“Word of Honor”

Okay, sumpay ni’s atong gihisgutan sa nilabay nga Domingo. Katong about mamaligya gyud ta ba bisa’g unsa aron adunay musulod nga kwarta sa atong panudlanan bisan gamay lang. Unya manghangyo ta sa atong mga higala nga naay mga produkto nga mubaligya ta unya ato lang patungan og gamay kay wala man tay pang capital. Mao gyud na atong angayang buhaton sa kalisod na sa panahon karon. Pakkk!

Unya kon ang atong mga higala musanong sa atong hangyo, angayan nga ato gyung barugan atong mga pulong. Ato gyung tinud-on atong saad. Kon musaad ta nga mubayad ta sa produkto nga atong gipaginansyahan og gamay, ato gyud na’ng tumanon. Kay gisaligan na baya ta ana sa atong kaila. Gitabangan ta nga makasapi bisa’g gamay nga laway lang atong puhunan. So kon muingon ta nga sa sunod ugma nato ihatag ang bayad sa atong gikuha nga produkto niya, ato gyud nang tumanon. Kay lisud man kon ato siyang unya-unyaon, dili na ta ka usab og hangyo sa ngadto-ngadto. Lisud ra ba gyud kon ang pagsalig na maoy maguba. Pakkk!

Sa ginagmay’ng negosyo, kita ra sab gyung mga gagmay’ng negosyante ang magtinabangay ug magsinabtanay. Ato gyud na’ng ampingan ang atong relasyon sa atong mga supplier. Ug kamo sab nga mga supplier, inyo sab gyud na’ng amumahon ang inyong relasyon sa inyong mga reseller. Kon ma delatar ta pagbayad sa atong gikuha nga stock, dear resellers, ato lang sab gyud nga hangyuon atong supplier, atong pasabton og maayo. Naturalmente, musaad na sab gyud ta ana og petsa or adlaw nga mabayran nato atong tulubagon. Unya ato gyud nang tinud-on atong saad. Dili nato unya-unyaon aron walay mga kabubut-on nga masilo. Nya mag-away na lang nuon ta ana. Unya mahimong gamay atong kalibutan, imbes makasapi ta, mabato na lang nuon. Pakkk!

Dili man sab gyud na maayo sa negosyo nga unya-unyaon nato’g bayad atong tulubagon. Kay again, gagmay ra lagi tawon ta nga mga negosyante, so kon dili ta mubayad, unsa man say ilikwa sa atong supplier aron aduna na sab tay mabaligya? Mao nga sa ginagmay natong panikaysikay, kinahanglang magbaton gyud ta og word of honor ngadto sa atong supplier ug reseller, maingon man ngadto sa atong mga kliyente. Pero kon dili gyud nato makaya, hangyuon lang gyud nato’g tarong. Walay dili masulbad sa tarong nga panag-istoryahay.

And yes, mga reseller, kining baligya baligya online bisa’g bag-o pa ko ani ba, nakasabot na gyud ko nga dili gyud ko mahalinan dayon. Naa gyuy panahon nga hinay kaayo. Pero go lang ng go. Ayaw pagpakawala sa paglaom. Ampo lang gyud. Salig lang gyud sa Ginoo. Unya post ng post lang gyud sa inyong baligya. Visibility is the name of the game. Eventually, sa kadugayan nimong post, mahalinan ra gyud ka ana. Ma-shock na lang ka daghan na kaayo ka’g inquiries. Pasenya lang gyud. Ang pagpaubos. Pakpak!

Have a blessed Sunday, dear okRYANians and MARKers. Pangitaa ko ninyo sa FB: [email protected] or like my FB Page: Raiseller.