Sharon nagbangotan

CEBU, Philippines - Usa ang  beteranang singer nga si Megastar Sharon Cuneta sa nagbangotan og maayo  sa pagpanaw sa award-winning OPM composer nga si Willy Cruz  sa miaging adlaw.

Sa Facebook post ni Ate Shawie, iyang gipadayag ang iyang kaguol gumikan kay dako kaayo og papel sa iyang singing career  ang maong  kompositor  kinsa  nagmugna sa iyang hit songs.

"I have no words, only tears and gratitude and love," suma pa niya.

Nasayran nga si  Willy  maoy  nag-compose sa awit ni  Sharon nga  "Pangarap Na Bituin," "Bituing Walang Ningning," "Sana'y Wala Nang Wakas" ug "Hanggang Kailan Kita Mamahalin."

 Mapasalamaton usab si Megastar ngadto  kang Willy tungod kay gimahal ug giisip usab siya niini  nga tinuod nga higala. —

Makulbaan gihapon

Gitug-an ni Beauty Gonzales nga nangulba gihapon siya sa dihang nagsugod na ang ilang taping sa serye nga Pusong Ligaw. Matud pa niya nga nipaubos gyud siya og workshop aron matabangan siya sa paghatag og hustisya sa iyang karakter sa maong serye. Kahinumduman nga usa ka tuig kapin ang pagpahuway ni Beauty sa limelight human siya manganak.

Mopahuway

Manamilit una ang box office director nga si Mae Cruz-Alvar sa iyang pagama og mga pelikula. Ang pelikula nila ni Kathryn Bernardo ug Daniel Padilla   nga Can’t Help Falling In Love maoy katapusan niya nga gitrabaho. Matud ni Direk Mae nga ang iyang pamilya ang bugtong rason kun  nganong  nakahukom siya nga mopahuway sa trabaho.

The good teacher

Mobalik na sa GMA Telebabad ang Kapuso Primetime Queen nga si Marian Rivera pinaagi sa serye niya nga  The Good Teacher. Wala pay dugang detalye kun kanus-a kini sugdan.

SUPORTAHAN ANG ANAK

Nakauyon ra usab ang inahan ni Janine Gutierrez nga si Lotlot de Leon ngadto kang Rayver Cruz. Adunay hugon-hugon  nga adunay relasyon sila si  Janine ug Rayver. Matud pa ni Lotlot nga kaila na siya ni Rayver ug suportahan ra niya ang iyang anak kun asa kini magmalipayon basta dili lang kini pasakitan.

Nakauyon sa  radyo

Gipadayag sa kanhi singer ug co-anchor ni Arnold Clavio sa DZBB nga si Ali Sotto nga mas kampante siya madungog ang iyang tingog sa kahanginan nga mohatod og balita kaysa moarte sa telebisyon. Matud pa niya nga daghan na siyang gibalibaran nga mga proyekto gumikan kay aduna kini “sense of fulfillment” alang kaniya.

Nataktak sa The Voice

Napakyas nga makasulod sa Top 12 ang Fil-Am teen nga si Anatalia Villaranda sa The Voice sa Estados Unidos. Giingon nga kuwang kaayo kini sa text votes mao nga wala kini makalahutay. Ang ulahing performance nga gihimo ni Anatalia mao ang Stand by Me ni Ben E. King.

Ilusad sa concert

Adunay bag-ong album nga gigama si KZ Tandingan alang sa iyang mga fans. Matud pa ni KZ nga ilusad kini niya atol sa iyang digital concert karong Abril 22 sa alas 6 sa gabii sa One Music PH.

Little Prince

Dili masukod ang kalipay nga gibati karon ni Kylie Padilla sa dihang nahibaw-an na niya nga usa ka batang lalaki ang iyang gisabak karon. Tsika pa ni Kylie nga gidamgo gyud niya ang usa ka batang lalaki kaniadto. Gitawag usab kini niya og “Little Prince”.

Nakadawat ra

Wala panumbalinga ni Elha Nympha nga dili siya ang natuboy nga kampiyon sa Your Face Sounds Familiar Kids niadtong miaging Domingo. Malipayon ug mapasalamaton gihapon siya nga nahimo siyang parte sa maong kompetisyon tungod kay talagsaon lang kini nga oportunidad nga itanyag ngadto sa pipila ka child stars.  (BANAT NEWS)