Dili pa magminyo

CEBU, Philippines — Giklaro sa beauty-queen/actress nga si Wynwyn Marquez nga dili matud pa siya musanong ngadto sa iyang uyab nga si Mark Herras kon ugaling hagdon na siya niini og kasal. Nakahisgot man gud si Mark niining bag-o lang nga ganahan na siya magminyo. Matud ni Wynwyn, three years ang iyang kontrata sa GMA7, ug karon lang matud pa magsugod gyud ang nindot nga dagan sa iyang career busa kini una maoy bubuan niya sa iyang atensyon.

Ambitious movie

Gibutyag ni Piolo Pascual nga P50 million ang budget sa iyang umaabot nga pelikula nga mag-ulohan og “Children of the Lake” nga adto sa Marawi, City himuon. Makauban niya sila si Jessy Mendiola ug Robin Padilla. Puros sila mga sundawo dinhi. Matud ni Piolo, ambisyoso ang maong pelikula diin usa siya sa mga producers.

Pakpak para kang Moira

Nauyonan og maayo sa netizens ang version ni Moira dela Torre sa awit nga “ Kahit Maputi Na Ang Buhok Ko” nga maoy theme song sa umaabot nga “Kathniel” movie, “The Hows of Us ubos sa Star Cinema. Hapit na isalida ang maong pelikula nga gibituonan nila ni Daniel Padilla ug Kathryn Bernardo.

Claudine-Piolo movie

Andam si Piolo Pascual nga makauban si Claudine Barretto sa usa ka pelikula. Suma pa niya dako kaayo og natabang kaniya si Claudine ug nga hangtud sa hangtud na kini niya tan-awon isip utang kabubut-on. Pero wala matud pay gisulti ang management unsay sunod niyang project human sa teleseryeng “Since I Found You” nga matapos na sunod semana.

Nasakitan sa pangutana

Gisukmatan gyud ni Bela Padilla ang usa ka entertainment editor atol sa presscon sa iyang latest movie “ A Day After Valentines,” nga nasakitan gyud siya sa mga personal na kaayo nga pangutana nga gibato niini ngadto kaniya atol sa lain usab nga presscon. Suma pa ni Bela nga gusto man gyud unta siya nga ang pangutana may labot sa okasyon nga gitambongan ug dili personal. Apan bisan pa man, naningkamot gyud matud pa siya pagtubag sa tanang pangutana.