CEBU, Philippines – Natuman na gyud ang damgo ni Queen Mother Karla Estrada nga mahimong usa ka Star Patroller sa TV Patrol. Niadtong Mayo 15, siya ang kasamtangang mihulip sa orihinal nga Star Patroller nga si Gretchen Fullido. Gihulagway ni Karla nga dugay na gyud siya nga nangandoy niini.

Adunay something

Giangkon sa Korean disc jockey ug TV5 host nga si Grace Lee nga aduna gihapon silay komunikasyon sa kanhi presidente  sa nasud nga si Benigno “Noynoy” Aquino III. Gani, upat ka buwan na sab sila nga kanunay nga magkita. Gitataw ni Grace nga dili niya matawag nga opisyal sila nga nag-date ni Noynoy apan maingon niya nga adunay something tali nilang duha.

Nagplano na

Gibutyag ni Mommy Dionisia Pacquiao nga aduna na silay plano sa iyang boyfriend nga si Michael Yamsun nga magpakasal puhon. Gani, matud pa ni Mommy D nga dili pa usab sila angayan nga magdali nianang maong hukom. “Di ko siya mamadaliin. Sabi ko, kung mahal mo ako, sasama ka sa akin", suma pa ni Mommy D.

Nausab ang prayoridad

Gipamatud-an ni Maricris Garcia nga mausab gyud ang prayoridad sa usa ka tawo kun maminyo na kini. Matud pa niya nga gibalibaran niya ang iyang oportunidad nga makatrabaho sa abroad sama sa iyang kauban sa La Diva nga si Aicelle Santos."Naisip ko na agad what if matanggap ako, 'tapos ayaw ko rin umalis nga, so bakit pa ako mag-o-audition, in-explain ko na lang sa kanila. Although, habang ine-explain ko sa kanila, parang naiiyak din ako kasi sayang, di ba? Sayang, e, pero bilang kapag may asawa ka na iba na rin ang priorities”, esplikar pa ni Maricris.

Entry ni Marlo

Palahi ang gihimo ni Marlo Mortel sa iyang pagsalmot sa sikat nga Bboom Bboom Challenge nga gipasikat sa Momoland. Gipaagi niya sa pagkanta ang iyang entry niini tungod kay matud pa ni Marlo, dili kaayo siya maayo mosayaw.

Rebelasyon sa asawa

Gibutyag ni Richard Poon ang usa ka butang mahitungod sa iyang asawa nga si Maricar Reyes. Matud pa niya nga dili kini moluto sa  ilang panimalay tungod kay dili kini mahiligon sa maong butang.  Si Richard gyud mangunay sa pagluto sa ilang pagkaon.

Kris nabun-og

Gi-upload ni Kris Aquino sa iyang Instagram account ang hulagway sa  nabun-og nga tuhod. Matud pa ni Kris nga natagak siya sa hagdanan sa ilang panimalay niadtong Lunes.

Nihunong na

Gitug-an sa komedyante nga si Super Tekla nga misulod gyud  sa bisyo sa paghithit og druga kaniadto apan gihunungan na niya kini karon. “Nalagpasan ko na lahat ‘yan. Nung nag-sign [ako] ng contract sa GMA, sobrang clean, nagpa-drug test ako. Clear na lahat bago po ako nag-sign as legit Kapuso”, suma pa ni Super Tekla.

Nag-reunion

Adunay reunion nga nahitabo sa 2018 MYX Music Awards sa dihang lakip ang kanhi MYX VJ nga si Heart Evangelista sa mga host sa maong dakong kalihukan sa miaging gabii. Nakauban pagbalik ni Heart sila si Champ Lui Pio, Bianca Roque, Robi Domingo, Inigo Pascual, Sharlene San Pedro, ug Iya Villania.