#JFTouch

CEBU, Philippines – “Make-up artist to the stars” maoy normal na nga masikit sa pangalan ni Janna Fernan kon siya nay hisgutan.

Kapin sa 11 ka tuig na siyang nagpaanyag sa mga nag-unang personalidad dili lamang dinhi sa Sugbo kundi lakip na sab sa kaulohan.

Gani dili  na maihap ang celebrities nga iyang napagwapahan o naartehan.

Pipila kanila nga dili niya malimtan mao silang Daniel Matsunaga, Joseph Franko, Ethel Booba, Keanna Reeves, Isabel Granada, Angeline Quinto,  ug DOT Undersecretary Kat De Castro.

Apan sa ilang tanan, si Valerie Concepcion gyud matud pa maoy mitatak sa iyang hunahuna sanglit siya ang unang artista nga iyang napaanyag nga misugot nga magpahigayun og live feed sa Facebook samtang nag-make up siya niini.

Apan di lang sa mga artista nagtuyok ang kalibutan ni Janna sa pagpaanyag sanglit nahimo na sab siyang kampiyon sa usa ka prestihiyusong kompetisyon nga miila sa katakus sa mga makeup artist.

Siya ang migawas nga back- to-back grand champion atol sa APHCA o kun Asia Pacific Hairdressers and Cosmetologists Association competition sa natad sa evening makeup ug bridal makeup nga gipasiugdahan ni Ricky Reyes niadtong tuig 2016.

“Gusto kong mahinumduman ko sa mga tawo as a make-up artist nga kanang jolly permi dili boring while ga- makeup nila kay joker gyud kaayo ko in person gyud. And then ako ang makeup artist nga approachable ra gyud kaayo,” saysay pa ni Janna.

Nagsugod ang pagka mahiligon ni Janna sa make -up niadtong kuyog-kuyugon siya ni Cha Ronnie Matudan sa mga raket niini sa makeup. Si Matudan, kanhi makeup artist sa ABS-CBN Cebu.

Hangtud nga gipasuway na siya sa pag-apply og foundation, blush-on ug lipstick, ug sa paglabay sa panahon nahimo na gayud siyang hanas niini.

Una niyang nahimong suki mao ang iyang mga kaparyentihan, kasilinganan ug kahigalaan hangtud na nga naabut siya sa posisyon nga iyang nahimutangan karon.

“Ang labing dako nga challenge nga akong nasugatan kay katong before nga naa koy gi- makeupan nga senior citizen and then gusto siya nga ala-Imelda ang iyang hair then before dili gyud ko kamao mu-hairdo og ingon ana. Wala gyud to nako na- achieve nga hairstyle mao to sukad ato, ako gyud gitun-an. Gipaningot jud ko ato,” pagpaambit ni Janna sa di niya malimtang kasinatian.

Inspirasyon karon ni Janna ang iyang Mommy Joy nga naa nagkugi ug nanglimbasog sa New Zealand.

Mapasalamaton sab siya niini sanglit mao man kini ang magpadala niya og mga makeup nga maoy kasagaran niyang gamiton sa iyang raket.

Mapasigarbuhon sab niyang gipaambit nga kon kaniadto magsalig ra siya sa kwartang ipadala sa iyang Mommy Joy, karon dili na kinahanglan sanglit left and right na nga mga raket ang iyang gisudlan nga maoy rason nganong makasustener siya sa mga nag-una niyang panginahanglanon.

Hingpit na gyung gikonsiderar ni Janna nga usa na siya ka certified in-demand make -up artist sa dihang nagkasaka na nga mga artista, personalidad ug mga kliyente ang misalig kaniya pagpa-make-up.

Gani matud pa niya, halos matag adlaw aduna gayud siya'y mga kliyente nga usahay moabot sa 15 ka buok.

“Salamat kaayo sa new customers ug mga regular customers nako sa walay pag-undang og refer ug recommend nako as a makeup artist kay kung dili tungod ninyo dili nako maabot akong naabtan karon as in thank you so much!”

Gawas sa pag –make  up, busy usab siya sa paghupot og mga babaye nga mahihiligon moapil og mga indigay.