Istoryahe!

CEBU, Philippines – Nasigpatan na usab sila si Gabbi Garcia ug Khalil Ramos nga nag-date sa miaging gabii.  Nagsagunson usab ang ilang pag-post sa ilang sweet photos sa Instagram hinungdan kataw-an ra sila permi sa ilang lenggua nga dili sila uyab.

Gipasalida gihapon

Gumikan sa hangyo sa publiko, duna’y pipila ka mga sinehan ang nipasalida og balik  sa pelikula ni Anne Curtis nga BuyBust.   Mapasalamaton si Anne sa mga tawo nga nipadayag sa ilang  mga  positibong feedback   nga maoy hinungdan nga nagdugay kini sa mga sinehan.

Lima ka tuig na

Lima ka tuig na diay ang relasyon nila ni Daniel Padilla ug Kathryn Bernardo.  Bag-ohay lang kini giangkon sa duha apan hagbay ra nasayod ang kadaghanan sa ilang relasyon.  Ang ilang pagkamasinabtanon sa usa’g-usa  maoy lamas nga nagdugay gyud ang ilang  relasyon.

Follow-up project dayon

Gumikan sa kalampusan  sa pelikula ni Vhong Navarro  nga  Unli Life, gikatahong hatagan dayon og follow-up project ang aktor.  Nag-victory party sa miaging gabii ang cast ug crew sa maong pelikula .

Nabuhong sa proyekto

Dili gyud mabangbang ang TV projects  ni  Alice Dixson . Gawas sa Ang Probinsyano,  naa pud diay siya sa serye nila ni Julia Barretto ug Joshua Garcia nga Ngayon At Kailanman.

Barbie ug JM uyab?

Naliki si  Meg Imperial  sa sugyot sa usa niya ka follower nga unta magkadayon sila ni  JM de Guzman.  Suma pa ni Meg nga duna na’y Barbie Imperial si JM busa dili angayang  ilambigit siya  sa aktor.    Nisamot ang mga pagduda nga duna na gyu’y relasyon sila si JM ug Barbie sa tinuod nga kinabuhi.

Dream car

Gumikan sa  igong pagkugi,  napalit na gyud ni  Sanya Lopez ang iyang  dream car nga  Ford Everest.  Nasayran nga nagsagunson ang mga proyekto ni  Sanya sa  GMA-7. “Halos lahat ng pupuntahan mo kailangan mo ng car. So ako, nag-invest talaga din ako,” tsika pa niya ngadto sa PEP.

Nagbuwag?

Gidungog nga nagtakilid  ang relasyon nila ni  Kiana Valenciano ug  Sam Concepcion.   Wala pa mohatag og tubag kalabot sa maong taho ang duha ka kampo.

Dili interesado sa politika

Duna’y mga higala si Ogie Alcasid ang nihangyo kaniya nga padaganon siya sa usa ka posisyon sa gobyerno  sa  umaabot nga 2019 election.  Matud pa ni Ogie nga wala gyud mosantop sa iyang hunahuna nga mosulod siya sa maong butang.

Buhatunon ni Direk

Sa dili pa hingpit nga moretiro, duna pa’y pipila ka mga  pelikula ang pagabuhaton ni  Direk Cathy Garcia-Molina.  Siya ang  direktor sa pelikulang The Hows of Us  nga gibidahan nila ni Kathryn Bernardo ug Daniel Padilla.  Siya usab ang gipahupot sa pelikula nila ni Sharon Cuneta ug Richard Gomez nga “Three Words To Forever”.   Target usab niya ang laing pelikula  nga pagabidahan ni Piolo Pascual.  Bukas usab siya sa posibilidad nga makatrabaho sila si James Reid ug Nadine Lustre.