Gisudlan ug gikawatan

CEBU, Philippines - Gisaka og kawatan ang balay sa managsuon nga GMA-7 stars nga sila Sanya Lopez ug Jak Roberto niadtong Huwebes didto sa Tandang Sora, Quezon City. Giingong batan-on nga lalaki ang maong kawatan nga padayon pa nga gipangita karon sa  kapolisan. Wala hinuo’y nadisgrasya sa maong insidente  apan nakuha gyud sa suspect ang cellphone sa katabang sa managsuon. 

Maayong tawo

Bukas matud pa ang Kapamilya actress nga si Andi Eigenmann nga makig-uli ngadto sa amahan sa iyahang anak nga si Jake Ejercito. Gipanalipdan usab sa aktres si Jake ngadto sa tanang bashers niini. “I can say that he's not a bad person,”tsika pa niini.

Regine nagmalaumon

Malaumon ang aktres nga si Regine Tolentino nga matuldokan na karong tuiga ang annulment case nila sa iyang bana nga si Lander Vera-Perez. Gibutyag usab sa aktres nga mao kini ang rason kun nganong hangtod karon wala gihapon siyay gika-date gumikan kay naka-focus siya sa  annulment case aron hingpit na siya nga makalakwatsa ug makabaton  og bag-ong hinigugma.

Close fight

Kulbahilam ang panagtigi sa TV ratings sa serye sa ABS-CBN nga  Wildflower ni  Maja Slavador ug sa game show ni Willie Revillame sa GMA-7 nga Wowowin. Base sa data nga nahipos sa AGB Ratings nga gihimo niadtong Pebrero 11 hangtod 17, naapsan sa Wildflower ang Wowowin apan usa ug duha ka puntos ra usab ang deperensiya.

Nalabwan ang inahan?

Gibutyag sa aktres nga si Janine Gutierrez nga dili siya mouyon sa giingon sa director sa Legally Blind nga si Ricky Davao nga mas maayo siya moarte kaysa sa iyang inahan nga si Lotlot de Leon. Sigun pa sa aktres nga mas maayo gyud iyang inahan ug pangandoy niya makab-ot usab ang naabot sa iyang inahan kaniadto.

Na-trauma pa gihapon

Giangkon sa komedyanteng si Ai-Ai delas Alas nga dili pa siya andam magpakasal sa uyab nga si Gerald Sibayan gumikan  kay matud pa  nakasinati gihapon siya og trauma sa napakyas nga kaminyoon nila ni Jed Salang kaniadto  diin gibuwagan siya human sa pipila ka adlaw gikan sa ilang kasal.

Naguol sa  scandal

Gibutyag sa aktres nga si Jerika Ejercito nga naguol siya sa epekto  ngadto sa iyang anak kalabot  sa nikatap nga sex scandal sa iyang  ex-boyfriend nga si Bernard Palanca .  Matud pa ni  Jerika nga samtang bata pa kini,  maghuna-huna na siya og rason  aron makatubag siya og tarong kun maabot ang panahon nga mangutana na kini  puhon. (BANAT NEWS)