Roy, The Charmer

CEBU, Philippines - Ang magpuyo nga malinawon ug malipayon, ug ang makahatag og kalipay ngadto sa uban maoy  pipila sa mga misyon sa 20-anyos nga naggikan sa Consolacion, Cebu nga si Roy Lotfel Racaza.

Si Roy ang natuboy nga 4th Runner-Up sa gipahigayon nga Sinulog Idol Season 7 niadtong miaging tuig. Matud pa niya nga dili babag ang layo nga biyahe kun ang imong padulngan paingon kini sa kalampusan ug sa imong mga damgo sa kinabuhi.

Matud pa niya nga dili lalim ang pagbiyahe gikan sa ilaha paingnon sa siyudad sulod sa usa o duha ka oras. Apan kanunay niya nga gipaningkamutan nga moapil sa mga workshops aron aduna siya’y makat-unan ilabi na sa pagpalig-on iyang talento sa pagkanta.

Sa pangidaron nga 3 anyos, nakita na sa iyang mga ginikanan nga aduna gyud siya’y abilidad sa pagkanta. Gikahiligan sa iyang ginikanan nga maminaw og mga kanta. Hangtud nga nadala na lang usab siya tungod kay mura og mohunong ang pagtuyok sa kalibutan kun  wala’y mapaminaw nga mga maayong musika ang ilang mga dunggan.

Sama sa uban, misuway usab siya og apil sa singing contest sa ilang komunidad sa Consolacion. Unang piyesa niya sa kompetisyon mao ang “The Way You Look at Me” ni Christian Bautista. Matud pa niya nga todo-todo ang iyang mga preparasyon nga iyang gibuhat tungod kay gusto niya nga mosuway og tungtong ibabaw sa entablado ug dili na sa ibabaw sa lamisa. Dakong kalipay niya ug sa iyang pamilya nga nakadaog siya isip first runner-up sa iyang una pa lang nga pagsangka.

Gipadayag usab niya nga gusto gyud niya nga makita niya nga malipayon ang mga ginikanan pinaagi sa iyang mga naangkon nga mga kalampusan. Gani, bag-ohay lang usab siya nga migradwar sa University of San Carlos sa kurso nga Bachelor of Arts in Political Science Major in Public Management and Development.

“Praise God! I was able to give back to my parents for the support they have invested in my education”, suma pa ni Roy.

Karon nga nahuman na siya sa iyang pagtungha sa kolehiyo, plano usab niya ang pagpadayon sa iyang hosting career gawas sa singing career. Si Roy maoy ihulip usahay kang Sam Costanilla isip host sa Sinulog Idol kun aduna kini lain nga kabilinggan nga atimanun.

Paghinumdum pa niya nga nadiskubre niya nga aduna siya’y abilidad sa natad sa hosting sa dihang nagtungha pa siya sa high school.

Nanghinaut usab siya nga adunay mga dagko nga kalihukan nga siya ang mahimong event host tungod kay dakong garbo na kini alang kaniya nga siya ang mapilian kun ugaling man.

Sa pagkalakip ni Roy isip finalist sa Sinulog Idol 2016, giangkon niya nga dakong gasa kini gikan sa Kahitas-an gumikan kay nakasulod siya sa dili ordinaryo nga kompetisyon nga gidalit sa Sinulog Foundation.

Istorya pa niya nga sa dihang nakadungog siya nga adunay ipahigayon nga audition, dali siya nga mitikang sa Cebu City Sports Center aron mopakita ug mopamatuod nga anagayan usab siya nga maapil sa mga listahan nga mosangka. Gusto usab niya nga hagiton ang iyang kaugalingon. Dugang pa niya nga ganahan siya nga makahatag og inspirasyon sa uban nga tanang pangandoy moabot ra gyud kun molihok usab ang tawo sa pagkab-ot niini.

Giangkon niya nga tungod sa maong kompetisyon, dili lang ang talento ang nabaid, kundili lakip na usab ang pamatasan ug unsaon pag-abi-abi ngadto sa ubang tawo.

“Every night sa competition, ma-testingan sab ang humility, labi na inig atubang nimo sa imong mga kontra sa contest ug sa pagkahibaw sa resulta”, dugang pa niya.

Nakat-unan usab ni Roy ang mga mabulawanon nga gitudlo sa mga coaches nga modawat gyud sa mga kapakyasan.

“We will not receive what we do not deserve. Being defeated will teach you a lesson to be humble and you reflect on your performances. It will just open more and more doors in your life that you did not expect. They were trials and I would not be the person I am now if I did not accept those failures and rejections”, padayag pa ni Roy.

BNH: Unsaon paghulagway ang usa ka Roy Racaza?

ROY: Simple lang ug adunay kahadlok sa Ginoo.

BNH: Unsa ang imong kaagi sa kinabuhi nga gipaningkamutan nimo nga dili na nimo masinati pag-usab?

ROY: Kana bitaw’ng mamahimo kang “self- centered”, kay it’s a struggle between yourself ra man jud, ug akong nakita nga dili ni maayo kay usahay makapasakit ka og laing tawo. Dili  man gyud kalikayan nga kita masuko, pero sa pagkakaron, gipaningkamutan nako nga kontrolon lang sa jud kay ako mismo, di gusto nga naa ko’y mapasakitan nga tawo.

BNH: Giunsa nimo pagdala ang imong mga naagian nga kalisud?

ROY: Usahay ako lang palabyon, pero di gyud malimod nga sa kada struggle, aduna kitay makat-unan nga leksyon. Imo lang sad tan-awn imong kaugalingon ug ang sitwasyon, kay para sa sunod na nimo nga pag-atubang niini, di na ka makugang ug kahibaw naka modala sa imong kaugalingon ug dili na siya ma-consider nga struggle.

BNH: Unsa ang benepisyo nga imong naangkon sa imong pag-apil og kompetisyon?

ROY: Ang usa ka singing contest does not start and end on the contest night. Aduna sa’y mga preparations nga angay buhaton. Inig human sa usa ka singing contest, mao pa’y pag sugod sa usa pa ka opportunity. A benefit is that mailado ka sa uban tawo nga mokanta sab diay ka. Usa sab kay makadawat og mga imbitasyon sa lain-laing mga events ug makaila ka og klase-klaseng tawo.

Name:                          Roy Lotfel B. Racaza

Nickname:                   Roy

Birthday:                     Sept 14, 1996

Hobbies:                      Watching TV, Biking,

Favorite Food:            Lechon

Height:                        5’3’’

Weight:                       73 kilos

Celebrity Crush:          Sarah Geronimo

Favorite Sports:           Basketball ug Table Tennis

Favorite Song:             Ikaw Ang Aking Pangarap

Favorite Singer:           Martin Nievera

Motto:                                     Good Attitude will lead you  to your dreams.....

Titles/Achievements in Life

• 4th Runner-up, Sinulog Idol Season 7

• Star of the Night, Sinulog Idol Season 7 Rock night

• Bronze Medalist, CESAFI Singing Contest 2012

• 2nd Place, 9th Huniño

• Grand Winner, 30th Original Marian Song Festival