direktor sa maong movie project nga mosikad na sa mga sinehan karong September 12.