Amahan ni Tom mipanaw

CEBU, Philippines - Nipanaw na ang amahan ni Tom Rodriguez nga si William Albert "Bill" Mott Sr. , sa  miaging adlaw.

Mao kini ang gipahibalo  sa talent manager ni Tom nga si Popoy Caritativo  pinaagi sa iyang Instagram post.

"I would like to inform the friends and supporters of Tom Rodriguez that his father, Mr. William Albert "Bill" Mott Sr. has passed away Saturday, 1:00 PM Arizona, USA time.Tom flew to the United States last March 17 to be with his family and was by his father's side during his last moments. We would like to ask for prayers for the Mott family at this very sad time,” suma pa ni Popoy.

Nipadayag  usab og pahasubo  ang girlfriend ni Tom nga si Carla Abellana ug ni-post kini sa hulagway sa amahan sa aktor sa Instagram uban sa caption nga , "The strongest man i've known ??".

Wala hinuon gidetalye  ni Popoy ang rason sa kamatayon sa amahan ni Tom.  Apan una na nga nabalita sa miaging tuig nga naghambin  kini sa sakit nga  lung cancer .   Nag-agi na kini og operasyon ug chemotherapy.

Beauty and the Beast naka-P541M na sa Pilipinas

Padayon nga gilinyahan sa mga sinehan dinhi sa Pilipinas ang latest love-action fairy tale sa Disney  nga  “Beauty and the Beast”.

Suma pa sa Walt Disney Studios Philippines nga nikita na kini og P541.67 million sulod sa 11 ka adlaw nga pagpasalida niini sa mga sinehan dinhi sa nasud ug gipaabot nga mosaka pa kini og maayo sa umaabot nga mga adlaw.

Ang maong  Disney movie gipasalida niadtong  March 16  ug nikita kini og P47.2M  sa  unang adlaw.

Gibidahan kini nila ni Emma Watson, Dan Stevens, Luke Evans, Kevin Kline ug  Josh Gad.

Nalakip usab sa maong pelikula sila si Ewan McGregor, Stanley Tucci, Audra McDonald, Hattie Morahan, Nathan Mack, Ian McKellen ug  Emma Thompson. 

Marian mobalik sa Encantadia

Malipayong gipahibalo ni Marian Rivera nga mobalik  siya og lugwa sa  pantaseryeng Encantadia. Nasayran nga duna’y mga gipangdugang nga mga eksena ang maong serye aron molapad pa ang dagan sa istorya niini.

Album ni Janella naka--platinum 

Todo pasalamat  si   Janella Salvador sa  iyang  supporters gumikan kay nahimong  platinum  ang iyang self-titled album.  Wala damha ni Janella   ang kalampusan sa iyang singing career. 

Richard target sa Dos

Niulbo ang report nga duna’y gitanyag  nga proyekto ang ABS-CBN ngadto kang Richard Guttierez  apan wala pa’y opisyal nga negosasyon nga nahitabo.  Nasayran nga gi-enjoy ni Richard ang iyang kinabuhi sa pagsuroy-suroy  uban sa iyang uyab nga si Sarah Lahbati ug sa anak nila nga si Zion.   Nasayran nga dili na basta-basta modawat og proyekto si Richard ug depende ra gyud kun unsa ang iyang mataypan.

Magbantay na gyud

Gisaad ni Jake Cuenca nga magbinantayon na gyud siya kanunay sa  iyang pagbisekleta aron dili na mausab ang nahitabo niya dili pa lang dugay diin nabun-og pag-ayo ang iyang lawas human siya nabangga sa truck.  Nanghinaot si Jake nga maalim dayon ang iyang bun-og aron makabalik na siya sa trabaho ingon man usab ang pagsalmot og mga marathon.

Layo og maabtan

Napanglantawan sa  big boss sa  Viva  nga si Boss Vic del Rosario nga layo gyud og maabtan  ang anak ni Cristina Gonzalez-Romualdez nga si Sofia Gonzalez. Kasamtangang gi-promote ni  Sofia ang debut single niya nga Pikit-Mata. Sudlan usab ni Sofia puhon ang acting world.

Giduaw sa uyab

Natandog pag-ayo si Matteo Guidecilli  sa iyang uyab nga si Sarah Geronimo gumikan kay nitikang lang gyud kini dinhi sa Cebu sa miaging adlaw aron ubanan siya sa pagsaulog sa iyang birthday. Gipamatud-an ni Sarah nga dili tinuod ang mga istorya nga nagkahanap ang ilang relasyon.

Liza andam molupad

Gikumpirmar  ni   Ogie Diaz nga usa ang iyang alaga nga si   Liza Soberano sa  mga gipilian aron mohulip  kang Angel Locsin  alang sa role nga Darna . Matud pa nga dili gyud magduha-duha si Liza sa pagdawat niini kun itanyag kaniya ang maong proyekto.

Nagpa-relax sa Palawan

Gisaulog  ni  Kathryn Bernardo  ang iyang  21st birthday didto sa El Nido Palawan. Kauban niya ang iyang ka-loveteam nga si Daniel Padilla ug ang suod nila nga mga higala.

Fan Mode

Na-starstruck si  Iza Calzado  kang Mikee Cojuangco sa dihang nagkaabot sila niini sa usa ka event.  Nagpahulagway  si Iza  uban kang Mikee  kinsa usa sa mga giidolo  niya nga aktres kaniadto.

Go Maymay!

Nakabaton  og gana si Maymay Entrata nga modawat pa og dugang acting projects  human nagmalampuson ang pag-arte niya sa miaging episode sa  Maalaala Mo Kaya nga naghisgot sa iyang kinabuhi.  Malipayon si Maymay gumikan kay mga positibong feedback ang kasagaran niya nga nadawat.

Mike maglisod og biya sa GMA

Tsika pa ni Mike Tan nga  duna siya’y utang kabubut-on sa  GMA-7 hinungdan nga ni-renew gihapon siya sa iyang kontrata sa maong network."Hindi ko kasi talaga makita na umalis ako sa network na nagpasikat sa akin,” suma pa sa aktor. (BANAT NEWS)