Pakpak para kang Zeus

CEBU, Philippines – Kakulba inubanan  sa  nagtakilid nga panghunahuna apan ang tanan  nahatagan ra gyud og tam-is nga  ending.

Mao kini ang sitwasyon nga nahiagoman  sa miaging semana sa  usa sa mga nag-unang talents supplier sa Sugbo nga si  Aida Patana sa M-Talents Events & Promotions.

Namugnaw na ang singot  ni Patana sa dihang  nadelatar og maayo ang Kapamilya star nga si Zeus Collins alang sa usa ka event sa business process outsourcing company nga mao ang SYKES.

Alas dos pa sa hapon niadtong Biyernes  ang schedule sa pag-abot  ni  Zeus sa Sugbo   apan naabot na kini sa ala una sa kadlawon pagkasunod adlaw niana.

Matud pa ni Ms. Aida nga nadelatar ang biyahe sa aktor  tungod sa grabeng pag-ulan didto sa kaulohan niadtong higayona.

“Nagbaha gyud og maayo didto sa Manila.  Wala nako kasabot sa akong gibati, kay sige na og follow-up ang akong kliyente. Kay dapat unta, alas otso sa gabii, kay mo-perform na si Zeus. Bugnaw na gyud ang akong singot, dili lalim ang kulba niadtong orasa. Pero nakasabot ra sad ko sa habig ni Zeus kay paet sad iyang nahiagoman kay whole day pud siya na-stranded didto sa airport,” suma pa ni Ms. Aida.

Nangayo gyud si Ms. Aida og video ug hulagway sa kahimtang ni Zeus sa airport ug gipadala niya ngadto sa kliyente.

Gitakda gyud unta nga alas dos sa hapon muabot sa Sugbo si Zeus, apan gumikan sa hilabihang baha, ala una sa buntag na siya nakalusot.

Bisan pa man niini gihangop gihapon siya sa mga tawo ug grabe ang pag-abiba niini ngadto sa aktor.

“Bilib kay ko ni Zeus, kay bisan sa naluya na siya sa biyahe, energetic gihapon kay siya sa iyang pag-perform maong lipay kaayo ang mga tawo niya. Didto na gud siya nag-ilis sa van, kay wala na juy oras, kay  inig 2:40 am, kay flight na man pud niya pabalik sa Manila. Salamat  kaayo Lord kay nakaabot gyud siya sa iyang flight,” matud pa niya.

Igo lang mi-perform og tulo ka kanta dalang sayaw si Zeus ug nibalik na dayon kini sa airport.

Nagpasalamat usab si Ms. Aida sa iyang kliyente kay nakasabot ra gyud kini sa iyang sitwasyon, ug nalipay usab kini sa paghatag og kalingawan ni Zeus ngadto sa mga tawo.

Sa pangutana kung unsa nga leksyon nga iyang nakat-onan sa maong hitabo,  si Aida nagkanayon: “ Kinahanglan nga  mokuha na gyud ko og sayo nga flight para sa mga artista. Pananglitan kung gabii ang ilang show, dapat sayo sa buntag, nana sila sa Cebu.”