Labing Ngiob Nga Yugto

CEBU, Philippines — Daw namarog ang mga balahibo ni Tekla sa iyang gibati kun diin usa na siya sa mga atngan sa usa ka serye tungod kay mabalik tan-aw niya nga unsa siya ka uyamot ug anaa sa labing ubos nga klase sa tawo sa dihang wala pa siya makasulod sa showbiz.

Gani, nabalik-ta-aw ni Tekla ang iyang mga kaagi una siya nga katikang sa buhatan sa GMA kaniadto.

“Daghan kaayo ko og struggle pag-adto nako og Manila. Niadto ko og Manila nga wala ko kahibawo kung unsa ang akong adtuon. High school pa lang ko ato nga nisakay ko og barko kauban sa mga Badjao. Linawig ko ang North Cotabato, 5 days paingon didto tungod kay gusto lang ko nga makaabot sa maong lugar”, asoy  pa ni Tekla.

Matud pa niya nga klase-klase sa trabaho ang iyang nasudlan pag-abot niya didto. Tungod sab nga nakaangkon na siya og higala didto, didto na sab siya nga nakasulod og trabaho sa comedy bar isip live entertainer.

“Nakasud ko og comedy bar tungod sa akong mga nakaila kay nagbar-hopping kami didto. Gipakanta man ko nila sa stage. Pag-akyat ko nga stage, dun yun na feel ko yung moment na yun na na-belong ko”, suma pa niya.

Bisan og maayo na ang dagan sa iyang trabaho sa comedy bar, matud pa ni Tekla nga didto sab nagsugod ang labing dako nga pagsuway nga miabot sa iyang kinabuhi.

“Yun yung time na darkest gyud akong life ato kasi na-hook ako sa bisyo. Syempre napagdaanan ko lahat yun. Nagbulag sab mi sa akong asawa ato. Nagkaroon ako nga depression. Di ko siya kinaya kaya napunta siya sa pagbisyo. Di ko siya na-handle nga maayo kaya ganun, worst na pala. Wala akong mapuntahan,” matud pa niya.

Tungod kay wala na gyuy igo nga direksyon ang iyang kinabuhi niadtong mga panahuna, gawas nga sa kalsada na lamang siya nga natulog, wala gihapon siya mawad-i sa iyang gamay nga paglaum nga makalingkawas ra siya sa maong kalisdanan.

“Nigunit lang gyud ko. Nagtuo man gihapon ko nga naa siya”, pulong pa niya.

Tuod man, sa iyang pagsalig ug pagtuo, miabot gyud ang milagro nga wala gyud niya damha nga mahitabo ngadto kaniya.

“Sa akong ka imperfect. Sa akong mga sayop nga nabuhat, buotan gyud kaayo ang Ginoo sa akoa nga hatagan pa ko niya og chance nga mag-usab kasi may isang tao na naniwala sa’kin”, dugang pa sa komedyanteng aktor.

Gibutyag niya nga ang iyang kauban sa comedy bar nga si Donita Nose mao ang nagpasulod kaniya sa Wowowin.

“Nakaabot ko sa show ni Willie kay miraculous kaayo to siya. Dili ko magtuo nga usa ko sa manghatag og kalingawan didto kay dili ko artistahon og nawong man pareho sa akong mga kauban”, tug-an pa ni Tekla.

Apan gipasigarbo ni Tekla nga bisan og dili gyud niya destinasyon kaniadto ang pag-artista, naningkamot gihapon siya nga mapakita niya kun unsa ang mahimo niya nga mabuhat aron makahatag lang og kalingawan ngadto sa kadaghanan.

Gitug-an niya nga lalaki gyud siya ug sa telebisyon lang gyud niya nga mahimo ang mousab sa iyang pisikal nga postura.

Bisan pa man og makita siya sa iyang anak nga magbinabaye og postura apan gipasabot kini niya kun ngano nga ginabuhat kini niya nga matang sa trabaho.

“Ginagiingon nakon sa iyaha nga ‘Nak, nag-ingon ani si Daddy aron naa kay gatas”, suma pa niya.

Karon, padayon gihapon si Tekla sa maayong dagan sa kinabuhi ug nanghinaot siya nga iampo siya sa tanan aron molahutay siya sa industriya.

Katapusan sa duha ka bahin