“Living That Dream”

CEBU, Philippines — “Sa time nga na depress ko, ang pagkanta ang akong nahimong motivation para mopadayun og laban sa kinabuhi”, pulong pa sa 22 anyos nga call center agent nga nahimong finalist sa Sinulog Idol Season 9 nga si Jhun Camille Ian Casiño kinsa mas naila sa kadaghanan isip Aeon.

Si Aeon kinsa naggikan pa sa Claveria, Misamis Oriental, mipabuhagay sa iyang kasinatian sa kinabuhi nga lisod gyud niya nga mahikalimtan. Matud pa niya nga ang pagkanta ang nahimo niya nga sumbanan tungod kay mao kini ang bugtong paagi aron dili kaayo niya mabatyagan ang mga pait nga mga panghitabo sa iyang kinabuhi.

Istorya pa niya nga sa simple nga pagpamuyo nila sa bukid kun diin sama sa ubang pamilya nga napuno sa suporta ug pagmahal, dili gyud malikayan nga moagi og labing dako nga suliran kun diin sukdon  kun unsa ka lig-on ang usa ka pamilya.

“Akong papa kay usa ka security personnel ug ang akong mama kay gatrabaho as day care worker sa among barangay ug dili gyud ni siya igo aron matugunan ang among pag-eskwela kay pag-college na nako, naglisod gyud kaayo me financially kay  gawas nga nagdungan mi nga naa na sa college kami sa akong igsuon nga si Katherine, kanunay man siya nga ma-hospital tungod kay hinay ang iyang resistensiya”, suma pa ni Aeon.

Maingon nga lisod kadto nga kaagi ni Aeon gumikan kay naabot siya sa punto nga iguon niya ang P50 alang sa duha ka semana nga bawon niya sa eskwelahan.

“Dili ko ganahan mangayo sa akong parents kay para unahon lang jud nila akong manghud pag-atiman. Hangtud naka-undang jud ko’g skwela kay sa tinuod, masakitan ko makita ako parents nga nagkalisod, so I decided nga mangita sa og work para makatabang ko,”  suma pa ni Aeon.

Tungod sa iyang pagpanimpad sa pagpangita og trabaho, mao kini ang naghatod kaniya paingon dinhi sa Sugbo.

“Nangaply man ko og work sa una. Nangaplay ko sa isa ka BPO Company ug nag pa-assign ko diri sa Cebu”, suma pa ni Aeon.

Tuod man, sa iyang pagpangita og trabaho ug paghunong sa pagtungha maoy usa ka desisyon nga dili niya angayan nga kamahayan gumikan kay ang iyang igsuon nga si Katherine, nakalampos gyud  kini sa pag-eskwela.

Sa iyang pagpanikaysikay dinhi sa Sugbo, daghan og mga panghitabo sa iyang kinabuhi ang dili niya mahikalimtan.

Imbes nga igugol niya ang iyang oras sa kamingaw sa iyang pamilya nga layo sa iyang kiliran, gihimo niya nga mas mabulawanon ang iyang pag-istar samtang nagtrabaho.

Sama na lamang sa pag-apil sa ilado na nga choir group sa Cebu nga mao ang Los Cantantes nga ubos sa pagpangulo ni Barret Oliver Richards.

Gani, ang mga nahimo niya nga kauban sa maong choir mao ang nagtuklod ug nidasig niya nga moapil sa tinuig nga Sinulog Idol.

“Actually, sige na sila og sulti nga mo-audition ko last 2016 pero mahadlok gyud ko. Kay for all I know, Sinulog Idol ang pinakabanggiitan nga singing contest sa Cebu ug naa koy fear nga dili magkadimao ang akong pagkanta. Since dili paman gyud ko ready, mao nga ni-decide ko nga dili sa mo-join”, asoy pa ni Aeon.

Apan nausab ang dagan sa hangin tungod kay dako ang iyang pagtuo nga aduna gyud siya’y luna aron mamahimong finalist sa maong kompetisyon. Dugang pa, matawag sab niya nga “calling” sab kaniya ang pag-apil human sa pipila ka mga tawo nga miimbitar kaniya sa pagsalmot sa maong kompetisyon.

“Aside nga calling gyud siya, niapil ko og Sinulog Idol kay ganahan gyud ko maka-experience og kanta sa bigger nga stage. Gusto sad nako i-prove akong self nga singer gyud ko ug nga kaya nako makig-level sa mga kontesera nga singers ug aron sab nga ma-share nako ang akong talent sa singing to bigger nga audience in Cebu,” pagpaambit pa ni Aeon.

Una nga nakatungtong og entablado si Aeon sa edad nga 17 anyos didto lang sa ilang dapit sa Misamis Oriental. Mao sab kadto ang unang singing contest nga nasalmutan ni Aeon.

Sama sa uban, wala siya makaikyas nga bation og tumang kakulba ug pagpangurog.

“Nangurog akong kamot paggunit sa mic. Pero nawala tanan kakulba nako pagsugod nako og kanta. Naningkamot pud ko nga manindot nako ang akong pagkanta human ko nakadungog sa palakpak sa mga tawo”, suma pa ni Aeon.

Giangkon ni Aeon nga dili gyud siya hilig nga moapil og solo nga singing contest gumikan kay mas nabaid ang iyang katakus pinaagi sa pag-apil og choir.

Bata pa lang si Aeon, miyembro na siya sa Sta. Cruz Chapel Choir.

“Ang akong family is very active sa church and music ilabi na nga akong mama nga  apil sab og choir niadtong dalaga pa siya. Ang among mga silingan pod nga mga ka edad ra nako nangapil, so sila ang naka-push nako to join the choir and I was only 8 years old that time when I started,” saysay pa niya.

Dakong pasalamat sab ni Aeon nga nahatagan gyud siya og spot nga malakip sa mga finalist sa ikasiyam na edisyon sa Sinulog Idol  gumikan kay mas nakat-on siya nga moatubang sa mga tawo kon mo-perform nga mag-inusara.

“Sinulog Idol gave me that break ug nahimong tigpukaw sa ako to continue living my dream. I gave up my job to give way sa Sinulog Idol and I never had regrets sa akong decision. Sinulog Idol is the best journey I had and I will forever cherish that Sinulog Idol experience”, panapos pa ni Aeon.