Sakdap, walay paglubad!

CEBU, Philippines - Napuno sa katawa ug pagmaya ang nagmalampuson nga konsyerto sa banggiitang quartet sa Sugbo nga “Sakdap” niadtong Domingo sa gabii diha sa Cebu Capitol Social Hall. Naumol ang maong konsyerto isip paghalad ngadto sa usa sa mga sakop niini nga si Irving Guazon kinsa adunay gihambin nga cancer. Ang kita sa maong concert maoy idugang sa mga gastohanan sa pagpatambal kang Irvin.

Ang ubang mga sakop niini naglangkob nila ni Gani Villarojo, Josil Mariño ug Henry Jabonero kinsa nipakita gyud og hugyaw nga performance pinaagi sa mga musikang binisaya. Naliki og samot ang audience sa dihang giawit nila ang nagkadaiyang version sa awit nga Si Filemon.  Giawit usab nila ang Inday, Sultii Na, Rosas Pandan, Dawata Kini, ug  Isang Linggong Pag-ibig .

Nihatag usab og suporta sa maong konsyerto ang pipila ka local singers kinsa nipaambit gyud sa ilang mga talento. Kini naglangkob nila ni Fr. Jonas Mejares, Daryl Shane Leong, Roy Caballero, Girlie Laspiñas, Bobby Jamiro, Ang MAKA-girls Genevieve Flores, Kristina Cassandra Dilao, Niña Brigette Cabigas ug ang grupong Missing Felimon . Ang hugot nga panaghigalaay maoy gipatigbabaw sa maong konsyerto ug napuno gyud ang social hall.   Ang produksyon sa maong konsyerto gidumala ni  Gloria Villarojo  sa Soundtraxx Production Studio ug napanglantawan  niya nga duna gyud mahitabo nga repeat performance sa maong konsyerto gumikan sa init nga paghangop sa mga tawo. 

Lovelife ni Albie gipublikar na!

Uyab ni Albie Casino ang grand winner sa “Miss Wow, Gandang Filipina” sa Wowowin nga si Michele Arceo.

Suma pa ni Albie nga proud kaayo siya sa nakab-ot nga titulo sa iyang girlfriend apan wala siya’y ideya kun mosulod ba kini  o dili sa showbiz.

Nasayran nga gisekreto ni Albie kaniadto ang identity sa iyang uyab  apan maglisod na siya sa pagmintinar niini  sanglit nahimo kining ilado .

Kahinumduman nga mga dagkong personalidad ang mga hurado sa maong indigay  nga naglangkob nila ni  2014 Miss Universe Philippines MJ Lastimosa, GMA Films President Atty. Annette Gozon, GMA First Vice President for Program Management Joey Abacan, ug  ang mga designer nga sila si  Randy Ortiz, JC Buendia ug  Avel Bacudio.

Juday mobalik na sa TV

Human sa taod-taod nga pagpahuway sa limelight, aduna na’y TV project  si Judy Ann Santos pinaagi sa bag-ong season sa “Bet On Your Baby”.

Kahinumduman nga mobalik na unta sa telebisyon si Juday niadtong 2015 pinaagi sa seryeng “Someone To Watch Over Me” kun diin makauban unta niya si Richard Yap  apan nakanselar kini human nagsabak ang aktres.

Nakalugwa usab si Juday sa  pelikulang Kusina nga parte sa Cinemalaya Independent Film Festival.

“Excited ako na ma-doll up kasi sa ganitong show lang naman ako pwede i-glam. Napahinga ako for more than a year so I’m so happy. I’m sure matutuwa ang mga tao, lalo na mga bata ‘pag nakita nila ito,” tsika pa ni Juday ngadto sa ABS-CBN News. (BANAT NEWS)