Ipasalida na gyud

Ipasalida na gyud sa mga sinehan karong May 23 ang pelikulang Citizen Jake. Kahinumdoman nga taod-taod na nga gigama ang maong pelikula nga gibidahan ni Atom Araullo. Nalakip usab sa Citizen Jake sila si Cherie Gil, Dina Bonnevie, Nonie Buencamino, Adian “Luis” Alandy, Gabby Eigenmann, Max Collins, Teroy Guzman, Lou Veloso, Richard Quan, Victor Neri, Allan Paule, Anna Luna, Elora Españo, Cholo Barretto, Raquel Villavicencio, Nanding Josef, ug Ruby Ruiz.

Simpatiya kang Sarah

Nagbaha ang mga simpatiya  nga nadawat ni Sarah Geronimo human sa  iyang paghilak og maayo atol sa iyang konsyerto didto sa Amerika gumikan sa kakapoy ug na-feel niya nga duna pa’y kulang sa iyang kinabuhi.Usa sa nipadala og sweet message kaniya  mao ang iyang boyfriend nga si Matteo Guidecelli.

Normal lang

Giangkon sa mag-uyab nga sila si Mikael Daez ug Megan Young nga dili gyud malikayan nga maglalis sila usahay. Hinuon ilahang gipaneguro nga dili molungtad og dugay ang ilang away aron dili maapektohan ang ilang relasyon.

Gusto og pribado

Tsika pa ni Drew Arellano nga limitado lang ang pag-expose sa social media sa anak nila ni Iya Villania nga si Primo. Gipaneguro  sa duha nga duna gyu’y saktong privacy ang ilang anak bisan paman nga puros sila artista.

Dili feel ang K-Pop

Gibutyag sa aktor ug  concert producer nga si Joed Serrano nga dili gyud siya mo-produce og concert sa  K-Pop. Dili siya mahiligon niini ilabi na nga nakadungog siya og tsika nga duna’y mga labad pesonalidad sa K-Pop.

Nangandam na

Gipangandaman gyud og maayo ni Gil Cuerva ang umaabot niya nga serye sa GMA-7 nga My Guitar Princess kung diin makapares niya si Julie Anne San Jose. Gusto ipamatuod ni Gil nga duna na’y kalamboan sa iyang pag-arte atubangan sa kamera.

Tribute sa mamumuo

Nihatag og tribute ngadto sa mga mamumuo ang mga host sa It’Showtime kagahapon isip pagsaulog sa Labor Day. Gidayeg nila og maayo ang mga mamumuo gumikan sa pagkugi sa ilang trabaho aron makasuporta sa ilang pamilya.

Sekreto sa relasyon

Ang Ginoo maoy sentro sa ilang relasyon, mao kini ang gibutyag sa singer nga si Moira dela Torre hinungdan nga lig-on gyud ang relasyon nila ni Jason Marvin Hernandez. Kahinumduman nga engaged na ang duha sa miaging adlaw.

Trabaho lang

Gitataw ni Barbie Imperial nga dili ra law-ay ang dating sa sexy scenes nila ni JM de Guzman sa seryeng Araw Gabi.  Matud pa niya nga trabaho lang iyang gibuhat ug tipik kini sa pag-level up sa iyang career.

Movie ni Toni

Gisugdan na og luto ang umaabot nga pelikula ni Toni Gonzaga sa Star Cinema. Wala pa gibutyag sa aktres kung kinsa ang makapares niya sa maong pelikula. Gipakita na siya sa script sa maong serye.