Kanta sa mga nag-maoy

CEBU, Philippines — Karong panahona, nagkauso na ang mga pa-cute nga kanta  diin maka-relate sa sitwasyon sa mga kabatan-onan ilabi na kadtong nasamdan ang kasingkasing gumikan sa napukan nga relasyon.

Bisan paman sa sakit nga kaagi, dili angayan mabalaka gumikan kay maabot ra gyud ang panahon nga maka-move on.

Tipik lang kini sa mensahe  sa  kanta sa  17 anyos nga si Brian Gazmen nga “Ayoko Nang Makarinig Ng Love Song” nga gi-compose ni  Direk Joven Tan.

Matud pa ni Brian nga normal lang gyud ang kasakit, ang uban todo hilak samotan na kon makadungog og mga love song.

Apan wala nagpasabot nga mohunong ang kalibutan sanglit sa hinay-hinay nga paagi, maka-move on ka ra gayud niini.

“Yung kanta, masasabi natin na pang- millennial siya. Yung ibang parang feeling nila katapusan na ng mundo kung may breakup. Dapat marunong sila mag-kontrol, meron pang ibang tao diyan,  huwag masyadong magmamadali, darating din yung tao na para sayo,” nagkanayon si Brian sa dihang nahinabi sa mga sakop sa Cebu Entertainment Group.

Dili pa lang dugay, nitikang si Brian sa Sugbo alang sa promosyon sa iyang awit nga  gi-release sa  ABS-CBN music label nga  Star Music.

Gipasigarbo niya ang “Ayoko Nang Makarinig ng Love Song” gumikan kay pang-masa kaayo ang dating niini  nga swak nga putahi usab alang sa mga  kabatan-onan.

“Maganda siya pakinggan, seguro  common yung sitwasyon  at marami ang makaka-relate,” dugang pa niya.”

Wala  pa kasuway og uyab si Brian busa wala pa siya kasinati og break up, apan nahatagan ra niya og hustisya ang pagkanta gumikan kay naminaw ra siya sa mga kaagi sa iyang mga higala  nga gipangbiyaan og uyab.

“Dahil sa mga  pinagdadaanan nila, seguro maging handa na ako kung darating na ang panahon na papasukin ko ang bagay na yan,” hirit pa ni Brian.

Lumad nga taga Bicol si Brian, ug tinun-an siya sa Grade 12  Ateneo de Manila University (ADMU).

Showbiz crush ni Brian mao ang kanhi produkto sa Pinoy Big Brother nga si Kisses Delavin.

Naila-ila niya si Kisses sa personal sa dihang nitambong siya sa debut sa higala niya nga si Heaven Paralejo.

“ Nagkakilala kami sa isang birthday party. Sobrang bait pala niya, at isa ako sa mga   tagahanga  niya ,” matud pa sa  young singer.

Dili na bag-o alang kaniya ang showbiz, sanglit nakadawat na siya kaniadto og acting projects.

Nakasalmot   na usab siya kaniadto  sa mga  workshop  nga  gidumala ni Ogie Diaz.

Nakalangkat siya og cameo roles sa pelikulang  “Seven Sundays,” ug  “Love You To The Stars And Back” .

Sa mga programa sa telebisyon nakalugwa na usab siya sa “La Luna Sangre” ug “Ipaglaban Mo.”

Sa  “Laluna Sangre”, nidala siya isip anak  ni Sen. Rodolfo Mallaro  nga gidala ni Joey Marquez.

Aduna na’y background sa pag-arte si Brian, sanglit mahiligon kaayo siya sa pagsalmot og mga musical play ug pipila niini naglangkob sa “Hairspray” ug “Les Miserables.”

Kon dili siya busy, ang pagduwa og basketball, volleyball, softball, maoy pipila sa iyang mga kalingawan.

Anak si Brian ni Iriga City Mayor Madelaine Alfelor-Gazmen hinungdan nga  bata pa lang siya, expose na kaayo siya sa kalibutan sa politika.

Apan gitataw niya nga wala siya’y plano nga musunod sa tunob sa iyang inahan.

“Yung pamilya ko, aktibo talaga sa public service, nakakatuwa naman dahil maraming natutulungan si mommy.  Pero ako, wala akong balak na papasok sa politika , “ matud pa niya.

Gawas sa pagkanta   mohirit usab si Brian sa pag-arte karong tuiga sanglit duna siya’y umaabot  nga indie film  diin  makauban niya ang aktres nga si  Kylie Alcantara.

“Niluluto na siya ngayon , at sana  magagawa yung movie   sa taong ito,”  asoy pa ni Brian.

Target usab niya nga  i-release karong  tuiga ang iyang album  nga langkuban og kasagaran mga orihinal nga kanta nga magtuki  sa kumon nga sitwasyon sa lovelife sa kabatan-onan.

“ May iba pang komposisyon si Direk Joven  para sa akin, sa ngayon,  nag-focus  kami sa first single ko na  ‘Ayoko Nang Makarinig Ng Love Song’. Sana maganda yung resulta, kasi excited na din ako na i-record  ang ibang kanta ni direk ,” saysay pa niya.

Aminado si Brian nga nagbaha ang mga bag-ong artista karong panahona apan wala siya mawad-i og paglaum nga muarangkada puhon ang iyang career.

Suma pa niya nga duna siya’y taas nga pasensya ug nagtuo siya nga duna gyud siya’y  igong maabtan sa  pagsugod sa iyang singing career.

“Alam ko naman na aalagaan ako ng Star Music, dahan-dahan lang, hindi dapat mag-give up,’ suma pa niya.

Kon maghisgot  na og diet regimen,  ginagmay lang nga rice ang iyang  mugna,  ug mahilig lang siya karon og  isda ug manok .

Pipila sa giidolo niya nga singers sa nasud mao sila si  Sarah Geronimo ug  Inigo Pascual busa gipangandoy niya nga makatrabaho niya puhon ang nahisgutang singers.

Hinuon niadtong bata pa siya,  ang mga  kanta  ni  Gary Valenciano  maoy nakaimpluwensya kaniya.

Bisan pa man sa ka-busy sa iyang singing career, dili  gyud niya pasagdan ang iyang pag-eskwela.

Malipayon si Brian sa dugang kalamboan sa iyang career, human niya nasuta nga duna na siya’y mga fans club nga nakabase sa nagkadaiyang dapit sa nasud.

Gani sa pagtikang niya dinhi sa Cebu, iyaha gyud nga gihimamat sa personal  ang iyang Cebuano fans  pinaagi sa usa ka paniudto.

“Sila (fans) yung nagbibigay sa atin ng lakas , at nagbibigay ng motibasyon  na dapat ko ipagpapatuloy ang ginagawa ko.  Sa akin kasi, pumasok ako sa showbiz, dahil gusto ko talaga magpasaya ng mga tawo,” panapos pa niya.