Photo Exhibit sa Basilica gibuksan

CEBU, Philippines — Karong  Abril 28,  2018 mao ang ika-453 ka tuig nga kasaulogan sa Kaplag o ang pagkadiskubre ni Juan Camus, usa sa mga kaubang sundawo ni Miguel Lopez de Legazpi sa imahe sa Balaang Bata nga si Senyor Santo Niño.

Ang maong tinuig nga selebrasyon gilangkuban og nagkadaiyang kalihukan. Kini naglakip sa inadlaw nga misa nobena sa Balaang Bata, Huniño o  Huni Halad Alang Kang Señor Sto. Niño nga mahitabo karong Abril 25 ug ang photo exhibit nga gisugdan niadtong Abril 18.

Sa labing unang higayon  nahulma ang  photo exhibit  uban sa mga tinun-an sa  Department of Communications, Languages and Literature sa University of San Carlos ug San Jose-Recoletos Senior High, ubos sa ilang official student publication nga The Premier inubanan sa photography organization sa Basilica, PITIK, nga nangulo sa pagkuha sa mga litrato ug   nakalain-laing pamahayag alang sa kapiyestahan sa Señor Sto. Niño.

Inubanan sa mga pari,   niapil  sa pagbukas sa maong exhibit ang  usa sa mga banggiitan nga photographer  sa Sugbo ug aktibo sa pagkuha og hulagway sa mga kalihokan sa Basilica nga si Britz Briones.

Tumong sa maong eksibit ang pagpakita di lang sa katakos sa mga student volunteers sa pagkuha og maanindot nga mga hulagway lakip na sab ang pagpalapad sa pagdebosyon kang Sto. Niño ngadto sa publiko pinaagi sa social media.

Sa kadtong gusto musaksi sa photo exhibit, ang mga larawan mamahimong makita sa wala nga bahin sa Basilica Minore del Sto. Niño hangtod sa Mayo 31, 2018.