Hugyaw sa Kalingaw!

CEBU, Philippines — Ang hugyaw nga chemistry sa entablado ug ang makapanlimbawot og balhibo nga tingog maoy nipatigbabaw sa concert nila ni  Asia’s Songbird Regine Velasquez-Alcasid, Asia’s Balladeer Christian Bautista, and Asia’s Pop Sweetheart Julie Anne San Jose  sa miaging semana nga gipahigayon diha sa Pacific Grand Ballroom sa Waterfront Cebu City Hotel and Casino.

Ang maong concert  nag-ulohan og  “3 Stars 1 Heart” ug ang Cebu maoy buena mano sa dili pa kini ipahigayon sa laing dapit sa  Pilipinas o ba kaha sa laing nasud.

Nilugwa usab sa concert ang produkto sa Sinulog Idol sa nga si Danielle May Ozaraga ug naka-duet niini si Christian.

Tipik usab sa concert ang pagpakita sa mga obra ni Cary Santiago samtang gikanta ni Regine ang Usahay.

Gawas sa pagkanta, wala usab nagpaulahi sa pagpakita sa talento niya sa pagsayaw si Julie Anne  ug nakauban niya sa entablado ang Sugbuanon nga grupo nga Disco Remix.

Nahugyaw og samot ang katawhan sa katapusang bahin sa maong concert, nanamilit konuhay ang tulo ka singers  ug gipalong dayon ang suga,namarog na ang mga tawo aron unta manggawas apan nakugang sila dihang kalit nga nisiga ang mga suga ug gikanta dayon sa singers ang nindot nga  mga kanta sa Eraserheads  .

Nagsayaw-sayaw ang audience nga tataw nga puwerting lingawa sa gipangkanta sa singers ug mao kini ang nagsilbi  nga grand finale sa concert.

Sa wala pa nahitabo ang maong konsiyerto, nahinabi sa  pipila ka mga sakop sa E-Group ang tulo ka singers ug nipadayag kini nga dili basta-basta ang mga taga Cebu ug magsilbi nila kini nga barometro sa usa ka malampusong concert.

“Alam naman natin na magagaling talaga ang mga taga Cebu lalo na sa pagkanta, at meron kayong own standards . Kaya kailangan talaga na maka-produce ng magandang show sa inyo,”  matud pa ni Regine.

Dugang pa ni Regine ubay-ubay ka panagtigom ang nahitabo aron maseguro gyud nila nga malingaw ang mga Sugbuanon.

“Hindi siya basta-basta. Kasi you know, as a performer, na sa audience namin kinukuha yung  energy namin.  We get inspired by the audience’s reaction,” matud pa ni Regine.

Samtang si Christian sa iyang bahin, nisaysay nga mga banggiitan gyud ang mga Sugbuanon  sa natad sa pagkanta ug usa sa iyang nailhan mao ang higala niya nga si Sheryn Regis nga kauban niya kaniadto sa “Star in a Million” sa ABS-CBN niadtong 2003.

‘Ang daming magagaling na singers dito, isa na si Sheryn, galing yata siya sa Carcar ,” matud pa ni Christian.

Nilenggua usab si Julie Anne nga usa ka dakong garbo alang kaniya nga makauban ang mga banggiitang singers sa entablado busa todo gyud ang iyang pagpangandam niini.

“ Sineseguro talaga namin na magugustohan ng Cebuanos yung songs  na  pinipili namin, “ nagkanayon si Julie Anne.

Si Paolo Valenciano ang stage director sa maong concert ug nipadayag kini nga tulin ra kaayo ang ilang mga rehearsal gumikan kay dili lisod tudloan ang tulo ka singers  sa buot  niyang ipabuhat niini sa concert stage.