Fil-Am Victoria Secret Model

CEBU, Philippines – Gikagubtan karon sa social media ang Fil-Am nga si Kelsey  Merrit tungod sa naglawig niya nga kaanyag.

 Ang labing bag-ong balita mao nga gitakda na siyang mularga paingon sa New York aron mupirma og kontrata isip Victoria Secret model, human siya gipahibawo sa iyang agency didto nga mao ang Wilhemena Models.

Nakahuman ang dalaga og kursong  AB Communication sa  ATENEO de Manila University niadtong 2017.

Sikat na nga model si Kelsey dili lamang dinhi sa Pilipinas kundili sa gawas sa nasud sanglit daghan na siya og mga modeling stints didto, apan ang Victoria secret contract ang giisip niya nga labing hugyaw niya nga break pagkakaron.

Paul mibalik sa GMA

Human sa siyam ka tuig pagpanimpad sa  ABS-CBN, nibalik na sa GMA-7 ang kanhi StarStruck Kids contestant nga si Paul Salas.

“I need to be home,” tubag pa sa 20 anyos nga aktor sa dihang gipangutana kung nganong nibalik siya sa GMA.

Mga ka-batch ni  Paul sa StarStruck Kids niadtong  2004 mao sila si Miguel Tanfelix ug  Bea Binene.

Nipirma og kontrata si Paul sa GMA Artist Center niadtong Huwebes.

Nilugwa usab sa contract signing sila si GMA Senior Vice President for Entertainment Content Group Lilybeth Rasonable, SVP for Alternative Productions Gigi Santiago-Lara ug PPL President and CEO Perry Lansigan.

Nagkanayon ang aktor nga taas-taas gyud nga panahon ang pagtimbang-timbang niya sa iyang desisyon.

Nahimong parte si Paul kaniadto sa Mulawin (2004), Majika (2006) ug uban pa.